Read Angami Naga Keriekitho 37 Bible Online

Keriekitho 37 - Angami Naga bible

Keriekitho 37

¹Jakob-e puo puo solhimia chü di lhou kevor Kanan kijüu nu lhouta.

²Hakoe Jakob kikru dze; Josef-e cie kerethenie phichülieta di puo dzürieko ze tekuo pfhe tuoya; siro puoe puo puo kimia Bilha mu Zilpa nuonuoko kekhruohimia puo chü; mu Josef-e uko dze kesuo se vor puo puo ki pushü.

³Tsiu Israel-e puo nuonuoko pete donu Josef khriekuo, puo puo tsa nuocü la; sidi puo boulie kecha, puo bou sa di terhüpie puo tsü.[73]

⁴Derei puo dzürieko uko puoe uko kirei puo khriekuoketa ngu tse, uko puo ngumecüta, sidi puo rüchü menuo mota.

⁵Va puo Josef-e puo mho puo pema, mu puo süu pie puo dzürieko ki pukeshü ki, uko puo ngumecükuo sata.

⁶Puo sie uko ki, “A mho kepema hau rünyüshücie.

⁷Harie, úko lie nu telha khro tuo, ru harie, a lhakhro-u sie doupfü thata, mu nieko lhakhroko vor a lhakhro-u houpfülie di süu kelu” ishü.

⁸Sitse puo dzürieko sie puo ki, “No hieko mho di kethotuo mo nyü? morei no hieko mho kekha zotuo mo nyü?” ita. Süla uko puo mhoko mu puo dieko la puo ngumecü kechüta.

⁹Süsie puo puo mho kekrei puo pema di süu pie puo dzürieko ki pu di, “Harie, a mho kekrei puo pema la ho; niaki, khrü mu themvü kerepuokrü nuketsu a kelu” ishü.

¹⁰Derei puo süu se puo puo mu puo dzürieko ki pushü tse, puo puo puo kerhie di sie, “No ha kedipuo pemaya mu? A mu n zuo, siro n dzürieko vor kijü nerhutsu n kelu zo kethotuoluo le?” sita.

¹¹Süsie puo dzürieko puo ngu u rota; derei puo puo we süu se puo nou tuota.

¹²Siro puo dzürieko tsu Shekem kepenuoki uko puo kuoko pfhetuoü tsuta.

¹³Sitse Israel Josef ki, “N dzürieko Shekem nu tekuo pfhetuo moü me? Vorlie, a n ketsepie uko ki shütuo mu” sita. Sitse puoe puo puo üse, “A haki bawe” ishü.

¹⁴Sitse puo puo puo üse, “No tsie tsu di n dzürieko mu tekuoko vituo zo mo mo shicü mehoshü di, la vor a ki pucie” ishü. Sidi puo puoe Hebron razha nunu puo ketseshü. Sidi puo Shekem nu vorlie.

¹⁵Süki mia puo puo lieko nu rühou ketuo ngulie, sitse themiau puo ketso di sie, “No kedipuo pfhütuo ga?” isi.

¹⁶Ru puo sie, “A dzürieko pfhü tuolie, n pezie rei uko kirapuonu tekuo pfhe tuo shiü se a ki pushücie” sishü.

¹⁷Sitse themiau sie, “Uko haki nu tuote, mu a uko ‘Úko Dothan nu vota khe’ ituocü si ho” sishü. Süla Josef puo dzürieko pfhü vo Dothan nunu uko ngulie.

¹⁸Uko kepetse nunu puo ngushü, mu puo uko penuo vorlie kemo nu uko puo dukhriwatuoü di kedovalieta.

¹⁹Sidi uko sie huoniehuo ki, “Legei puo mho kepemau vorzhie.

²⁰Khe úko puo dukhriwa di puo kelhoupie khehoko puo nu shüwatuo, sidi nhachü puo zho kesuo puoe puo tecülietaüwatuo; sidi úko puo mhoko kimhie vortuo shicü mehotuo” ilie.

²¹Derei Reuben süu sicü ki, puo sie “Úko puo kerheiro we liewa hiecie” ishü di uko dzie nunu puo kelashü.

²²Reuben uko üse “Thezie puorei pekru hie, di puo kelhoupie rayha nu kheho nu shüwalie, mu thezie pie puo geishü mo zolie” sishü. Puoe uko dzie nunu puo kelalie di puo kha lapie puo puo tsükewa lekecü la.

²³Josef vor puo dzürieko tsolie tse, uko puo seketuo boulie kechau[74] rhuolie,

²⁴sidi uko puo telie di kelhoupie kheho nu shüwa. Kheho-u methuo ba, sünu dzü puorei ba mo.

²⁵Süsie uko mhacütuoü ke balie; mu uko meho sie ru, Ishmaelmia rüve kro puo Gilid nunu vorkezhü ngulie, uko utko geinu ketsa, u kenhecü daru mu leitsa toupfü Ijipt nu tsuzhü.

²⁶Sitse Juda puo dzürieko üse, “Úko úko siezeu dukhriwa di puo zie keviewa rei kedipuo kemevi ngulie ta?

²⁷Vorlie, úko puo zepie Ishmaelko ki shüwa khe, di úko dzie pie puo gei shüwa mo zolie; puo rei úko siezeu mu úko chü zeru.” Sitse puo dzürieko puo die rünyülie.

²⁸Süki Midianmia lhithomia kro puo tuo vor; sitse uko kheho-u nunu Josef merhashü se parlie di Josef pie Ishmaelmia ki rakachü shekel mepfü nu zelie. Siro mia Josef ze Ijipt nu vota.

²⁹Reuben-e kheho-u nu la vor di Josef ba moketa ngulie tse, puo pfheneiko cierhata,

³⁰sidi puo dzürieko ki, “Khriesayo ba mote, mu a bu kirapuo vo ta?” ita.

³¹Süsie uko Josef boulie kechau chülie, mu temvünuo yopuo dukhrilie di boulieu pie thezie nu petselie;

³²sidi puo bou kechü boulie kechau[75] ketsepie uko puo tsüshü mu süu se puo ki vor di sie, “Hieko hau nguliewe, hau n nuou boulie mo mo shicü no meholiecie” ita.

³³Siro puo süu silie di sie, “Hauha a nuou bouliete; nhachü kekhrie puo bu puo tecüliete, Josef sü ciechücierhawata meciete” ibata.

³⁴Süsie Jakob-e puo pfheneiko cierhawa di gakhropfheko chü selie, tsiu teisozha kekra puo nuo krü bata.

³⁵Puo nuonuoko thenu rei thepfu rei puo nou thupeluotuoü vo, derei puo mia bu puo nou thupeluo mvü di sie, “Molie a we kra zo di Sheol nu a nuou ki tsutie” ibata. Sümhie di puo puoe puo la kra bata.

³⁶Süteiki Midianmia puo zepie Ijipt nu Faro khro kezhamia, puo kepfheko mhokezhau Potifar ki shüwa.