Read Angami Naga Keriekitho 33 Bible Online

Keriekitho 33 - Angami Naga bible

Keriekitho 33

¹Jakob-e tosie mehoshü ru, harie, Esau vorzhü ngulie, mia krie dia ze di, süla puo nhicuko kezapie Leah, Rachel mu kituopfü nie tsüwa.

²Puo kituopfünie mu unie nuonuoko bu rielie, süsie, Leah mu puo nuonuoko, tsiu Rachel mu Josef bu kenuotholie.

³Sidi puo thuo uko mhodzü vota; sidi va thenie nuke kijü tsushü di puo dzürieu penuo volie kemochie tuo vor.

⁴Derei Esau puo ze kesetuoü di vorta, sidi puo ciepielie mu puo vo krapfü di puo mebo, mu unie krata.

⁵Siro Esau tosiecü ki thenuko mu nhicuko ngulie sitse puo sie, “N zeketuo hako suomia ga?” ita. Sitse Jakob sie, “Ukepenuopfü ngukemezhie nunu khapie n kituou ketsü nuonuokolie” si.

⁶Süsie kituopfünie mu unie nuonuoko tuo penuo vor di nerhu tsuta.

⁷Sükemhie Leah mu puo nuonuoko vorlie di nerhutsushü; thela nu Rachel mu Josef unie penuo vorlie di nerhutsushü.

⁸Sitse Esau sie, “A bu puo kro kekreikrei di ze kesekecü ha no kedipuo le di hai ga?” ita. Sitse Jakob puo die kela di sie, “A niepu-u nei chütuoü di lie” ishü.

⁹Derei Esau sie, “A siezeu, a kelhuo bawe, n vie kebako bu n vie chü zolie” ita.

¹⁰Sitse Jakob sie, “Simowe, a n neipfülie üro, n pezie rei a dzie nunu a mha khakeshüko lieliecie; a n zie kengu ha Ukepenuopfü zie kengu mhieta zo, no rei n nei di a zeliete ru.

¹¹A n ki chaya, a mha se n ki kevorko lieliecie, kekreilamonyü Ukepenuopfü a ngumezhie phishüte, mu a a kemengu pete nyite” ita. Sidi pu beitacü puo rei lielie.

¹²Süsie Esau sie, “Úko rüve chau nu tuoshü khe, mu a n mhodzü rielietuo” ita.

¹³Derei Jakob sie puo ki; “A niepu-u si ba, nhicuko metei mo, siro tekuo mu mithu kroko a zeketuoko unuonuo nuyacü la a uko ze menuo morosuo; mu mhanuü khunhie puo uko whuo keyieshü ro, thukro pete siatatie ru.

¹⁴A niepu-u bu puo kituou mhodzü votaliecie, sitse periko mu nhicuko chatuo kize Seir nu a niepu-u ki vor tsolie kemochie a rülili di uko taze vorlietuo” ita.

¹⁵Sitse Esau sie, “A bu a ze ketuo themia huo khapie n zetuotacie” Derei puo sie, “Kedipuo se sa ta? A bu a niepu-u nei pfülie üthienyü” sishü.

¹⁶Süla Esau sünhie puo cha ze Seir nu la vota.

¹⁷Derei Jakob tuo Sukot[50] nu volie, sidi puo thuo puo la ki puo chülie, mu puo riko la pruko chülie. Süla thechü süu za pie Sukot chüta.

¹⁸Siro Jakob-e mha kere puorei dzüwa mo di Padan-aram nunu Kanan kijü nu keba Shekem nadiu nu vorlie; sidi nadiu mhodzü kinu razhü chü bata.

¹⁹Siro puo Shekemnuo puo Hamor kinu kijü yopuo raka krie puo pie khrükelie nu puo pfheki pethoulie.

²⁰Siro sükisünu ruosuoba chülie di süu ki, El-Elohe-Israel[51] üta.