Read Angami Naga Keriekitho 45 Bible Online

Keriekitho 45 - Angami Naga bible

Keriekitho 45

¹Sitse Josef puo khieki kethako mhodzünu puo kethe salie kenjüta, süla puo pfhephra peto sie di, “Themia kehoupuorei a ki nu tuotaliecie” ishü. Süla Josef-e puo siezedzürieko bu puo sikelie ki miapuorei puo ze tha mota.

²Sidi puo kra khouta, süla Ijiptmiako süu si, mu Faro kinuko pete süu si.

³Sitse Josef sie puo siezedzürieko ki, “A Josef zowe, a puo rhei baluo le?” ishü. Derei puo dzürieko puo pfhekholie kenjüta, uko puo khieki ketha ha u nou kehoukeruo chütacü la.

⁴Sitse Josef puo dzürieko ki, “A penuo vorliecie” si. Sitse uko puo penuo vorlie. Sitse puo uko ki, “A nieko siezeu Josef zolie, nieko puo zepie Ijipt nu shükewau.

⁵Mu tsie nieko nou suota hie, morei nie thuo nie ngupie nie noumeyie rei hie, nieko a zepie hanu shükewa la. Kepenuopfü thuo nieko mhodzü a ketseshüwate, kerheiro kelalieketuo la.

⁶Kijü nu teicie kenie pekrie vorte; mu tsierei cie pengou ba saluo, süko nu liecie morei liekere rei balie lho.

⁷Süla Ukepenuopfüe a bu kijüu gei nieko la peshapie keba kro puo pekrupie balieketuo la themia kekra perheishütuoü di nieko mhodzü a ketseshüwate.

⁸Süla nieko a ketsepie hanu shü monyü, Ukepenuopfü thuota zo; sidi puo a bu Faro krü puo chüshüte, siro puo kinu niepu chü mu Ijipt kijü pete mho kekhakezhau chü bate.

⁹Nieko rükri a puo ki kholie, di puo ki pushücie, ‘N nuou Josef haikecü puyawe, Ukepenuopfü a chüpie Ijipt kijü pete mho niepuu chüwate; a kinu tsurtalie, ge ba hie.

¹⁰N bu Goshen kijü nu lhoutatuo, n bu a penuo tuotatuo, no mu n nuonuoko, tsiu n nuonuoko nuonuoko rei, n kuoko, n thu kroko, mu n vie ketuo pete.

¹¹Siro sünu no se morokesuoko a kha n tsütuo, tsierei cie pengou pekrie satuoluocü la; no mu n kinuko, tsiu n vie ketuoko bu tsopfhütalie lho,’ sishülie.

¹²Mu tsie nieko mhi mu a siezeu Benjamin mhi-e a thuo diepu ketha ngushüte.

¹³Siro nieko a puou ki a Ijipt nu therhupfü phi baketa mu nieko kengu pete pushü morosuo bei zo. Rükrilie di a puo ze hanu tsurliecie.”

¹⁴Sidi puoe puo siezeu Benjamin vo ciepielie di krata; mu Benjamin rei puo geinu krata.

¹⁵Süsie puo puo dzürieko pete meboshü di uko geinu krata; süsienu puo dzürieko puo rüchü.

¹⁶Siro, “Josef dzürieko vorwe” icü die Faro kinu si kevo ki, Faro mu puo kituoko u nei phita.

¹⁷Sitse Faro Josef ki, “N dzürieko ki pushücie, ‘Hau chülie; nieko khunuoko pie dalie di tuo Kanan kijü nu la volie;

¹⁸sidi nieko puo mu nie kinuko zelie, di a ki vorlie, siro a Ijipt nu kijü kevitho-u kha nieko tsütuo, mu nieko bu kijü kevitho-u siko cütuo’ si.

¹⁹Uko ki hau rei pu sashülie, ‘Hau chülie, nie nuonuo kecüko mu nie nupfünuoko la, Ijipt nu gariko selie, mu nieko puo zelie di vorlie.

²⁰Siro nie nyako la mhapuorei nie nounyü hie. Ijipt nu kijü kevitho-u sü nieko vie zoketuo la’ sishülie” sita.

²¹Sitse Israel nuonuoko sükemhie chülie; siro Faro die khakeshü tuoi Josef-e gariko khapie uko tsüshü, mu uko rüve la se morokesuo kecüca rei kha uko tsüshü.

²²Siro puoe pfhenei thulilieketuo pie uko tsü phreshü; derei puo raka shekel krie se, mu pfhenei thuli pengou pie Benjamin tsü.

²³Siro puo puo la mha hako ketseshü; Ijipt nu mhanya keviko pie u pie dakepfü gada ker, siro puo puo bu rüvecha nu seketuo la, telha, niekhrüda mu se morokesuo cako mu puo pie dakepfü gadakrü ker.

²⁴Sidi puo dzürieko bu tuota, mu uko tuotakezhü ki, puo uko üse, “Cha nu kegei tuo suo ho” ishü.

²⁵Sidi uko Ijipt nunu tuota, mu Kanan kijü nu uko puo Jakob ki la vorlie.

²⁶Sitse uko puo ki, “Josef tsierei rhei ba zo, mu puo Ijipt kijü pete mho kekhayakezhau chü sa bate,” ishü. Sitse puo puo ngothorta, puo uko pelelie kenjüta.

²⁷Derei uko Josef uko ki pukeshü die pete pie puo ki pukeshü ki, mu Josef-e puo pfüketuo la gari ketsekeshüko ngukelie ki, uko puo Jakob puo nou rhei la vorlie.

²⁸Sidi Israel-e sie, “Tseite, a nuo Josef tsierei rhei keba sü; a siaketa mhodzü vo puo ngutuo” ita.