Read Angami Naga Keriekitho 6 Bible Online

Keriekitho 6 - Angami Naga bible

Keriekitho 6

¹Mu kijüu gei themia kruo selieta, siro süko nuopfüko lhou par tse,

²Ukepenuopfü nuokoe themia nuopfüko zivikecü ngulieta, sidi ukoe süko donu u neikecü kedapie lielieta.

³Sitse Jihova sie, “A Ruopfü bu themia ze sei tuolie lhote. Uko sü siatalie kevi chüüphou zo. Tsie yawinu uko bu teicie krie puo di mepfü zie lhou lhote” ita.

⁴Süteiki, mu süsie rei, kijü nu Nefilimia kro puo tuo. Siro Ukepenuopfü nuonuoko themia nuopfüko ki vor tse süko nuo penuopie uko tsüshü. Ukoe thiedzü kekuomia mu terhümiavimia chü vor.

⁵Jihovae kijüu gei kelhouko rüzhüthorketa mu uko kele kemedoko rei suothorketa ngushü.

⁶Sitse Jihovae puo thuo uko chüpie kijü hau geikeshü lepie rünou mo mu puo nouchüta.

⁷Süla Jihovae sie, “A thuo chükeshü themia hako kijü zieu geinu peka pejüwatuo, themia, nhachü mu khunuo gouketuo mu teikhrie gei teirako rei, ae uko chüshü di rünou mote” ita.

⁸Derei Noah-e Jihova mhi ki puo khriepfülie.

⁹Hako Noah seyieko. Noah themia kemiatho puo, puo teiki phou-u nu pejolie kelhomia puo, siro Noah Ukepenuopfü ze tuo.

¹⁰Noah nuo thepfumia se nyi, Shem, Ham mu Jafet.

¹¹Kijüu zowe Ukepenuopfü mhodzünu rhuta, sidi kijüu gei zhosuo thuo tshu vota.

¹²Ukepenuopfüe kijüu mehoshü, ru harie, süu suota, kekreilamonyü sünu kelhou pete u thuo u cha nu suoürhu phre tuoketa la.

¹³Süla Ukepenuopfüe Noah ki, “Ae themiako pekawaketuo pepiliete, a uko sa di kijü pekawa zotuo, kekreilamonyü uko zhosuo mhathoko bu kijüu tshute.

¹⁴N thuo gofer sei se rou puo chülie; süu nu kibouko khathelie, mu no puonou rei mu puomho rei tehoutsa se nyhülie.

¹⁵Süu bu thu krie se chalie, thu hiepengou meyalie, thu ser rükrielie.

¹⁶Rou-u mho keya puo chülie mu rou mho mu sozha nie donu thu puo peciepie balie. Rou-u bu puolha se lie mu puotsei nu kikha puo chülie.

¹⁷Kekreilamonyü a kijü nu lhouketuo pete pekawaketuo la dzüdi khashütuo, kijüu gei mha pete siatatuo.

¹⁸Derei a n ze dietseidiekho puo pebatuo. N kimia, n nuoko mu uko kimiako ze rou-u nu lelie.

¹⁹Siro khunuo lhouketuo khe puokrü puochü sa ze rou-u nu lelie, uko bu rheilieketuo la.

²⁰Teira kekreikreikecü khe, khunuo kekreikreicü pete kijü gei gouketuo kekreikreicü pete nu kenienie se n ki vorlie, uko bu rheilieketuo la.

²¹Uko la mu n thuo n la kecüca neiüko se salie” ishü.

²²Noah-e Ukepenuopfü puo ki pukeshü mhiei chülie.