Read Angami Naga Keriekitho 43 Bible Online

Keriekitho 43 - Angami Naga bible

Keriekitho 43

¹Kijü nu pekrieu re seta.

²Süsie uko Ijipt kijü nunu telha pfü kevorko cü thelieta tse, uko puo uko ki, “La vo di úko la kecüca huoyo khrü lalie” ita.

³Derei Juda sie puo ki, “Themiau puo thochü di hieko ki pukecü, ‘Nieko siezeu bu nieko ze vor kemosie, nieko bu a zie ngulie lhote,’ isilie.

⁴No hieko siezeu ketsepie hieko ze tsutuoü ro hieko tsu di n la kecüca khrülietuo;

⁵derei no puo ketseshü kemosie, hieko tsulie lho zo; themiau hieko ki, ‘Nieko siezeu nieko zetuo kemosie, nieko a zie ngu salie lho’ ita zeru” sishü.

⁶Sitse Israel sie, “Kiüdi nieko a gei haikecü chüshü mu! themiau ki nieko siezemia puo ba saluoü di pukeshü ha?” ita.

⁷Uko sie, “Themiau hieko mu hieko seyieko dzeko ketso menuo sete, sidi sie, ‘Nieko puo rhei baluo me? Nieko siezemia puo baluo me?’ itelie. Hieko pukeshüko sü puo hieko ketsokeshüko kelakeshü zo, hieko rei puo hieko ki, ‘Nieko siezeu ze tsurliecie’ itaketuo si tuocüpuo memu?” ishü.

⁸Sidi Juda sie puo puo Israel ki, “Unuoyo ketsepie a ze vo zocie, sitse hieko sielie di tuolietuo, sitse úko siata mo di rheilietuo, no mu hieko mu hieko nuonuoko rei.

⁹A thuo puo la thepieu pfülietuo; sidi lau pie a tsü gei shülie. Mhanuü a puo ze la vor n kishü mo mu puo kha n mhodzünu shü mota ro, a bu kejo-u pfü sei tuotalie.

¹⁰Hieko bu gepfü hai bata mocüwe, hieko va kenieu rei la vorlietatieciü” sita.

¹¹Sitse uko puo Israel uko ki, “Süu chü zotuoü liro, hau chüliecie; nieko likhuoko nu nhasi u kijü nu vie kevitho huo chüpfülie, mu süko pie themiau tsüketuo la se tuolie, kenhekecü daru huoyo, mu mepfhidzü huoyo, ketsa, leitsa, pistakio nhasipfü mu almond.

¹²Siro raka hadzü de kenie selie, mu nieko raka la lapie nie nhouko nu shükeshüko se lalie; süu mha ngu mokewa puo zo nhiemu.

¹³Nieko siezeu rei zelie, sielie di themiau ki la tsucie;

¹⁴Kuokejokejü Ukepenuopfü bu themiau mhodzünu ngukemezhie kha nieko tsükelieu chücie, sidi puo bu nieko dzürie kekreiu mu Benjamin ketse lashülietuo. A la zowe a bu a nuonuoko krükra tuotuoü liro, a thekrü chütuo zotie mu” ita.

¹⁵Sidi themiako mha kha mia tsüketuo selie mu uko raka seketuo de kenie, siro Benjamin sa zelie, sidi uko Ijipt nu tsu Josef mhodzü thalie.

¹⁶Siro Josef-e Benjamin uko zeketuo ngu tse, puo kinu mha kemeho-u ki, “Themiako ze kinu vorlie; mu khunuo dukhrilie di mha keselie; themiako bu thie a ze mhacüketuo la” ishü.

¹⁷Sitse themiau Josef pukeshü mhie chülie; sidi themiako ze Josef kinu vorlie.

¹⁸Sitse themiako michieta, uko ze Josef kinu vorketa la, süla uko sie, “Hau sü kerieu va raka kha lapie úko nhou nu keshü la úko ze vor hanu shüte; puo puotei hau nu úko petsou di úko gei phirtuoüzhie, úko tepie puo diemia chülie mu úko gadako rei sa pielietuoüzhie” ita.

¹⁹Sidi uko Josef kinu kemeho-u ki vor di kicie kinu puo rüchü di sie,

²⁰“He-i a niepu-u, hieko kerieu va kecüca khrütuoü di tsur;

²¹sitse hieko kerüleichü nu vorlie di hieko nhouko phrei sie ru, hieko peteko nhoutie nu raka u vieu tuo di ngu lalie, hieko raka pete. Süla hieko süko se la tuowe.

²²Siro raka kekrei rei kecüca khrüketuo la hieko dzie nu se tsur ba. Supuonie raka khapie hieko nhouko nu shü shi hieko si mo zolie” ita.

²³Sitse puoe uko die kela di sie, “Mhapuorei mo, mu michieta hie, nieko Ukepenuopfü mu nieko puou Kepenuopfü thuo kinyi kha nieko nhouko nu shümu sü, a nieko raka nguliete” sishü. Süsie puoe Simeon ze uko ki vorshü.

²⁴Siro mhakemeho-u[81] themiako ze Josef kinu vorlie, di dzü kha uko tsüshü, sitse uko uko phi khrüwa; siro puo rügu pie uko gadako tsükewa sie,

²⁵siro Josef vor ro uko mha pie puo tsütuoü seketuoko khashüketuo la keselie, uko sünu nu mhacütuoü keba sikelie la.

²⁶Josef puo kinu vorlie tse, uko mha pie puo tsütuoü se ketuoko pie vor, di kijü nerhu tsu puo kelu.

²⁷Siro puo uko dze ketso di sie, “Nieko puou vi ba nhie, nieko puo dze pukeshü ketsau? Puo tsierei rhei ba zo nhie?” sishü.

²⁸Uko sie, “N kituou, hieko puou shürho ba mu rhei ba zo” si. Sidi uko nuketsu puo kelu.

²⁹Siro puo tosie puo siezeu Benjamin, puo zuo nuou ngulie, di sie, “Hau nieko sieze nhicutho-u nieko a ki puo dze pu kebau me? A nuo, Ukepenuopfü bu n ngumezhieshücie” ishü.

³⁰Sidi Josef rükri tuota, puo noue puo siezeu mengu phiketa la, mu puo kra partatuoü thaketa la. Sidi puo puo kibou puo nu le di sünu nu kra bata.

³¹Süsie puo puo zie tshuwa di la par; sidi puo thuo puo kethelie di sie, “Kecüca keseshülie;” ishü.

³²Siro puo la krei, uko la krei, mu Ijiptmiako uko ze mhacüketuoko la krei idi mha keseshü; kekreilamonyü Ijiptmia Ibrimia ze mhacüya mo, süue Ijiptmia la mha kerütsetho puo zocü la.

³³Sidi uko puo mhodzünu balie, nuorieu, puo phichüzhau medzi mu nhicutho-u nhicuzhau medzi idi; mu themiako huoniehuo meho di u ngo bata.

³⁴Siro Josef mizhüu geinu uko khouko chüpie zashü, derei Benjamin khouka we kekreiko mia puo khouka de pengou. Siro uko mhacümhakrielie, di puo ze u neilie.