Read Angami Naga Keriekitho 47 Bible Online

Keriekitho 47 - Angami Naga bible

Keriekitho 47

¹Sidi Josef-e Faro ki vo di puo ki, “A puo mu a siezedzürieko, uko kuo kroko mu u thu kroko, siro u vie ketuo kheko se di Kanan kijü nunu vorte, uko tsie Goshen kijü nu bate” ishü.

²Mu puoe puo dzürieko mia pengou ze Faro ki vor.

³Sitse Faro puo dzürieko ki, “Nieko kedipuo kechümia ga?” isi. Ru uko Faro ki, “Hieko puonuoko mhiei di, hieko n kituoko tekuo kepfhemialie” ishü.

⁴Sidi uko Faro ki, “Hieko rüsomia chü di kijü hau nu lhoutuoü vorlie; Kanan nu pekrieu re seketa la n kituoko kuoko la nha jüte süla tsie, hieko n ki chaya, n kituoko bu Goshen kijü nu lhoutacümu” sishü.

⁵Sitse Faro Josef ki, “N puo mu n siezedzürieko n ki vorte.

⁶Ijipt kijü sü n mhodzünu zhü ze, n puo mu n siezedzürieko bu kijü kevithora lhoulie: uko bu Goshen kijü nu lhouliecie; mu no uko donu chülie kesümia huo si ba ro, uko bu a riko kemeho chülie” isi.

⁷Sitse Josef puo puo Jakob ze Faro ki ler, ru Jakob jashü Faro tsü.

⁸Sitse Faro Jakob ki, “N kelhouzha cie kitsuota ga?” si.

⁹Sitse Jakob Faro ki, “Kijü hanu a rüve kevor teicieko krie puo di ser tewe; a kelhou teicieko kra mo mu lhou re se zo, süko se a puonuoko kijü hanu rüve kevor teicieko ze kemejülie sü mo” sishü.

¹⁰Sidi Jakob japie Faro tsüshü, di Faro mhodzünu nu prata.

¹¹Sitse Josef-e puo puo mu puo siezedzürieko bu lhou balieketuo chüshüwa. Ijipt nu kijü uko ya khapie uko tsüshü di Ramese kijü nu, kijü kevitho-u, Faro pukeshü kemhie.

¹²Siro Josef-e puo puo, puo siezedzürieko mu puo kinuko pete u kinuko tsüphrü medzi di kecüca uko se morokesuo le di pie uko tsüshü.

¹³Siro kijü pete nu kecüca puo rei jüta, pekrieu rethorketa la. Pekrie la Ijipt mu Kanan kijü kemezhie phita.

¹⁴Siro pekrie la Ijipt mu Kanan kijü nu telha khrükecü nunu shükeiraka pete Josef dzienu lerta, mu Josef shükeirakako se Faro ki vorshü.

¹⁵Siro Ijipt kijü nu mu Kanan kijü nu raka ketsi thewa tse, Ijiptmia peteko Josef ki vor di sie, “Kecüca kha hieko tsücie, kiüdi hie bu n mhingu kinu siatatuo mu? Hie rakako ketsi tseiwate” ita.

¹⁶Sitse Josef sie, “Nie khurinuoko khashülie, sitse a kecüca pie nie khurinuoko ze kelilietuo, nie raka jütacü sie,” sishü.

¹⁷Süla uko khurinuoko se vor Josef tsü, sitse Josef-e kecüca üse gurako, gadako mu tekuo kroko ze kelilie; sidi süciesü puo uko khurinuoko la kecüca pie uko tsü di uko va chüshülie.

¹⁸Siro teicie süu tseita tse, süsie cie rei uko puo ki la vor, di puo ki, “Hieko raka pete ketsiwaketa se a niepuu ki kevielie lho; siro hie riko a niepuu vieta zo; tsiewe hiechühiemo mu hie kijüko zo kemosie mhapuorei a niepuu mhodzü peshapie ba mote.

¹⁹Kiüdi hie bu n mhi kinu siatatuo mu, hie rei mu hie kijü rei? Kecüca pie hie rei mu hie kijü rei khrülietacie, sitse hie kijü ze hieko rei Faro diemia chütatuo; siro tsia khashü hie tsücie, sitse hieko rheilietuo mu siata molietuo, tsiu kijüu bu rei khakewa kijü chüta molietuo” sishü

²⁰Süla Josef-e Faro la Ijipt kijü pete khrüwa; Ijiptmia pete u lieko ze phrewaketa la, kekreilamonyü pekrieu rethorketa la. Sidi kijüu Faro vie chüta;

²¹mu puoe themiako rei chüpie miadiemia chüwata,[84] sidi Ijipt kijü latsatie puo nunu vo kekreitsa ketso siwata.

²²Puoe zievoko kijü rübei khrü kemo zo; zievokoe Faro kinu methuo ngulieyacü la, sidi Faro kha uko ketsü se di lhouya; süla ukoe uko kijü zewa mo.

²³Süsie Josef themiako ki, “Harie, a thie Faro la nieko mu nieko kijüu khrüliete. Nieko tsia hako pielie di, kijüu nu cieshüliecie.

²⁴Sidi lie kere teiki, niekoe za pengou za puo khapie Faro tsütuo, mu za dia bu nie vie chütuo, se nie tsia chülieketuo la, kecüca la, mu nie kiriko la, tsiu nie nuonuoko kecüca la” sishü.

²⁵Sitse uko sie, “No hieko kerheiro kelashüte, hieko bu a niepuu nei chülie thienyü, siro hie Faro diemia chütatuo” sita.

²⁶Siro Josef-e Ijipt kijüu la thezho puo chüshüwa, mu thie ketso rei süu tuo zo, Faro bu za pengou za puou lieketuo; zievoko kijü rübei Faro vie chü kemo zo.

²⁷Haidi Israel-e Ijipt kijü nu lhouta, Goshen kijü nu, sidi sünu nu uko ya nyilie, mu kruolie di kra philieta.

²⁸Siro Jakob-e Ijipt kijü nu cie kerethenie lhoulie, puo kelhou teicieko krie puo di hiediaethenie.

²⁹Siro Israel siataketuo tei penuo vorta tse, puoe puo nuou Josef kielie di puo ki, “A tsie n kengu ki n khrie pfülieta üro, n dzie pie a do khro shüshücie, di a gei tseiüvi mu diethoshütuoü phrashücie. Ijipt nunu a khru hie zocie.

³⁰Derei a a puonuoko ze zhü tsuta tse, Ijipt nunu a toupie vo uko kekhruchü nunu a khruwacie” ita. Süla puo sie, “A n kepu kemhie chüshütuo” ishü.

³¹Siro puo sie, “A ki rüseshüwalie” si; ru puo rei rüseshüwa. Süsie Israel-e nuketsu puo zhüu gei krapfü bata.