Read Angami Naga Keriekitho 7 Bible Online

Keriekitho 7 - Angami Naga bible

Keriekitho 7

¹Jihovae Noah ki, “N kikru pete ze rou-u nu leliecie, ae thephou hau nu n rübei a mhodzüki miatho bakecü ngulieketa la.

²Khunuo kemesako puokrü thenie mu puochü thenie icü, siro khunuo mesa kemoko puokrü puochü puopuo icü ze salie.

³Siro pera rei puokrü puochü thenienie ze salie, kijüu pete nu pera mu khunuo kekreikreicüko bu puoyie nyilieketuo la hau chülie.

⁴Kekreilamonyü zha thenie sie ae teisozha hiedia mu teizeizha hiedia tei perüpie a thuo chükeshü kijüu gei lhouketuo pete peka lotsowaketuo la” sishü.

⁵Sitse Noah-e Jihova puo ki pukeshü pete chülie.

⁶Siro Noah-e cie krie sorou keta ki dzüdi kijü nu vor.

⁷Süla Noah-e puo kimia, puo nuonuoko mu uko nupfünuoko ze dzüdiu nunu talieketuo la rou-u nu leta.

⁸Khunuoko mu perako rei, mesa rei mesa morei, kenienie icü, puokrü puochü.

⁹Ukepenuopfü pukeshü mhiei, Noah ze rou-u nu lelie.

¹⁰Zha thenieko sie kijüu gei dzüdi vorta.

¹¹Noah cie krie sorouketa ki, thekhrü kenieu khrü zha kerethenie nhie dzüluo kesou kezhako rüluo parta mu teigei dzü kharuko khrüshüta.

¹²Sidi teisozha hiedia mu teizeizha hiedia kijü nu teirü bata.

¹³Sünhie Noah mu puo kimia unie, unie nuo thepfu Shem, Ham mu Jafet mu uko nupfünuo seko ze di rou-u nu leta.

¹⁴Uko ze di nhachüko, perinuo rei mu kijü nu gou tuoyakezha khe, tsiu pera mu puochü chükepfü khunuo puoyie neiünei kekreikreicü pete rou-u nu leta.

¹⁵Kijüu nu u keha kenyi khe, puokrü puochü kenienie Noah ze di rou-u nu leta,

¹⁶Ukepenuopfüe pukeshü kemhie di; süsie Jihovae puo thuo kikhau khawata.

¹⁷Zha hiedia dzüdi si zo ba rou-u toupfüsie puo bu kijü mho rüdzalie kevi chülieta.

¹⁸Dzüu rükrie miemieta mu rouu dzüko mho rüdza tuota.

¹⁹Siro dzüu kra miemie sie kijüthou kerükrieko rei vupfülieta.

²⁰Süu rükrie miemie vo kijüthouko mho thu kerepengou sieta.

²¹Kijü nu lhouketuo pete siata, pera pete, kiri pete, nhachü pete, kijü nu gouketuo pete mu themia pete.

²²Kijüu gei u keha kerheiro kenyi khe siata.

²³Puo puo thuo kijüu gei lhouketuo pete pekawa. Themia, khunuo, kijü nu gouketuoko mu pera icü pete. Noah mu puo ze rou nu ketuoko rübei lhiekelie zo.

²⁴Siro zha krie puo di hiepengou dzüdi bata.