Read Angami Naga Keriekitho 44 Bible Online

Keriekitho 44 - Angami Naga bible

Keriekitho 44

¹Süsie puo puo ki kemeho-u ki pu di, “Kecüca uko pfülie kevichie pie uko nhou nu pelishücie, mu mia puopuo raka pie puo nhoutie nu shü lashülie.

²Sidi a hie, rakachü hieu, pie nhicutho-u nhoutie nu, puo lha mako sa di chüshülie” si. Sitse puo Josef pukeshü tuoi chüshü.

³Siro teiso parlie mumetha, themiako mu gadako ketsewa.

⁴Siro uko tuota derei nadiu ze kepetseta kemo nu, Josef-e puo kinu kemeho-u ki, “Sielie, di themiako medzi vocie, mu no uko tsolie tse, uko ki, ‘Kiüdi mha kesuo pie kevi zhada vü ga? Kiüdi a rakachü hieu rügulieta ga?

⁵Hanu nu a niepuu mha krieya mu puo süu geinu mhaca silieyakezhau mo me? Nieko haikecü mha kesuo chüte,’ ishüliecie” si.

⁶Siro puo uko tsokelie ki, die hako pie uko ki pushü.

⁷Uko sie puo ki, “Kiüdi a niepuu die hikecü puta ga? Mha hahikecü bu n kituoko penuo rei suotuo!

⁸Harie, raka hieko nhoutie nunu ngukelieko rei se la vor Kanan kijü nu n tsüshü ze, di siro hieko kiüdi a niepuu kinu rakachü morei suna rügu ta?

⁹N kituoko kehoupuo geinu rei ngukelieu bu siatalie, mu hieko rei a niepuu diemia chütatuo” ita.

¹⁰Puo sie, “Nieko kepu mhie chüliecie; puo geinu ngukelieu bu a diemia chütatuo mu kekreiko we khashüwatuo” si.

¹¹Sitse uko peteko rei rükri sie u pie lhoupie kijü shülie, di u nhou-u phrei phreshü.

¹²Sitse puo phichütho-u nunu sede di nhicutho-u pie puo thela chü di uko lha; sitse tehieu Benjamin nhou nunu ngulieta.

¹³Sitse uko uko pfheneiko cierhata, mu themia peteko rei gada pie dalie di nadiu nu rürei la vor.

¹⁴Juda mu puo siezedzürieko keze Josef kinu la vor, ru puo süki ba zo; sitse uko puo mhodzünu nu te kijü tsuta.

¹⁵Sitse Josef uko ki, “Nieko mhatho kikecü puo chüwata ga? Niekoe a kemhiemia mhaca silieyaücü si mo me?” ishü.

¹⁶Sitse Juda sie, “Hieko kedipuo se a niepuu rüchü ta? Hieko kedipuo pu ta? Morei kedipuomhie di hieko thuo hieko chü kemesalie ta? Ukepenuopfü thuo n kituoko kejo nguliete; harie hieko pete a niepuu diemia chüte, hieko mu puo dzie nunu tehieu ngukelieu rei sa” si.

¹⁷Derei puo sie, “A bu sikecü chü mo zolie! Themia puo dzie nunu tehie ngukelieu rübei bu a diemia chütuo; derei nieko we nieko nou mene di nieko puo ki khotalie” sita.

¹⁸Sitse Juda puo ki vor di sie, “He-i, a niepuu, n kituou bu dieca puo pupie n nyie nu shünu di a n ki chaya, mu n nouyie bu n kituou gei bata hiecie, no sü Faro mhie zeru.

¹⁹A niepuu puo kituoko ketso di sie, ‘Nieko puo morei nieko siezemia ba me?’ ite.

²⁰Süla hieko a niepuu ki, ‘Hieko puo ketsamia puo mu puo tsa zenu ngukelie nuoyo, hieko siezeu baluowe; puo dzürieu siate, mu puo zuo nuo puo rübei keba zote; mu puo puoe puo khrieya’ ishüe.

²¹Sitse no n kituoko ki, ‘Puo ze a ki tsurcie, a bu a mhi pie puo ngushüketuo la’ si.

²²Sitse hieko a niepuu ki, ‘Unuoyo puo puo tsetalie kenjülie; puo puo puo khakeshü sie siatatuo mu’ si.

²³Süsie no n kituoko ki, ‘Nieko siezeu ze tsur kemosie nieko a zie ngu salie lhote’ ite.

²⁴Sitse hie n kituou a puou ki vokelie ki, a niepuu dieko se puo ki pushü.

²⁵Siro hie puo, ‘La vo di kecüca huoyo khrü lalie’ idi kepu ki,

²⁶hieko sie, ‘Hieko tuolie kenjüte, hieko sieze nhicutho-u bu hieko ze tsutuoü ro, hieko tsulietuo, hieko sieze nhicutho-u ze tsu kemosie themiau zie ngulie lhoketa la’ ishü.

²⁷Sitse n kituou hieko puo hie ki, ‘A kimia nuo kenie penuoshü a ketsü nieko si ba;

²⁸siru mia puo a khawate, mu a puya, puo ciechücierhawata mecie zo; a puo ngu laya mo zote ru.

²⁹Siro nieko hayo rei a kinu zeta, di kemezhiekecü puo gei vota ro, nieko a bu nousuo mu tsüpou ze Sheol nu tsu zotie’ ilie.

³⁰Süla tsie, n kituou a puo ki vocü ki, unuoyo hieko ze tuo mota liro, puo kerheiro unuoyo kerheiro gei bata zo.

³¹Puo unuoyo hieko ze tuo moketa ngucü sie puo siata zotuo; siliro n kituoko, kituou hieko puo, puo tsüpou bu nousuo sa di khapie Sheol nu shüwatie.

³²N kituou, unuoyo la thepieu pfülietuoü a puo ki pu di sie, ‘A puo ze n kinu la vorshü mota ro, kechachie a puo mhodzünu kejo-u pfü tuotatuo’ iwate.

³³Süla tsie, a n ki chaya, n kituou bu unuoyo sou nu a niepuu die chü batalie; sidi unuoyo bu puo dzürieko ze la votacie.

³⁴Unuoyo a ze tuo mo ro, a bu kedipuo mhie di a puo ki la volie ta? A puo gei kemezhiekecü vorketa ngucü preilie” sishü.