Read Angami Naga Keriekitho 3 Bible Online

Keriekitho 3 - Angami Naga bible

Keriekitho 3

¹Siro Ukepenuopfü Jihova chükeshü khunuo pete donu tinyhüu puo do vikuo. Puoe thenupfü ki “Ukepenuopfüe nnie ki, ‘Nnie tezieu nu sei puo si cü hie’ ishü me”?

²Ru thenupfüe tinyhüu ki, “Tezieu nu seibo kekreiko pete si cülie vi,

³derei tezie metsuo nu keba seibo-u si cülie suo. Ukepenuopfüe hienie ki, ‘Nnie bu tezie metsuo nu seiu si cülie lho, süu bie reilie lho, nnie süu cü morei bie liro nnie siata zotuo’ sishülie” si.

⁴Derei tinyhüu sie thenupfü ki, “Nnie sialie lho.

⁵Ukepenuopfüe, nnie süu cükelie sie mhirholie mu Ukepenuopfü mhie di kevikesuo sitaketuo si bakecü la sikeshü zo” silie.

⁶Siro thenupfüe seibo-u zivi mu puosi cü viketuo ngushü mu süu cü ro mhasilieketuo si di menguta. Sidi puo nhasiu rie cülie mu huo pie puo ze ketuo puo nupfu rei tsüshü, ru puo rei cülie.

⁷Sitse unie kenienie mhi mhirho parta. Sidi unie kenienie methuo keba silie; sitse unie chiedenyü terhü kemalie di pie unie whelie.

⁸Thevatie ki unie-e Ukepenuopfü Jihova tezieu nu rühou ketuo pfhe silie sitse themiau mu puo kimia unie Ukepenuopfü Jihova mhodzü michie di seiboko donu rüshü bata.

⁹Derei Ukepenuopfü Jihova themiau kie di, “No kirapuo ba ga?” si.

¹⁰Sitse puo sie, “A tezie nunu n pfhe si di michie di rüshüte, kekreilamonyü a methuo keba la” sishü.

¹¹Sitse Ukepenuopfü sie, “Supuo no methuo ba üshü ga? No a n bu cü hienukeshü seiu si cülieta zomonyü” sishü.

¹²Sitse themiau sie, “No thenumiapfü puo bu a ze banu di a tsükeshüpfü nhasiu pie a tsü di a bu cüliete” ita.

¹³Sitse Ukepenuopfü Jihova thenupfü ki “No kiüdi mha hau chüwata ga?” idi ketso. Ru thenupfü sie “Tinyhüu a sepie a bu cüwate” ita.

¹⁴Sitse Ukepenuopfü Jihova tinyhüu üse, “No hau chükewa la, khunuo pete donu mu nhanu nhachü pete donu n bu rüse kepfüu chütuo; n bu n va pie rünyo geinu rüyietuo, mu n rheichie nyophe cütuo.

¹⁵A thenupfü nnie bu kengumvütuo, puo yie mu n yie donu, puo bu n tsü kede tshietuo mu no puo phitshü medutuo” sishü.

¹⁶Siro puo thenupfü ki, “Ae n bu nuonipfüketuo ki n mezhie chü pekrashütuo, mu n bu kezie nunu nuo penuotuo. Sirei n bu n nupfu mengu tuo zotuo mu puo bu n kekhatuo.”

¹⁷Siro puo Adam ki, “No n kimia pfhe rünyü di, a n ki, ‘No süu cü lho,’ ikeshü nhasiu cüwate. N la kijüu bu rüse pfüte ho. N rheichie meyhumezhie di süu ciecü di n va pfhütuo.

¹⁸Zohu mu u hu kenyi nha n la pelhoushütuo, sidi n bu lienu nhako rei pfhü cütuo.

¹⁹N rükhrudzü nunu n bu n va pfhü cütuo, rünyo nu la vota kemochie. Rünyo nunu n chülie zo; no sü rünyo ze ru, mu n bu rünyo mevi latatuo” siwa.

²⁰Themiau puo kimia za thopie Iv[7] chülie, puoe thenu peteko zuopfücü la.

²¹Siro Ukepenuopfü Jihova chüzhü pie Adam mu puo kimia unie pfhenei chüshü di unie bu se unie whelie.

²²Siro Ukepenuopfü Jihova sie, “Harie, themiau rei kevikesuo si di u mhiete, puo dzie yhapie kerheiprü bo-u bielie di kechachie rhei tuotalie vi” sita.

²³Süla Ukepenuopfü Jihova tezieu nunu puo ketsewa di puo bu kijüu ciecü tuonuwa, süu nunu puo chü se parcü ze ru.

²⁴Puoe sidi themiau whuowa; sidi puoe kerheiprübo-u rüguolieketuo la Cherubim mu miü mhiekecü zhiecha puo pie tezieu nu niathutsa shüwa, sidi zhiechau bu rüge zhata.