Read Angami Naga Keriekitho 4 Bible Online

Keriekitho 4 - Angami Naga bible

Keriekitho 4

¹Siro Adam puo kimia Iv ze kesiwa, ru puo nuonipfülie sidi Kain penuolie tse puoe, Jihova a khruohishü di a nuo thepfunuomia puo nguliete idi puo za thopie Kain chülie.

²Süsie rei puo kimiae Kain siezeu Abel penuo lalie. Siro Abel tekuo peri, mu Kain lieciemia puo chüta.

³Puotei huo sie Kain-e puo lieyie huo se vor ruosuo chüpie Jihova tsü,

⁴mu Abel liro puo kuoko donu nuorie huo se vor di süko geinu puoshuo kevithoko se ruosuo chüpie Jihova tsü. Sitse Jihova Abel mu puo ruosuo rei ngu puo neilie,

⁵derei puo Kain mu puo ruosuo rhu mota. Sitse Kain puo nei mo seta, di puo noukemeyiepfü puo dzüshie chüta.

⁶Süla Jihovae Kain üse “No kiüdi n nou meyie mu n dzüshie chüta ga?

⁷No rei mha puotou-u chülie ro, n lielie lhoü me? Derei no mha puotou-u chülie moro kephouma n kikha ki zhü zo, süu n mengutuo, derei no süu penyülie morosuo” sishü.

⁸Süsie Kain-e puo siezeu Abel ki, “Khe avu lie nu tsu khe” ilie. Haidi unie tsu lienu ketuo ki Kain-e puo siezeu Abel gei puo nei mo sier di puo dukhriwa.

⁹Sitse Jihovae Kain ketso di “N siezeu Abel kirapuo ba ga?” si. Ru puoe sie “A si mo. A a siezeu kepfheu me?” ita.

¹⁰Sitse Jihova “No kedipuo chüwata ga? N siezeu zie-e kijü nu a kiezhüte.

¹¹Tsie no rüse pfüte ho, No n siezeu dukhrikeshü ki, mekuopie n siezeu zie liekelie kijüu geinu n whuowate.

¹²No lie cieshü rei; kijüu mhapuorei rüchüpie n tsülie lho; n bu kijü nu puo ki kejü kitamia puo chütatuo” sita.

¹³Sitse Kain-e Jihova ki, “Siazha hau a la mesithorte.

¹⁴Noe kijüu geinu a whuowa di a bu n mhodzü ki ba motatuoüzhie. Ae kijü nu a ki jü di rühou ketuo kitamia puo chütatie, mu themia kehoupuorei a ngulie ro a dukhriwatie” sita.

¹⁵Derei Jihovae puo ki, “Silie lho! Huomia Kain dukhriwa ro, sümia gei khepu süde thenie lietuo” si. Sidi Jihovae puo dukhrikewa keprei la zasi puo chüpie Kain gei shüwa.

¹⁶Mu Kain Jihova mhingu ki nu tuota di vo Eden niathutsa Nod[8] kijü nu lhouta.

¹⁷Kain puo kimia siwa, mu hapfüe nuonipfülie di Inok penuolie. Süsie Kain rüna puo chülie di puo nuo Inok za pie rüna süu za tholie.

¹⁸Siro Inok nuou Irad, mu Irad nuou za Mehujael mu Mehujael nuou za Methushael mu Methushael nuou za liro Lamek.

¹⁹Siro Lamek puo kimia kenie nyi, unie za liro Ada mu Zila.

²⁰Ada geinu Jabal penuolie, puoe pfheki nu lhou di perinuo periyakezhako krüu chü.

²¹Siro puo siezeu za liro Jubal, puoe nyarübou mu luoü seyakezha ü kechümiako krüu.

²²Zila geinu Tubal-Kain penuolie, puoe merenyi mu thegi dapie mhanya neiüko rükrei se parkeshüu. Tubal üpfü za ro Nama.

²³Siro Lamek-e puo kimianie ki: “Ada mu Zila nnie a pfhe rünyüshücie; Lamek kimianie, a kepu rünyüshücie: mia puo a vü kerüzakeshü la a puo dukhriwate, khriesamia puo a pechükeshü la.

²⁴Kain dukhrikewa la kerheiro thenie lietuoü ro a dukhrikewa sie kerheiro hietheniethenie lietuo” si.

²⁵Adam puo kimia si lawa, mu süpfü thepfu puo penuolie. Sitse puo kimiae süze “Ukepenuopfüe Kain bu puo dukhrikewa Abel sounu a nuo thepfu puo kha lashüte” idi puo za pie Seth tholie.

²⁶Seth rei puo nuo thepfu puo ngulie di puo za pie Enosh tholie. Ha mese ki nu themiae Jihova za kie sedete.