Read Angami Naga Keriekitho 39 Bible Online

Keriekitho 39 - Angami Naga bible

Keriekitho 39

¹Siro mia Josef ze Ijipt nu tsuta, mu Potifar, Faro khro kezha puo, mia kepfheko kezhau mu Ijiptmia puo, Ishmaelko puo ze sünu ketsurko kinu puo khrülie.

²Jihovae Josef ze tuo, sidi puo lhou khriekeliemia puo chüta; mu puo puo niepu-u Ijipt-u kinu tuoya.

³Siro puo niepuu rei Jihovae puo ze ketuo, mu puo dzie mhatho pete nu puo bu lhou khriekelie ngushü.

⁴Sidi Josef-e puo mhodzünu puo neipfülie di puo bu puo lie chülie, sidi puo chüpie puo kinu mha pete kemeho-u chüwa.

⁵Siro puo chüpie kinu kemeho-u mu puo vie pete kemeho-u chükewa sie Jihova Josef la japie Ijipt-u ki nu shü, sidi Jihova thejau puo vie kinu mu lie nu rei mha pete gei vorlie.

⁶Süla puo puo vie pete pie Josef dzie nu shüwa; sidi puo thuo puo kecü niekhrüdau rübei sie mha kekrei puo la rei puo nounyüya mota. Siro Josef-e puolhe puolhou vi mu zivi.

⁷Puotei huo sie puo niepu-u kimia mhi-e Josef gei bata, sidi puo sie, “A ze zhücie” ita.

⁸Derei puo mvüta mu puo niepu-u kimia ki, “Harie, a bakecü la a niepu-u puo kinu mhapuorei dze le puo nounyüya mo, sidi puo vie ketuo pete kha a dzie nu shüwate.

⁹Ki hau nu puoe a ki zha mote, siro no zo kemosie mhapuorei a kinu khase keba jü, noe puo kimiacü la; siliro kedipuo mhie di a mha kesuo kezha hau chü di Ukepenuopfü gei phoumatuo ga?” ita.

¹⁰Siro süpfü teisonhie Josef ki pu baya zoürei puoe süpfü ze zhü mvü morei puo rübei süpfü ze ba rei mvüta.

¹¹Derei khunhie puo, puo mhatho chütuoü kinu le, mu themiako puorei kinu ba mo.

¹²Sitse, süpfü puo pfhe teshülie di sie, “A ze zhücie” ita. Derei puo puo pfhe khapie süpfü dzie nu shüwa di ta kitie vota.

¹³Mu süpfüe puo pfhe rhuopie puo dzie nu shüwa di ki nunu taketa ngukeshü ki,

¹⁴puoe puo kinu themiako kie di süko ki, “Harie a nupfu Ibrimia puo ze vorkecüu puo u zhaseketuo la ze; puo a ze zhütuoü vor mu a melie petoshü.

¹⁵Mu puoe a melie petokeshü si tse, puo pfhe khawa di tate” ita.

¹⁶Sidi puo niepu-u vor kemochie, süpfüe puo pfheu khapie zhü tso,

¹⁷mu hapfüe puo ki rei sükemhie tou di thedzeu pu la di, “Kituo Ibri-u, no puo ze hieko donu vorkeshüu, a zhasetuoü di a ki vorwe,

¹⁸derei a a pfhe phra petoshü mumetha, puo puo pfhe vapie a tsüwa di ki nunu tate” ishü.

¹⁹Siro puo niepu-u puo kimia puo ki pu di, “N kituou hakemhie chüpie a gei shüshüwe” icü sikelie ki, puo nou meyie seta.

²⁰Sidi Josef niepu-ue puo telie di puo khapie kedieki nu shüwa, kediu diemiako bayakezhau nu, sidi puo sünu kedie chü bata.

²¹Derei Jihova Josef ze tuo zo, mu puo khrie mota mo zo, sidi puo chüpie puo bu kedieki kepfheu khriepfülie.

²²Sidi kedieki kepfheu kedieko pete khapie Josef dzie nu shüwa; mu sünu mhakechü pete puo thuo chü phreta.

²³Kedieki kepfheu mhapie Josef pelekewa puo la rei puo nou kemezhie mota, kekreilamonyü Jihova puo ze ketuo la; mu puo mhakechü pete nu Jihovae puo bu süu chükhrielieyakezha la.