Read Angami Naga Keriekitho 38 Bible Online

Keriekitho 38 - Angami Naga bible

Keriekitho 38

¹Siro Judae puo siezedzürieko kinu tuota di vor Adulammia Hira ücü puo khieki lhouta.

²Sünu Kananmia Shua ücüpfü puo ngushü; ru puo süpfü lielie, di puo ki vowata.

³Süpfü nuonipfülie di thepfumia puo penuoshü, ru puo puo za thopie Er chülie.

⁴Süsie rei süpfü nuonipfü lalie di thepfumia puo penuoshü mu hapfü puo za thopie Onan chülie.

⁵Süsie rei puo nuonipfü lalie di thepfumia puo penuo lashü, ru hapfü puo za thopie Shela chülie. Puoe hau penuokelie ki Kezib nu ba.

⁶Sitse Juda-e puo nuo nuorieu Er la thenu puo lieshü puo tsü, mu süpfü za Tamar.

⁷Derei Er, Juda nuorieu, Jihova mhodzünu ziezhü mota, süla Jihova puo pesiawa.

⁸Sitse Juda Onan ki, “No n dzürieu kimia ki vocie, sidi puo nupfu siezeu mhathoko chüpie puo gei shüwalie, sidi n dzürieu tsia pelhoushüliecie” ita.

⁹Derei Onan-e puo yieu puo vielie lhokecü si, süla puo puo dzürieu kimia ki vocü ki puo phoudzüu vapie kijü shüwa, puotsiau khapie puo dzürieu tsüwa moketuo la.

¹⁰Mu Jihova puo mhatho süu puo nei mo.

¹¹Sitse Juda-e puo miepfü Tamar ki, “No n puo kinu sami balie, a nuou Shela phichülie kemochie” sishü, puoe puo rei puo dzürienie tuoi di siaketa keprei la. Süla Tamar vo di puo puo ki lhou tuota.

¹²Si keba teiu nu Juda kimia Shua nuopfü siata, mu Juda thekrü chü tseikewa sie, Timna nu puo kuomie kebeko ki kho, Adulammia puo zeu Hira unie.

¹³Sitse mia Tamar ki, “N meiu puo kuomie betuoü di Timna nu khozhie ho” ishü.

¹⁴Sitse puo puo geinu puo sami pfheneiko rhuowa, mu puo tsüdzeu pie puo yapfülie, di Enaim kharu-u nu balie, süusü Timna nu kevochau nu ba; puoe Shela phichülieta zorei puo bu puo ki nyikemo ngu batacü la.

¹⁵Siro Juda puo ngu tse, süpfüü thethenumia ücü leta, süpfüe puo zie dzepfülieketa la.

¹⁶Sitse puo tuo chakhie hapfü ki vo di sie puo ki, “Vor di, a bu n ki vocie,” ishü. Puo hapfü üse puo miepfü ücü sikemo la. Sitse süpfü puo üse, “N bu a ki lelieketuo la, no kedipuo se a tsü ta?” ita.

¹⁷Sitse puo süpfü die kela di “A temvü kro nunu temvü yopuo ketseshütuo” ishü, sitse süpfü sie “No süu ketseshü kemo ki, mha puo a ki phrashülie üro?” ita.

¹⁸Sitse puoe sie, “A bu mha kikecü puo phrashü n tsü ta?” sitse süpfü sie, “N zasi mu n ro-u, tsiu n dzie nu ketuo n theu liecie” ishü. Süla puo süko khapie süpfü tsüwa, di puo ki lewa, mu süpfü puo geinu nuonipfülieta.

¹⁹Süsie süpfü sielie di tuota, di puo geinu puo zie keyau biewa, di puo sami pfheneiko se lalie.

²⁰Siro Judae thenupfü dzie nunu puo phrakeshüko lie lalietuoü di puo zeu Adulam-u dzie nunu temvü yopuo ketseshü, derei süu süpfü pfhü pejüta.

²¹Süla puo thechü sünu themiako ketso di sie, “Enaim nu kevo cha khieki keba rüsuoki thethenupfü kirapuo ba ga?” ishü. Sitse uko sie, “Hanu thethenumiapfü puorei ba vor mo” ita.

²²Sitse puo Juda ki la vo di, “A puo ngulie mote, mu sünu keba themiako rei, ‘Thethenumia puorei hanu baya mo’ itelie” sishü.

²³Sitse Juda-e sie, “Süpfü thuo süko se batalie, moro avu mia krenyü chütatie ru, a temvüyo ketseshü derei puo ngulie mote” ita.

²⁴Thekhrü se mese sie nu mia Juda ki, “N miepfü Tamar we thetheliewate; sizomonyü puoe thethelie di nuonipfü tuote” idi pushü. Sitse Juda sü sie, “Puo ze vorlie, di puo thewalie” ita.

²⁵Mu mia puo ze vorkezhü ki puo die ketsepie puo meiu ki shü di pucü, “Mha hako puo niepu-u geinu, a nuonipfü baücü siliecie,” sidi süpfüe sie, “A n ki chaya, hako supuo vie shi mehoshücie, zasiu, kero-u mu ketheu” ita.

²⁶Sitse Juda süko silie di sie, “Hapfüe a ki miathokuo, ae a nuou Shela pie puo tsü kemo la iru” sita. Sidi puoe süpfü zezhü sa mota.

²⁷Siro süpfü nuoze tei vorlie tse, nuobi puo va nu tuo ngulie.

²⁸Siro puo nuoze vachü chü vor tse, puo nuo yopuo puo dzie se par; sitse nuoze kethekepfüe sü pielie di kelo kemerie puo pie sügei phashü di sie, “Hau par rie” ishü.

²⁹Derei puo puo dzie teshü la leta, harie, puo dzürieu parte; süla süpfüe sie, “No n thuo hai di mha pfüpha parta ze?” ita. Sidi puo za thopie Perez[76] chülie.

³⁰Süsienu puo siezeu par, mu puo dzie nu kelo kemerie puo tuo; mu puo za thopie Zera[77] chülie.