Read Angami Naga Keriekitho 30 Bible Online

Keriekitho 30 - Angami Naga bible

Keriekitho 30

¹Rachel-e puo nuo puo rei penuoshü Jakob tsülie moketa ngu tse, puo dzüriepfü ngu puo rota; sidi sie Jakob üse, “Nuo kha a tsücie, kemosie a siatatuo” ita.

²Sitse Jakob Rachel gei puo nei mo se di, sie, “A Ukepenuopfü di n nuobvü siu khase bata zo memu?” ita.

³Sitse süpfüe, “A kituopfü Bilha haki ba, puo ki vocie, puo penuopie a do geishü di, a bu rei puo geinu a nuonuo ngulie rei si lho mu,” ita.

⁴Sidi puo puo kituopfü Bilha khapie puo kimia chüwa; mu Jakob puo ki vo.

⁵Sitse Bilha nuonipfülie di thepfumia puo penuoshü Jakob tsü.

⁶Süsie Rachel-e sie, “Ukepenuopfü a capi chüshüte, mu a pfhe rünyülie di a nuo khashüte” ita, sidi puoe puo za thopie Dan[37] chülie.

⁷Siro Rachel kituopfü Bilha nuonipfü lalie di thepfumia kenieu penuopie Jakob tsü.

⁸Sitse Rachel-e sie, “Ae keperhiekecü kere se puo a dzüriepfü ze keperhie[38] di kuoliete” sita; sidi puoe puo za thopie Naftali chülie.

⁹Leah rei puo penuo sa moketa ngukelie ki, puo kituopfü Zilpa ze vor di khapie Jakob bu puo kimia chü lalie.

¹⁰Sitse Leah kituopfü Zilpa-e thepfunuomia puo penuopie Jakob tsü.

¹¹Sitse Leah sie “Theruo kevi!” ita. Süla puo puo za thopie Gad[39] chülie.

¹²Leah kituopfü Zilpa-e thepfu kenie penuopie Jakob tsü lashü.

¹³Leah sie, “A nei za! Thenumiapfüko a üse u kenei üdi a kietuocü la” ita; sidi puo puo za thopie Asher[40] chüwa.

¹⁴Siro Reuben-e thoulha lieyie ki tsu lie nunu therei nhapfü mandraks ngulie di se vor puo zuo Leah tsü, sitse Rachel sie Leah ki, “N nuou therei nhapfü mandraks huo se a tsücie,” silie.

¹⁵Derei Leah sie puo ki, “No a kinu nu a nupfu se seketa mha kecü üdi, a nuou therei nhapfü mandraks rei sa selie nyüya me?” sita. Rachel sie, “Siro n nuou therei nhapfü mandraks la puo bu tsiezhü n ze zhülie vi” ita.

¹⁶Siro Jakob-e thevatie lie nunu vorkezhü ki, Leah vo puo ze kese di puo üse, “No a kinu vor morosuo; a a nuou therei nhapfü mandraks pie n zha khrülieketa la” ita. Süla puo süzhü puo ze zhü.

¹⁷Siro Ukepenuopfü Leah pfhe rünyülie, mu puo bu nuonipfülie di thepfu pengou-u penuoshü Jakob tsü.

¹⁸Leah-e sie, “Ukepenuopfü a zha[41] chü a tsüshüte kekreilamonyü a a kituopfü kha a nupfu tsükeshü la” ishü; süla puo puo za thopie Isakar chülie.

¹⁹Süsie Leah nuonipfü lalie, di thepfu sorou-u penuoshü Jakob tsü.

²⁰Sitse Leah sie, “Ukepenuopfü a phruo pevi seshü a tsü zo; tsiewe a nupfu a rhulietatuo, kekreilamonyü a thepfumia sorou penuopie puo tsüshüte ru” ibata; sidi puo puo za thopie Zebulun chü.

²¹Kenuotsa puo thenumia puo penuolie, mu puo za thopie Dina chülie.

²²Siro Ukepenuopfü Rachel rükrashü mu Ukepenuopfü puo pfhe rünyüshü di puo nuobvü khrüshü.

