Read Angami Naga Keriekitho 41 Bible Online

Keriekitho 41 - Angami Naga bible

Keriekitho 41

¹Siro ciete kenie sie, Faro puo mho geinu Nail rü khieki tha di pema.

²Siro harie, Nail rüu nu mithu thenie par, ngu u neisiei mu luo siro uko tekhrieko donu nha liecü tuo.

³Süsie rei mithu kekrei thenie uko sienu Nail rüu nunu par, ngu vi mo mu wetoi, sidi Nail rüu khie kekreitsa tha.

⁴Sitse ngu vi kemo mu wetoicüko sü ngu u neisiei mu luocü thu thenieko cülieta. Süsie Faro cota.

⁵Süsie puo ze la tsu ru puo mho va kenieu pema la; siru harie telha kre thenie puosi puo tshu mu vicü bo puo geinu par.

⁶Süsie telhakre thenie, puo kelhou suotoi mu niathutsa teikhrie bu he pesotoikecü kro puo la par.

⁷Sitse telhakre kesuo thenieko sü puosi kevi mu zivicü kre thenieko mezulie. Süsie Faro cota. Mu süue puo mho.

⁸Süsie khise vorlie tse puo nou kemezhie bata; süla puo themia ketsepie Ijipt nu meduoyakezha pete mu sünu mhakesi pete kieshü; sidi Faro puo mho pie uko ki pushü, derei miapuorei süu ca vatshapie Faro kieshülie mota.

⁹Sitse Faro hiekepie kezhau Faro ki, “A thie a kejoko rükraliete.

¹⁰Va puo Faro-e puo kituonie gei puo nei mota di niekhrüda kerie kezhau hienie khapie kedie kepfheko kezhau kinu shüwa.

¹¹Mu hienie mho kepema puo zhü pema phre. Puo mu a u mho pemacü ca nyi phre.

¹²Sükisü Ibrimia khriesamia puo hienie ze ba, kedie kepfheko kezhau kituo puo; mu hienie puo ki pushü tse, puo hienie mho ca kelashü hienie tsü, hienie mia puopuo u mho kepemau medzi di vatshashü phre.

¹³Mu puo puoca vatshakeshü tuoi di chüta; a we a kha lapie a mhatho nu shü lashü, derei niekhrüda kerieu we gouwate.”

¹⁴Sitse Faro mia ketsepie Josef kieshü, ru uko rükri kedieki nunu puo ze vorlie, süsie puo puo tiemie thiewa, mu puo pfhenei kedilie di Faro mhodzünu vor.

¹⁵Sitse Faro Josef ki, “A a mho puo pema mu miapuorei süu ca pupie a kielie mote; mu a mia n dze kepu sicü, no mia mho silie ro puoca kelalieya üsi,” ita.

¹⁶Sitse Josef sie Faro ki, “Süusü a Kepenuopfü thuo puotou puo kelapie Faro tsü zotuo” ishü.

¹⁷Süsie Faro Josef ki pu di, “Harie, a mho geinu ae Nail rü khieki tha;

¹⁸sitse mithu keluo mu ngu vicü thenie par; mu uko tekhrie donu nha liecü tuo.

¹⁹Süsie mithu kekrei thenie uko sie la par, lhou pesuo, ngu vi mo mu wetoi zo; a Ijipt kijü pete nu zisuopie sükemhie ngukemo kro puote.

²⁰Sitse mithu kewe kezisuoko sü mithu kerie keluo thenieko cülieta,

²¹derei süko cülieta zorei, miapuorei uko süko cülieta ücü silie kenjü; uko ngupie kerieki mhie di suo phi zocü la. Süsie a cosierta.

²²Süsie a ze la tsu mu, a mho geinu telhabo puo geinu telhakre thenie par, puosi puo tshu mu vi;

²³sitse niathutsa teikhrie bu hekewa kitoicü kre thenie sotoi mu wetoi di kerieko sie par,

²⁴Sitse telhakre kesuoko kevi thenieko mezulie. A süu pie meduoyakezhako ki pushü, derei miapuorei süu vatshapie a kieshülie mote” ishü.

²⁵Sitse Josef Faro ki, “Faro mhoko puo zo; Ukepenuopfü thuo chü vortuoü kebau pie Faro pesishüte.

²⁶Mithu kevi theniekoe teicie theniekote, mu telha kre kevi thenieko cie theniete, n mho-u puo zo.

²⁷Siro mithu kewe mu kezisuo thenieko uko sie keparkoe teicie theniekote, mu niathutsa teikhrie bu hekewa telhakre kemethuo thenieko rei cie thenie zo, süko cie thenie pekrie bataketuoko.

²⁸Süusü a Faro ki pukeshü mhie di, Ukepenuopfü thuo mhachütuoü kebau pie Faro pesishüte.

²⁹Ijipt kijü pete nu cie thenie mhanyi sekecü ngutuo.

