Read Angami Naga Keriekitho 46 Bible Online

Keriekitho 46 - Angami Naga bible

Keriekitho 46

¹Sidi Israel puo vie ketuo pete selie di rüve sedeshü, sidi Beer-sheba nu vorkelie ki, sünu nu ruosuo chüpie puo puo Isak Kepenuopfü tsü.

²Mu Ukepenuopfü süzhü puo mho geinu puo rüchü di sie, “Jakob, Jakob,” si, sitse puo sie “A haki bawe,” ishü.

³Sitse puoe “Ae Kepenuopfü, n puou Kepenuopfü zo; Ijipt nu tsu michie hiecie; a sünu n chüpie seyie kezha puo chüshütuo.

⁴A thuo n ze Ijipt nu tsutuo, mu n ze la vorshü zotuo; siro Josef bu puo dzie pie n mhinie kegushütuo” si.

⁵Süsie Jakob-e Beer-sheba nunu tuoshü; Israel nuonuokoe, uko puo Jakob nuonuo kecüko, mu u nupfünuoko bu Faro ketsekeshü gariko gei tuolie.

⁶Süsie rei uko kirinuoko, mu uko vienya Kanan nunu ngukelie pete selie di Ijipt nu vorlie, Jakob mu puo zeketuo puo nuosenuoyie pete.

⁷Puo nuo thepfuko mu uko nuonuo thepfuko, puo nuo thenuko mu puo nuonuoko nuonuo thenumia puo zeketuo pete mu puosepuoyie peteko ze Ijipt nu vorta.

⁸Siro hako Israel nuosenuoyieko Jakob mu puo nuosenuoyie Ijipt nu kevorko za: Reuben Jakob nuorieu,

⁹mu Reuben nuonuoko: Hanok, Palu, Hezron, mu Karmi.

¹⁰Simeon nuonuoko: Jemuel, Ohad, Jakin, Zohar mu Kananpfü nuo Shaul.

¹¹Levi nuonuoko: Gershon, Kohat mu Merari.

¹²Juda nuonuoko: Er, Onan, Shela, Perez mu Zera (derei Er mu Onan unie Kanan nunu siata); siro Perez nuonie ro Hezron mu Hamul.

¹³Isakar nuonuoko: Tola, Puva, Jashub[82] mu Shimron.

¹⁴Zebulun nuonuoko: Sered, Elon mu Jahlil.

¹⁵(Hako Leah nuonuoko, Pedan-aram nunu penuoshü Jakob ketsüko mu puo nuopfü Dina rei sa; puo nuonuo thepfuko mu thenuko pete kesa mia serese).

¹⁶Gad nuonuoko: Zifion, Hagi, Shuni, Ezbon, Eri, Arodi mu Areli.

¹⁷Asher nuonuoko: Imna, Ishva, Ishvi, Beria mu uko üpfü Sera. Siro Beria nuonie: Heber mu Malkiel.

¹⁸(Hako Laban-e khapie puo nuopfü Leah ketsüpfü Zilpa nuonuoko, puoe hako penuoshü Jakob tsü, mia keresorou.)

¹⁹Jakob kimiapfü Rachel nuonie: Josef mu Benjamin.

²⁰Siro Ijipt kijü nunu penuoshü Josef ketsünie liro Manasseh mu Efraim, On nu zievo-u Potifera nuopfü Asenat geinu penuoshü puo tsü.

²¹Siro Benjamin nuonuoko: Bela, Beker, Ashbel, Gera, Naman, Ehi, Rosh, Mupim, Hupim mu Ard.

²²(Hako Rachel geinu penuoshü Jakob ketsüko pete kesa mia keredia.)

²³Siro Dan nuou: Hashum[83].

²⁴Naftali nuonuoko: Jahzil, Guni, Jezer mu Shilem.

²⁵(Hako Bilha, Laban-e khapie puo nuopfü ketsüpfü nuonuoko mu puo hako penuoshü Jakob tsü. Pete kesa mia thenie.)

²⁶Siro hako pete Jakob ze Ijipt nu vor, puo geinu lhou keparko. Mu Jakob nuoko nupfünuo sa kemo, uko mia hiesorouesorou;

²⁷Tsiu Ijipt nunu penuoshü Josef ketsü mia kenie: Jakob kinumia Ijipt nu kevorko pete kesa mia hiethenie.

²⁸Siro Israel-e Juda bu rie Josef ki tsu, puo bu puo mhodzü Goshen nu kevo chau thashü puo kielieketuo la; sidi uko Goshen kijü nu vorlie.

²⁹Mu Josef-e puo gura gari keselie di Goshen nu vo puo puo ze kese; sidi puo thuo puo ze kese mu puo puo vo ciepielie di puotei huo puo puo bouka geinu kra bata.

³⁰Sitse Israel sü Josef ki, “Tsiewe a siata rei vite, a thuo n zie ngu di no rhei tuo zocü siliete eru” sita.

³¹Sitse Josef puo dzürieko mu puo puo kinuko ki, “A vo di Faro ki putuo, mu puo ki, ‘A dzürieko mu a puo kinuko, Kanan nu ketuoko a ki vorte.

³²Mu uko tekuo kepfhemia zo, ukoe khurinuo keperimia zolie; tsiu uko kuo kroko, u thu kroko mu u vie ketuo pete se vorte,’ idi pushütuo” si.

³³“Siro Faro nieko kie di, ‘Nieko kedipuo kechümia ga?’ iro.

³⁴Niekoe sie, ‘N kituokoe hie nhicu nunu tsie ketso perinuo keperimia zo, hieko mu hieko puonuoko rei’ iliecie, nieko bu Goshen kijü nu lhou balieketuo la; tekuo kepfhemia kehoupuorei Ijiptmia mhodzünu we kerütsekecümia zocü la” si.