²³Sidi puo bu nuonipfülie di thepfumia puo penuolie, ru puo sie, “Ukepenuopfüe mia a kepeseu chü sete” ita.

²⁴Sidi puoe puo za thopie Josef[42] chülie, “Jihova bu thepfumia puo pie a tsü sashücie” idi.

²⁵Siro Rachel-e Josef penuokelie sie Jakob-e Laban ki, “A bu a kinu mu a thuo a ra la volieketuo la a khashücie.

²⁶A bu uko la n lie chü kevor a kimianie mu a nuonuoko khashü a tsüwa di a bu tuotacie; a kimhie di n lie chü vorshü shicü no a mhatho siba ru,” sita.

²⁷Derei Laban sie puo üse, “No a bu n ki mha pulie vi üro, a bu pucie, Jihovae n la japie a ketsü a siliete;

²⁸süla n zha chieshüliecie, siro süu kha n tsütuo” sita.

²⁹Jakob sie puo ki, “Noe a kedipuo mhie di n lie chüshü tsiu n kiriko a dzie nu kimhie di kruolie shikecü si ba ze.

³⁰A kevor mhodzü süko keduoyo zo, derei tsiewe kra philietacü la; a rürei kevo cha pete nu Jihova jashü a tsü. Derei a bu kikecü puo nunu a kikru la mhakesetuo ga?” silie.

³¹Laban sie, “A bu kedipuo pie n tsü ta?” ishü. Sitse Jakob sie, “No mhapuorei pie a tsü hie, no mha hau chüshü a tsütuo ro, a n kuo kro-u vachü mu pfhe lashütuo:

³²A bu thie n ri kro, pete nu vo di, tekuo kehoupuorei rürhücüko, krarhacüko mu keteiko kela kreiliecie, siro temvü rei krarhacüko morei rürhücüko keda kreiliecie, sidi sükosü pie a zha chücie.

³³Siro kenuotsa a kedietho a zha pushütuo, no a n ze mhachü kevorko zha le kevo ki. Temvüko kehoupuorei rürhü morei krarhakemo huo mu tekuo donu teikemo huo a kitsa nu ngulie ro, a süko rügulietaücü letalie” sita.

³⁴Laban sie, “Viwe! N kepu mhielie” sishü.

³⁵Sidi sünhie Laban-e mvüdo puorhie kenyiko mu krarhakecüko siro temvükrü rürhü mu krarhakecüko, mu kekrako pete kela kreilie di pie puo nuonuoko bu mehota.

³⁶Siro Jakob unie donu zha se rüve kepeciekecü nu khapie bawa, mu Jakob-e Laban ri kro keshako theke ba.

³⁷Süsie Jakob-e poplar mu almond sei kerhei bielie, di süko zhü hüshü, sitse süko nu zie kekrako ngu parlie.

³⁸Sidi puoe puo seizhü hükelieko se vor peri kroko bu dzü krieyakezha dzürüko nu khashü. Mu uko dzü krie kevor ki kerüpuoya.

³⁹Mu kirikoe vor seiko mhodzünu u thuo u yieu pelhoukecü ki rürhü mu krarhakecü parlieta.

⁴⁰Sitse Jakob-e tekuonuoko kho kekreilie, di peri kroko zie kerei pie Laban kiri krarhakecüko mu keteiko kitsa vashü, di puo thuo puo vieko whuo kreilie, sidi süko khapie Laban vieko donushü molie.

⁴¹Sidi kehoukipuorei peri puoyie keviko vor kesekelie ki Jakob-e seiko pie periko mhodzünu dzükhou nu shüshü, sidi süko bu seiko donu nu nuonipfülieya.

⁴²Derei peri kro kethachüko la we puo seiko khashüya mo; süla kethachüko Laban vieta mu puoyie keviko Jakob vieta.

⁴³Sidi themia süu mhanyi phi sieta, mu perinuo rei kra philie, siro kituo thenu rei thepfu rei mu ut mu gada rei kra phita.