Read Angami Naga Keriekitho 32 Bible Online

Keriekitho 32 - Angami Naga bible

Keriekitho 32

¹Jakob-e puo cha nu vozhü tse Ukepenuopfü dieliemia kro puo ze kese;

²mu Jakob-e uko ngu tse sie uko ki, “Hauha Ukepenuopfü razhüchü zo,” sidi puo thechü süki za üse Mahanaim[47] chüwa.

³Siro Jakob-e puo mhodzü dieliemia ketsepie Edommia rüna Seir kijü nu ketuo puo dzürieu Esau ki shü.

⁴Mu uko tarho di, “Nieko a niepu-u Esau ki hamhie di pushücie: N kituo Jakob-e puyawe, ‘A mia kekreimia chü di Laban ze tsie ketso lhou vorwate,

⁵mu a thudo, gadako mu tekuo kroko; siro kediemia mu kediemiapfü rei nyite; a bu n neipfülie thienyü idi a niepu-u ki dielie ketseshüzhüwe’ ” sishü.

⁶Sitse dielieko Jakob ki la vor di diepucü, “Hieko n dzürieu Esau ki vowate, mu puo mia krie dia ze di n ze kesetuoü vorzhie” ita.

⁷Sitse Jakob-e michie mu puo nou kemezhie phita; sidi puo puo zeketuoko, siro tekuo kroko, mithu kroko mu uko kezapie kro kenie chülie;

⁸puo lekecü, “Mhanuü Esau vor di kro kerieu pekawa ro, kro kekreiu bu talietuo” idi.

⁹Sidi Jakob sie, “He-i, a puo Abraham Kepenuopfü mu a puo Isak Kepenuopfü, he-i Jihova, no a ki hamhie di pukeshü, ‘N ra mu n seyieko ki la votalie, siro a n gei mha kevi chüshütuo’ ishüe,

¹⁰a we n kekhrie mu n kedietho peteko no se n kituo kecütho-u pekiekeshü ngulie sü molie, a the rübei se di Jordan hau cie voketa ze ru, tsiewe a kro kenie parliete.

¹¹A n ki chaya, a dzürieu dzie nunu, Esau dzie nunu a kelashücie, a puo preiketa la, puo vor di a mu uzuopfüko mu unuonuoko pete dukhriwa rei silie lho mu.

¹²Sirei noe pucü, ‘N gei mha kevi chüshü zotuo, sidi n nuosenuoyie chüpie dzükezha nu theshünyo phrü hulie kelhoko tuoishütuo’ ” size.

¹³Sidi puo süzhü süki bata, siro puo seketuoko nunu mhapie puo dzürieu Esau tsüketuo puo dojülie,

¹⁴temvükrü krie kenie mu mvüdo mepfü, tekuokrü krie kenie mu puochü mepfü,

¹⁵u nudzü khashükezha ut ser mu süko nuonuoko sa, thukrü hiedia mu thudo ker, gadakrü mepfü mu puochü ker.

¹⁶Sidi puo süko khapie puo kituoko dzie nu shüshü, puo thuo puo kro-u bu kreikrei di; mu puo kituoko üse, “A mhodzü vozhülie, mu khunuo kroko bu kepecie sei tuolie” isi.

¹⁷Sidi puo kerietho-u ki, “A dzürieu Esau n ze keselie mu n ketso di, ‘No kiramia ga? Kirapuo votuoüzhü ga? mu n mhodzü ketuoko supuo vie ga?’ iro

¹⁸no hai di pucie, ‘Hako n kituou Jakob vielie; hako pie a niepu-u Esau tsütuoü di ketseshüzhülie; sizomonyü puo rei hieko sie tuowe’ sishülie” si.

¹⁹Puoe sükemhie di kro kenieu mu kro seu tsiu puo siemedziketuo kro pete ki, “Nieko pete rei Esau ze kesecü ki sükemhie pu phreliecie.

²⁰Siro, niekoe sie, ‘Sizomoü n kituou Jakob hie sie tuowe,’ si phreliecie” sishü. Puoe lecü, “Mha pie puo ketsüko a mhodzü voketako bu puo nei chülietuo süsienu a puo zie ngutuo; puo rei a zelietuo nhiemu” idi.

²¹Süla mha khakeshüko puo mhodzü vota, mu puo zo we süzhü thechü sünu bata.

²²Siro puo süzhü sielie di puo kimianie, puo kituopfünie mu puo nuonuo mia kerepuokrüko zelie di Jabok rüu cie vota.

²³Puo uko ketsepie rücüu ciewa mu puo zeketuo khe sümhie di ketse phreshüwa.

²⁴Sidi Jakob puo rübei bata; süki mia puo puo ze kene ba teisotie tso.

²⁵Siro themiaue Jakob penyülie lhoketa ngu tse, puo leikhei puo kere nu bieshü; sitse Jakob puo ze kene keba nu puo leikhei rülata.

²⁶Sitse themiau sie, “A bu tuotacie, teisotazhie mu” ita. Derei Jakob sie, “No jashü a tsü kemo sie a n bu tuolie lho” si.

²⁷Siru puoe puo ki, “N za supuo ga?” ita. Puoe sie, “Jakob” ishü.

²⁸Süki puo sie, “N za üse Jakob üdi kie salie lhote, derei Israel[48] ituo; noe Ukepenuopfü mu themia ze kebie di kuolieketa la” ita.

²⁹Süsie Jakob-e sie, “N pezie rei n za se a ki pucie” ishü. Derei puo sie, “Kedipuo la üdi no a za ketso ga?” ita. Sidi puo süki nu jashü puo tsü.

³⁰Süla Jakob-e thechü süki za thopie Peniel[49] chüwa, di pucü, “A mhotsou Ukepenuopfü nguwate, sizoürei a kerheiro kelashüte” ita.

³¹Siro puo Penuel cie vokezhü ki niaki thu puo vata mu puo do rüyho tuota.

³²Süla Israelmia thie ketso rei khunuo leikhei gei puozhüdau cüya mo zo; kekreilamonyü puoe Jakob dokhrü nu puo leikhei zhüdau biekeshü la.