Read Angami Naga Keriekitho 48 Bible Online

Keriekitho 48 - Angami Naga bible

Keriekitho 48

¹Siro mha hako sie, mia Josef ki, “Harie n puo suo bate” ishü; süla Josef-e puo nuonie Manasseh mu Efraim zelie di vo.

²Siro mia Jakob ki, “N nuou Josef n ki vorzhie” ishü; sitse puo thuo puo rhiechü sie puo zhü gei balie.

³Sidi Jakob sie Josef ki, “Kuokejokejü Ukepenuopfüe[85] Kanan kijü nu Luz nunu a pengushü di japie a tsü.

⁴Sidi a ki, ‘A n chü pekruoshütuo mu n chü pekrashütuo, mu a n chüpie themia seyie kro puo chüshütuo, siro a kechachie la kijü hau khapie n nuosenuoyieko tsüshütuo,’ sishü.

⁵Mu tsie n nuonie, a Ijipt nu ketsur mhodzü penuoshü n ketsünie bu a vie chütatuo; Efraim mu Manasseh rei Reuben mu Simeon unie kemhie, a vie chütuo.

⁶Siro unie sie nu penuokelie nuonuoko ro n vie chütuo, siro thekatsatie la unie zapie unie siezedzürieko za sa thutuo.

⁷Kekreilamonyü a Padan nunu kevor ki, Kanan kijü nu, cha nunu Rachel siate, Efrat nu voketuo dopuo baluocü nu; sidi a bu Efrat nu kevocha nunu puo khruwate ru” (süu Bethlehem ücüu).

⁸Siro Israel Josef nuonie ngu tse, “Harie, suomia ga?” ita.

⁹Sitse Josef-e puo ki, “Unie-e Ukepenuopfü hanu nu khapie a ketsü a nuonielie” ishü. Sitse puo sie, “N pezie rei unie ze a ki vorcie, sidi a bu jashü unie tsücie” ita.

¹⁰Israel tsaketa la puo mhinie rei merüta di mhangu kemecielieya mota, süla Josef unie ze puo ki phishü; sitse puo unie meboshü di unie ciepielie.

¹¹Süsie Israel Josef ki, “A n zie rei nguketuo le tuo mota zo; ru harie, Ukepenuopfü a bu n nuonuo rei sa nguwate” ita.

¹²Süsie Josef-e puo puo khoudzanie donu nu unie ze parlie, di puo thuo tsu kijü zerepfü zhüta.

¹³Süsie Josef-e unie kenienie teshülie, puo dzie puo zatsa pie Efraim merhashü di Israel vitsa va, mu puo vitsa üse Manasseh merhashü di Israel zatsa va, sidi unie ze penuo phishü.

¹⁴Derei Israel puo dzie puo zatsa yhapie Efraim tsü gei shülie, süu nhicuu mu puo dzie puo vitsa pie Manasseh tsü gei shülie puo dzie kevarü di; Manasseh-e nuorieu zoü rei.

¹⁵Sidi puo japie Josef tsü di, “A puonuo Abraham mu Isak puo mhodzünu tuo kevor Ukepenuopfü, a kerheichie a chatha ze vor thie tsokeshü Ukepenuopfü,

¹⁶Mu kemezhielie kevi pete nunu a shüphrakeshü dielieu, japie u nuonie tsücie; Sidi unie geinu a zau keyiese tuolie, tsiu a puonuoko Abraham mu Isak za rei sa; mu unie bu kruosie kijü nu krodi puo chüliecie” sishü.

¹⁷Siro Josef-e puo puo puo dzie puo zatsa pie Efraim tsü gei shüketa ngu tse, süu puo nei mota; sidi puoe Efraim tsü geinu puo puo dzie teshüpie Manasseh tsü gei shüwa.

¹⁸Sidi Josef puo puo ki, “Ci molie, a puo, hauha nuorieu, süla n dzie n zatsa pie puo tsü gei shücie” ita.

¹⁹Derei puo puo mvüta, di sie, “A si balie, a nuo a si ba zolie, puo rei sier seyie puo chütuo; mu puo rei zha zotuo, derei puo siezeu we puo ki zhakuotuo, mu puo nuosenuoyieko krodi seyie kro puo chütuo” sita.

²⁰Süla puo sünhie japie unie tsü di sie, “N geinu Israel bu theja chashütuo, idi sie, ‘Ukepenuopfü bu n chüpie Efraim mu Manasseh tuoishülie’ ” sishü. Hai di puo Efraim bu Manasseh mhodzü rieta.

²¹Süsie Israel-e Josef ki, “Harie a siatatuoüzhie, derei Ukepenuopfü n zetuo zotuo; sidi n ze la vo n puotsanuoko kijü nu shü lashütuo.

²²Siro a thie pie n siezedzürieko ketsü mho a n shiephruo[86] kerükrüshüzhie ho. A a zhiecha mu a theü se Amormiako kijü penyükelieu sa pie n tsüshü ho,” sishüwa.