Read Angami Naga Keriekitho 42 Bible Online

Keriekitho 42 - Angami Naga bible

Keriekitho 42

¹Jakob-e Ijipt nu telha baücü sikelie ki, sie puo nuonuoko ki, “Nieko kiüdi huoniehuo meho ba zo ga?” sishü.

²Sidi puo sie, “Ijipt kijü nu telha baücü a sishü ho, nieko sünu tsu di úko la telha khrüliecie, silie ro úko siata molie di rheilietuo” sishü.

³Süla Josef dzürie kerko Ijipt nu telha khrütuoü tsuta.

⁴Derei Jakob-e, Josef siezeu Benjamin ketseshü mo, puoe kemezhiekecü puo gei vorketa keprei la.

⁵Sidi Israel nuonuoko rei mia ketsuko ze tsu, pekrieu Kanan kijü nu baketa la.

⁶Süki Josef-e kijü süu kekha ba; puo bu kijü süu pete la mha zeshü themiako tsücüu chü ba. Sitse Josef dzürieko vor di kijü nerhu tsu di puo kelu.

⁷Josef-e puo dzürieko ngu tse uko silie, derei puoe uko khapie sikemomia kemhie di uko gei diepu mehiemehashü, sidi puo sie uko üse, “Nieko kirapuonu vor ga?” ishü. Sitse uko sie, “Kecüca khrütuoü di Kanan kijü nunu vorwe” si.

⁸Siro Josef puo dzürieko silie derei uko we puo silie mo.

⁹Sitse Josef-e puo uko kepema mho-u rei rükralie mu puoe uko ki, “Nieko mha rieketuo kro puote, kijü kemethuo mehotuoü nieko vorzhie” ishü.

¹⁰Sitse uko puo ki, “Molie, a niepu-u, n kituoko kecüca khrütuoü vorkecü zolie.

¹¹Hieko pete mia puo nuo zo, hieko kediethomia zo, n kituoko mha rieketuomia mo zolie” sita.

¹²Sitse puo uko ki, “Mo zo, nieko kijü kemethuo mehotuoü di vor zo” ilashü.

¹³Sitse uko sie, “Hie, n kituoko mia kerekenie keze siezedzüriemia chü, Kanan kijü nu mia puo nuo; mu harie, hieko donu nhicutho-u hieko puo ze bate, mu mia puo we tuo mote” ishü.

¹⁴Derei Josef-e uko ki, “A nieko ki pukeshü mhiei, nieko mha rieketuo kro puo zolie.

¹⁵Hau geinu nieko dojütuo; Faro rheiketuo tuoi, nieko sieze nhicutho-u ze hanu vor kemosie, nieko bu hanu nu tuo lalie lho.

¹⁶Süla nieko donu mia puo ketseshü di puo bu nieko siezeu ze tsurlie, nieko kekreiko kedieki nu keba ki, nieko dieko ketho mo mo shicü silieketuo la; kemosie Faro rheiketuo tuoi, nieko mha rieketuomia tou zo” ishü.

¹⁷Sidi puo zha se uko pete bu kedieki nu bata.

¹⁸Siro zha se nhie Josef uko ki, “Nieko hau chülie ro rheilietuo, a rei Ukepenuopfü prei ru:

¹⁹Nieko themia kediethomia zo liro nieko mia puo bu kedieki nu balie, mu kekreiko bu we nieko kinu pekrieu la telha toupfü volie.

²⁰Sidi nieko sieze nhicutho-u ze a ki vorlie; siro nie dieko kethocü silietuo, di nieko bu siata molietuo” ishü, sitse uko süu chülie.

²¹Siro uko huoniehuo ki, “Úko sü úko siezeu kitsa jo touta zo, úko puo kemezhiekecü ngu tou zo, puo úko ki puo mezhiemelo ciü, derei úko puo pfhe rünyü mvüte; süla kemezhiekecü hau úko gei vorte” ibata.

²²Siro Reuben sie uko ki, “A nieko ki, unuoyo gei phoumawa hiecie, icü pu mo me? Nieko süsü rünyü mvüta die? Süla tsie puo zie ma chüshü morokesuo vorte,” ita.

²³Ukoe Josef üse uko die siü ba mo; uko donu mia bu uko die kelashü tha zocü la.

²⁴Sitse puo uko kinu rürei mharapuo vo di krata. Süsie puo rürei uko ki la vor di uko rüchü. Sidi uko mhodzünu Simeon zelie di puo phalieta.

²⁵Siro Josef-e mia bu uko vie bouko nu telha pie tshushülienushü, mu uko kehoupuo pie nu rei raka kha lashüwanu, siro cha nu uko la kecüca rei khashünu puo die khashü, mu sükemhie chüpie uko tsüshü.

²⁶Süsie uko telhako pie gadako pie dalie di tuota.

²⁷Siro uko rüleichü nu mia puo gada ca khashütuoü di puo pieu phreikeshü ki raka puo tie nu tuo di ngulie.

²⁸Sitse puo puo dzürieko ki, “A raka kha lashülie, mu süu a nhoutie nu tuolie!” si. Sitse uko melou suota. Sidi uko pe di sie huoniehuo ki, “Ukepenuopfü mha kikecüpuo chüpie úko gei shü bata ga?” ibata.

²⁹Süsie uko Kanan kijü nu uko puou ki vorkelie ki, uko gei mhachüketa pu di sie,

³⁰“Themiau, kijü sünu niepu-u, hieko rüchücü mehie se zo, mu hieko üse rünau rieketuo kro puo üta.

³¹Derei hieko puo ki, ‘Hie kediethomia zo, mu hie mha rieketuomia mo zo.

³²Hieko puo nuonuo kechü mia kerekenie ru; puo we tuo mote, mu thie hieko donu nhicutho-u Kanan kijü nu hieko puo ze bate’ sishü.

³³Sitse themiau, kijü niepu-u hieko ki, ‘Hageinu nieko themia kediethomia ücü silietuo; nieko mia puo bu a ze batalie, mu nie kinu pekrieu la telha toupfü di nie cha nu volie.

³⁴Nieko sieze nhicutho-u ze a ki vorlie; sitse nieko mha rieketuomia mo mu kediethomia zocü a silietuo; silie ro a nieko siezeu kha lashü nieko tsütuo, sidi nieko bu kijü hau nu thelhi chülietuo’ ” isitelie.

³⁵Süsie uko uko nhou kemethuo sie tse, harie uko raka dzeko uko nhou nu tuo phre di ngulie, mu uko mu uko puou rei uko raka dzeko ngu lakelie la michie phita.

³⁶Sitse uko puo Jakob uko ki, “Nieko thuo a nuonuoko pejüwa bate. Josef tuo mote, Simeon tuo mote, mu tsierei nieko Benjamin ze latatuoüte; mha hako pete a gei vorte” ibata.

³⁷Sitse Reuben sie puo puo ki, “A puo ze la n ki vorshü motaü ro n thuo a nuo thepfunie dukhriwalie, puo pie a peleshüliecie, a puo ze vor n ki shü lawa zotuo” ita.

³⁸Derei puo sie, “A nuo bu nieko ze tsulie lho zo, puo dzürieu siate mu puo rübei zote ru. Nieko kevocha nu kemezhiekecü puo gei vorketa sie, nieko thuo a chüpie a bu tsüpou mu nousuo sa di Sheol nu tsu zotie ru” ita.