Read Angami Naga Samuel Kenieu 1 Bible Online

Samuel Kenieu 1 - Angami Naga bible

Samuel Kenieu 1

¹Siro Saul se sie, David-e Amalekmia geiwa di la vorta, mu David-e teisozha kenie Ziklag nu bata.

²Sidi zha se nhie, mia puoe Saul razhüchü nunu vor, puo pfheneiko rürha mu nyophe puo tsügei shüpfü tuo. Sidi puo David ki vorlie tse, te kijü tsu di puo kelu.

³Sitse David sie puo ki, “No kirapuonu vorzhü ga?” si, puo sie puo ki, “A Israelmia razhüchü nunu tapraliete” sishü.

⁴David sie puo ki, “Thedzeko kimhie vota ga? A ki pucie!” sishü. Puo sie, “Chüpahiko rüyachü nunu tate, derei chüpahi kekra tetsu di siate; siro Saul mu puo nuo Jonathan rei siate” sishü.

⁵Sitse David sie thedze se kevor khriesau ki, “Kimhie di no Saul mu puo nuou Jonathan siaketa silie ga?” sishü.

⁶Sitse khriesau sie puo ki, “A Gilboa kijüthou gei vo tuo; mu sügei Saul-e puo rüngou-u geinu puo rhüpfü tha, tsiu guragariko mu gura themiako puo khieki tha.

⁷Sidi puo puo sietsa mehoshü tse, puo a ngulie, sidi a kieta. Süla a sie, ‘A haki bawe’ sishü.

⁸Sitse puo a ki, ‘No supuo ga?’ si. A sie puo ki, ‘Ae Amalekmia’ sishü.

⁹Puo a ki, ‘Vorlie sidi a gei thashü di a dukhriwacie; a kemezhiethorte, sirei a kerheiroe tsie rei a gei ba zo’ sita.

¹⁰Süla a puo gei siethashü, di puo biekhriwate, kekreilamonyü puo tetsukezhü sie rhei lasierlie lhokecü a si toutacü la. Siro a puo tsü geiketuo keditsüreu mu puo bou geiketuo kethuo-u bielie, sidi hako se a niepuu ki vorzhülie” sishü.

¹¹Sitse David puo pfhenei chülie di süko cierhata; mu puo ze ketuo themiako rei sükemhie chü phre.

¹²Uko Saul mu puo nuo Jonathan, Jihova rüpfhünuoko mu Israel kiu la kra di thekrü chü mu mevo ba thevatie tso, sükoe zhiecha geinu tetsuketa la.

¹³Süsie David-e thedze sekevor khriesau ki, “No kirapuo nu vor ga?” sishü. Puo sie, “Ae chazoumia, Amalekmia puolie” sishü.

¹⁴Sitse David sie “No n dzie yhapie Jihova kenhekelieu gei shüketuo michie mo me?” sishü.

¹⁵Süsie David-e khriesako mia puo kielie di sie, “Haki vor di puo dukhriwaliecie” sishü. Süla puoe süu dukhriwa.

¹⁶Siro David sie puo ki, “N zieu thuo n tsü gei pfülie; kekreilamonyü n tie thuo n petsou di pukecü, ‘Ae Jihova kenhekelieu dukhriwate’ ikeshü la” sishü.

¹⁷Siro David-e thekrü chü di Saul mu puo nuo Jonathan unie krükrakecü hamhie.

¹⁸(Siro puoe Theü Tsali[1] hau pie Judako pethalienu diekhashü; süue Jashar Leshüdau nu thupie zhü.) Puoe sie:

¹⁹He-i Israel, n zapuzayieu, n thechü kerükrieko geinu geipie zhüwate! Kimhie di kekuomia tetsute shi!

²⁰Süu pie Gath nu pu hieluo, süu pie Ashkelon chaüko nu pesi hieluo; moro Filistinmia nuopfükoe u neituo, u zhürekemo nuopfükoe u neilhe motatuo.

²¹Nie Gilboa nu kijüthouko, thezei bu morei teirü bu nieko gei tsur motacie, morei lieko bu puosi vüshü motalie! Kekreilamonyü kekuomia pezhüu perhuwate, Saul pezhüu, tier pie kenhekelieu ba sa mote.

²²Dukhrikewamia zie nunu, kekuomia shuo nunu, Jonathan theü rürei la vor mote, morei Saul zhiechau methuo di vorlie mote.

²³Saul mu Jonathan, thekhriekepfü mu u kenei nie! Kerhei mu kesia nu rei unie chükhowa mo; unie tsüüra kirei rükrikuo, unie Losha kirei kuoko.

²⁴He-i Israel nuopfüko, Saul la kraliecie, pfhe meriemegekecü, ketshukelhuo kechü pie nieko whekeshü, suna pienyie pie nie pfheneiko gei ketsokeshüu.

²⁵Kimhie di kekuomia rüyachü nunu tetsuta mu! N kijü kerükrie geinu Jonathan geipie zhü.

²⁶N la a nou suolie, a siezeu Jonathan; no sü a kekhriethomia zo; a gei n kekhrie sü u ngothor zo, thenumia kekhrie kirei vi.

²⁷Kimhie di kekuou tetsute shi, mu terhü rünyieko kaüjüte shi!