Read Angami Naga Keriekitho 40 Bible Online

Keriekitho 40 - Angami Naga bible

Keriekitho 40

¹Siro mha hako sie, Ijipt kediu hie kepieu mu puo niekhrüda kerieu unie unie niepu-u nei kemo chüwa.

²Süla Faro-e puo lietho kezha hanie, puo hiekepie kezhau mu niekhrüda kerie kezhau unie gei puo nou meyieta.

³Sidi unie khapie kedieko kepfhe kezhau dzie nu keba kiu nu, Josef keba kediekiu nu shüwa.

⁴Siro kedieko kepfhe kezhau Josef bu unie meholienushüwa, ru puo unie pfhe bata; sidi uko dopuo kedieki nu bata.

⁵Khuzhü puo Ijipt nu kediu hiekepieu mu puo niekhrüda kerieu kedieki nu keba ki, unie mho pema phre mu unie mho kepemau puoca nyi phre.

⁶Siro khise Josef unie ki vor ru, unie thesuosiei keba ngulie.

⁷Sitse puo sie Faro lietho kezhanie kedieki nu puo ze puo niepu-u ki kebanie ki, “Kiüdi thie nnie thesuosiei bata ga?” sishü.

⁸Sitse unie sie puo ki, “Hienie hienie mho si phre, mu miapuorei süko ca pukeshü jü balie” ita. Sitse Josef unie ki, “Mhaca vatshalieyakezha sü Ukepenuopfü vie mo me? Nnie pezie rei süko se a ki pushücie” sishü.

⁹Süla tehiekepie kezhau puo mho pie Josef ki pu di sie, “A mho geinu khubebo puo pema mu khubebo süu geinu puoco se ba.

¹⁰Mu khubebo we par mumetha süko pou rülha parta mu süu phroko geinu khubesi me parlie.

¹¹Mu Faro hieu a dzie nu ba; ru a khubesiko bielie di thepie Faro hie nu shülie, sidi tehieu khapie Faro dzie nu shü” ishü.

¹²Sitse Josef-e sie puo ki, “Süu ca hauwe; puoco sekoe zha se,

¹³mu zha se donu Faro n phou la sieshütuo, mu n khapie n mhatho nu lashütuo, mu no hadzü mhiei di Faro hiekepieu chütatuo.

¹⁴Siro no n gei mha puotou vokelie sie a rükra lashücie, n pezie rei a gei tseiüvishü mu Faro ki a dze pushü di thechü hau nunu a ze parshücie.

¹⁵Kekreilamonyü Ibrimia kijü nunu a rügulieta ketho zo; mu hanu zorei a khapie kedieki nu shü kezhü mhatho puorei a chüwa mo zo” ishü.

¹⁶Siro niekhrüda kerie kezhau rei puoca kelakeshüko u neikecü ngulie tse, puo sie Josef ki, “A rei a mho si; niekhrüda rha se a tsü gei tuo,

¹⁷siro merha pesotho-u nu Faro la niekhrüda kerie neiüko tuo; derei perakoe a tsü gei ketuo merhako nunu süko cü tuolie” ishü.

¹⁸Sitse Josef sie, “Puoca hau we; merha sekoe zha se;

¹⁹hasie zha se donu Faro n geinu n tsüu phouse sietatuo, sidi sei geinu n gouwatuo; mu perako n chü cütuo” sishü.

²⁰Süsie zha se nhie Faro kepenuo zha, süla puo thehe puo chüpie puo liethoko pete tsü, mu puo liethoko pete donu puo hiekepieu mu puo niekhrüda kerieu unie tsü phou sesiershü.

²¹Sidi puo puo hiekepie kezhau kha lapie puo bu tehiekepie chü lata; mu puo tehie khapie Faro dzie nu shü;

²²derei puo niekhrüda kerie kezhau gouwa; Josef puoca pushü unie kiekeshü tuoi di.

²³Sirei tehiekepie kezhau Josef rükracüu monyü puo rükra mota.