Read Angami Naga Keriekitho 35 Bible Online

Keriekitho 35 - Angami Naga bible

Keriekitho 35

¹Ukepenuopfüe Jakob ki, “Sielie, Bethel nu volie, di sünu lhoutalie, sidi sünu nu ruosuoba puo chüpie, Ukepenuopfü, no n dzürieu kinu ta kevor ki n pengukeshüu Ukepenuopfü tsüliecie” sita.

²Süla Jakob sie puo kinuko mu puo zeketuo kheko üse, “Nieko donu seyie kekreimia rhuoko kha phrewalie, nie chü kemesalie mu nie pfheneiko kedilie;

³Sidi úko sielie di tuo Bethel nu vota khe, siro a sünu nu a ruosuoba puo chüpie a kemengakelie ki a pfhekhokeshüu, mu a kevo cha pete nu a zeketuou Ukepenuopfü tsüshütuo” ishü.

⁴Süla uko seyie kekreimia rhuo u dzie nu ketuoko, mu menyie uko nyie nu ketuoko khapie Jakob tsüwa, sitse Jakob-e süko pie Shekem khieki phriebo-u khro nu khruwa.

⁵Siro uko rüvecha nu, Ukepenuopfüe uko khieümhou keba nadiko bu uko preiketuo puo chüshüwa. Uko bu Jakob nuonuoko whuo molieketuo la.

⁶Sidi Jakob-e Kanan kijü nu keba Luz (süu Bethel) nu vorlie, puo mu puo zeketuo pete.

⁷Sidi puo sünu nu ruosuoba puo chüshü di thechüu za pie El-bethel[52] chülie. Kekreilamonyü puoe puo dzürieu kinu tatakezhü ki Kepenuopfüe puo pengukeshü la.

⁸Siro Rebeka kituopfü Debora siata, sidi Bethel khro ki phriebo-u khro nu puo khru; mu thechü süu za pie Alon-bakut[53] chüta.

⁹Ukepenuopfüe Jakob pengu lashü, puo Padan-aram nu vorkelie ki, sidi japie puo tsü.

¹⁰Siro Ukepenuopfü sie puo ki, “N zae Jakob zo; derei n za pie Jakob üdi kie salie lhote, n za bu Israel chütatuo” ita. Süla puo za Israel üdi kieta.

¹¹Süsie Ukepenuopfü puo üse, “Ae Kuokejokejü Kepenuopfü[54] we: kruolie mu kra miemieliecie, n geinu seyie puo mu seyie kekra siertuo, mu n geinu kediko siertuo.

¹²A kijü khapie Abraham mu Isak ketsüu pie n tsütuo, mu kijü süusü pie n nuosenuoyieko tsütuo.”

¹³Süsie Ukepenuopfü puo rüchü kethachüu nunu tuota.

¹⁴Mu Jakob-e thechü süu nu tsiese puo seshüwa, di kekrie ruosuo puo rupie sügei shü.

¹⁵Süla Jakob-e Ukepenuopfü puo rüchükecü thechü süu üse Bethel idi kieta.

¹⁶Süsie uko Bethel nunu tuo lashü; mu uko Efrat nu volieketuo petse za baluokecü nu, Rachel-e nuoze vachü chülie, mu puo kechü reta.

¹⁷Siro puo mhachü kemezhie se keba ki, nuoze kethekepfü puo üse, “Michie hiecie, no tsie thepfumia puo ngu lalietuo mu” ita.

¹⁸Siro puo ruopfü tuotakezhü ki, (puo siaketa la) süpfü puo za pie Ben-oni[55] chü; derei puo puo we puo za pie Benjamin[56] chü.

¹⁹Sidi Rachel siata, mu Efrat nu vokezhü cha nunu puo khruwa (süu Bethlehem),

²⁰tsiu Jakob-e puo mekhru gei tsiese puo seshü; Rachel mekhru gei tsieseu thie ketso rei ba zo.

²¹Israel-e tuota di vo Eder tsiepfhe tse kevoki nu puo pfheki pethoulie.

²²Siro Israel kijü sünu keba ki, Reuben vo di puo puo meshüpfü Bilha ze zhüwa; mu Israel süu sishü. Siro Jakob nuonuo thepfu kerekenie

²³Leah nuonuoko: Reuben (Jakob nuorieu) Simeon, Levi, Juda, Isakar, mu Zebulun.

²⁴Rachel nuonie: Josef mu Benjamin.

²⁵Rachel thekepfü Bilha nuonie: Dan mu Naftali;

²⁶Leah thekepfü Zilpa nuonie: Gad mu Asher. Hako Jakob nuonuo Padan-aram nu ketuo ki penuoshü puo ketsü thepfuko.

²⁷Süsie Jakob-e Mamre morei Kiriat-arba (süu Hebron) nu puo puo Isak ki vor, Abraham mu Isak unie solhimia chü di lhou kevor-u nu.

²⁸Siro Isak-e cie krie puo di hiethethata.

²⁹Sidi Isak tsata mu puo kelhou tseiwa di siata, di puo ze puo themiako ki vota, siro puo nuonie Esau mu Jakob unie puo khruwa.