³⁰Derei süko sie cie thenie pekrie siertuo, sidi Ijipt mhanyi phi sierkecüko rükra motatuo; pekrieue kijü cülietatuo.

³¹Sidi kijü sünu pekrie kevor la mhanyi phi kevor-u si motatuo, süue re phiketuo la.

³²Süla Faro bu puo mho kepema sie pemakecü süu Ukepenuopfü thuo chüshü mu Kepenuopfü thuo süu chü mhaishütuo.

³³Süla tsie Faro bu themia kemenuo mu mhakesi puo kedalie, sidi puo bu Ijipt kijü nu mha kemeho-u chülie.

³⁴Tsie Faro bu mha kemeho chüketuo la themia kedashülie. Sidi Ijipt nu mhakenyi cie thenieko nu mha ngukelieko za pengou chü di za puo khapie balie.

³⁵Sidi süko bu teicie kevi süko nu kecüca kevorko kengupie Faro khro shülie, di süko bu nadiko nu telha se balie.

³⁶Kecüca süko bu Ijipt nu teicie thenie pekrie vorketuo la kengupie batuo, pekrieu la kijü bu kata molieketuo la.”

³⁷Mharhü hau Faro mu puo kituoko pete u neilie.

³⁸Süla Faro puo kituoko ki, “Úko themia haicü puo ngulie vi me? Ukepenuopfü ruopfüu u nou ketuomia,” ishü.

³⁹Sitse Faro Josef üse, “Ukepenuopfü thuo mha pete pie n pekieshü eru, miapuorei n de, mhale menuo mu mhasikecü ba mowe.

⁴⁰N bu a kiu mhokezha chütuo, mu a themiako pete no ahza khakeshüko se u kelhou kekhatuo; kedibau gei rübei a n ki zhakuocü zotuo” ita.

⁴¹Sidi Faro Josef ki, “Mehocie, a n chüpie Ijipt kijü pete mho shüwate” ita.

⁴²Sidi Faro-e puo dzie nunu puo dziekha zasiu bielie, di pie Josef dzie nu shüwa, di linen pfhe kemese pfhenei pie puo ketsoshü, siro suna cü puo pie puo vo nu shü.

⁴³Süsie puo bu puo gura gari kenieu gei balie, siro mia puo mhodzünu melie di sie, “Koutoulie[78]” si tuota. Sümhie di puoe puo chüpie Ijipt pete mho shüwa.

⁴⁴Süsierei Faro-e Josef ki, “Ae Faro, mu mia puo bu rei n sanyü mo di Ijipt kijü pete nu puo dzie morei puo phi chashülie lho zo” ita.

⁴⁵Siro Faro-e Josef za pie Zafenat-pania chüwa; mu On nu zievo-u Potifera nuopfü Asenat pie puo ki penyishü.

⁴⁶Siro Josef Ijipt nu kediu Faro lie chükelie ki cie serta. Siro Josef Faro mhodzünu nu prata, di Ijipt kijü nu rühou voshü.

⁴⁷Siro mhakenyi cie thenieko nu kijüu gei mha rüchü philie.

⁴⁸Sidi puo Ijipt kijü nunu cie thenieko nu mha ketshukelhuo bakecü ki kecücako kengulie, sidi kecücako kengupie nadiko nu shülie. Puo nadi pete khiera lieko nunu kecüca ngukelie khe se vor nadiko nu shülie.

⁴⁹Siro Josef-e telha kengupie dzükezha nu huoca tuoilie, mu puo süko mejü sa mota, süko phrü hulie kenjüketa la.

⁵⁰Siro pekriekecü teicie vor kemo nu Josef-e puo nuo thepfumia kenie nyilie. On zievo-u nuopfü Asenat geinu penuopie puo tsüshü.

⁵¹Sitse Josef-e puo nuo nuorieu za pie Manasseh[79] chülie; puo sie, “Ukepenuopfüe a bu a mezhieko mu a puo kinuko rükra moketa chükeshü la” ita.

⁵²Siro puo nuo kenieu pie Efraim[80] chülie, “Ukepenuopfüe a kemezhiekecü kijü hau nunu a chü pekruoshüketa la” isi.

⁵³Siro Ijipt kijü nu mhakenyi cie thenieko tseita;

⁵⁴di pekriekecü teicie thenieko vor sedelie, Josef pukeshü tuoi di. Kijü pete nu pekrieta, derei Ijipt kijü nu we kecüca balie.

⁵⁵Siro Ijipt kijü pete nu mhajüta tse, themiako Faro ki kecüca cha, Faro Ijiptmia pete ki, “Josef ki volie, puo nieko ki mha kehoupuo pu shierei süu chüliecie” sita.

⁵⁶Siro kijü pete nu pekrieu bata, sitse Josef telha kiko khrüshü; di Ijiptko ki mha zeshü; Ijipt kijü nu pekrieu re seketa la.

⁵⁷Sizomonyü kijü pete nu telha khrütuoü di Ijipt kijü nu Josef ki vor, kijü pete nu pekrieu re seketa la.