Read Angami Naga Keriekitho 50 Bible Online

Keriekitho 50 - Angami Naga bible

Keriekitho 50

¹Sitse Josef-e tsu puo puo zie merepfülie, di puo krükra mu puo mebo ibata.

²Süsie Josef-e puo kituo daru kesiko bu daru pie puo puo mo kenhewanu di die khashü. Süla daru kesikoe mha pie Israel kenhewa;

³ukoe zha hiedia lie di süu chü, süu la puotei süde se morosuocü la. Siro Ijiptmiako zha hiethenie puo krü.

⁴Siro puo krükecü zhako vota tse, Josef-e Faro kinuko ki mha pu di sie, “A nie mhi ki nie khrie pfülieta üro, Faro ki hai di pucie:

⁵A puoe a bu rüse puo rüse, puoe, ‘A siatatuoüzhie, a Kanan kijü nunu a mekhru puo thiepiezhü ho, mu no sünu nu a khrucie’ si, süla tsie a bu kho a puo khruwacie, süsie a la vortatuo” sishü.

⁶Sitse Faro sie, “Kholie di n puo khruwalie, puo n bu rüsepie kezhü mhiei di” si.

⁷Süla Josef puo puo khrutuoü di khota; mu Faro kituoko pete puo ze kho, puo kinu pehüko, mu Ijipt kijü nu pehüko pete.

⁸Siro Josef kinuko pete mu puo siezedzürieko, tsiu puo puo kinuko rei kho, uko nuonuo kecünuoko, uko kuo kroko mu u thu kroko rübei khapie Goshen kijü nu keba zota.

⁹Siro guragariko mu gura themiako rei puo ze kho; süu themia krodi kro kezha se puo chü di.

¹⁰Siro uko Jordan khie keba Atad shie nu vorlie tse, uko sünu nu thekrü kezha se puo chüshü; mu puo zha thenie puo puo la thekrü chü.

¹¹Sitse kijü sünu lhou keba Kanankoe Atad shieu nu thekrü kechüu ngu tse, ukoe sie, “Hauha Ijiptmia la thenousuo sekecü thekrü kezha se puota zo” si. Süla thechü süu za pie Abel-mizraim[91] kieta, süu Jordan khie lutsa ba.

¹²Sidi puo nuonuokoe puo diekhakeshü mhiei chülie.

¹³Puo nuonuokoe puo toupie Kanan kijü nu vo di, Abraham-e Hitmia Efron ki nu khrüpiekezhü Mamre khieki Makpela lie nu tsiepfüu nunu puo khruwa.

¹⁴Sidi Josef-e puo puo khrukewa sie, puo siezedzürieko mu puo puo khruketuo la puo ze kekhoko pete ze Ijipt nu la vorta.

¹⁵Josef dzüriekoe uko puo siaketa sie, “Josef uko gei puo nei motuo zo ro, sidi uko puo gei mha kesuo chükeshüko pete chüpie uko geishü lata ro ki ta?” ita.

¹⁶Süla uko Josef ki vo di, “N puoe siaketa mhodzü die hau khashü,

¹⁷‘Hau pie Josef ki pushülie: A n ki chaya, n dzürieko kejo mu uko n gei kekrü di n pechükewau vashüwacie,’ si. Süla hieko tsie n ki chaya, n puou Kepenuopfü kituoko kejokemou vashücümu” sita. Siro uko puo ki die pushü tse Josef-e krata.

¹⁸Siro puo dzürieko rei krata mu uko vor tetsu puo mhodzünu zhüta, sidi sie, “Harie, hieko sü n diemiata zo” ita.

¹⁹Derei Josef uko ki, “Michie hiecie, a Ukepenuopfü tha nu ba zo memu?

²⁰Nieko a gei mha kesuo chüketuo rhü ze; derei Kepenuopfü we süu se mha kevi chülie zo, thie chü keba kemhie di, sidi themia kekra bu rheilieketuo chüliete.

²¹Süla michie hiecie, a thuo nieko mu nie nuonuoko meholietuo” ita. Sidi puo uko ki die kevi pie pu di uko nou chü kethepfushü.

²²Sidi Josef-e Ijipt nu lhou tuota, puo mu puo puo kinuko; mu Josef-e cie krie puo di ker lhoulie.

²³Siro Josef-e Efraim nuonuo phou se ketso nguwa; Manasseh nuou Makir nuonuo rei penuopie Josef phi ki shülie.

²⁴Siro Josef puo siezedzürieko ki, “A siatatuoüzhie, derei Ukepenuopfüe nieko ki vor zotuo, sidi kijü hau nunu nieko ze la vo puoe pie Abraham, Isak mu Jakob tsütuoü di rüsepie kezhü kijü nu lashü zotuo” si.

²⁵Sidi Josef-e Israel nuonuoko ki, “Ukepenuopfü nie ki vor zotuo, mu nieko bu hanu nu a ruko pfü khotuo” sita. Sidi uko bu süu chüketuo rüsewa.

²⁶Sidi Josef-e siata, cie krie puo di ker lhoulie di, sitse uko mha pie puo mo kenhelie, sidi Ijipt nu mekoula puo nu shüwa.