Read Angami Naga Samuel Kenieu 10 Bible Online

Samuel Kenieu 10 - Angami Naga bible

Samuel Kenieu 10

¹Siro puotei huo sie Ammonko kediu siata, mu puo nuou Hanun puo sounu kedi chülie.

²Sitse David sie puo ki, “A ketseikevi thapie Nahash nuou Hanun kieshütuo, puo puoe a gei tseiüvikeshü tuoi” ishü. Süla David-e puo puo siaketa la thenousuo keba thupeluotuoü themia ketsepie puo ki shü. Siro David themiako Ammonmia kijü nu kekelie ki,

³Ammonmia kedinuoko sie uko niepuu Hanun ki, “David-e thenou chü peluoketuo ketse n kikeshü ha no puo üse n puo kerhu la ükecü leya me? David-e puo themia ketsepie n ki keshü ha nadiu pfhü meho, süu rie mu süu chü kelhouwaketuo la moü me?” sita.

⁴Süla Hanun-e David ketsekeshü themiako telie, sidi uko tiemie tietsa puo puokecü thiewa, siro uko boulieu metsuo nunu cierhawa, di uko ketsewa.

⁵Siro süu David ki pushü tse, puoe mia ketsepie uko kishü, themiako mengathor tuoketa la. Kediu sie, “Nieko tiemie tsülie kemochie Jeriko nu batacie, süsie nu la vorliecie” sishü.

⁶Siro Ammonmiakoe uko David thepesuokewa ngulie tse, Ammonmiako mia ketsepie Beth-rehob nu Siriamia, siro Zoba nu Siriamia zha khrülie, phituo chüpahimia nyie mepfü, süsie Maka kediu themia nyie puo rei sa, tsiu Tob themia nyie kerekenie.

⁷Siro David süu sikeshü ki, puoe Joab mu terhümiaviko ze di chüpahi pete ketseshü.

⁸Siro Ammonko par di kharu mhodzü ki u kesepfü thalie; derei Zoba mu Rehob Siriamiako, tsiu Tob mu Maka themiako we phouyo nu bata.

⁹Joab-e terhü puo mhodzütsa siro puo sietsa puo perhie baketa ngulie tse, puoe Israelmia kethepfu huo kedalie, sidi uko bu Siriako perhie.

¹⁰Siro puo themia keshako Joab-e puo siezeu Abishai pelewa, sidi puo bu uko pie Ammonmia perhie balienuwa.

¹¹Siro puo sie, “Mhanuü Siriako a la kuothorta liro, nieko a khruohi morosuo; derei mhanuü Siriamia nieko la kuothorta liro a vor di nieko khruohituo.

¹²Thepfulie, sidi avu themiako la, mu Ukepenuopfü nadiko la thepfulie khe; mu Ukepenuopfü bu puo mhiki viücüu chüliecie” sishü.

¹³Süla Joab mu themia puo zeketuoko Siriamia perhietuoü rüyachünu phi; sitse ukoe puo mhodzünu nu tata.

¹⁴Siro Ammonmiakoe Siriamia taketa ngu tse, uko rei sükemhie Abishai mhodzünu nu ta lata, sidi nadiu nu leta. Sitse Joab la vor di Ammonmiako ze kegei, sidi Jerusalem nu vorlie.

¹⁵Derei Siriamia Israel bu u penyüwaketa ngu tse, uko thuo vo kengulie.

¹⁶Sitse Hadadezer ketseshü di vo Siriamia Eufrat rükhie kebako ze vorta; mu ukoe Hadadezer chüpahi mho kezhau Shobak bu uko krüta chü di Helam nu vorlie.

¹⁷Siro süu se David ki pushü tse, puoe Israel pete kie kengulie, sidi Jordan ciepar di Helam nu vorlie. Sitse Siriako David petsou di puo ze kegei.

¹⁸Sirei Siriako Israel mhodzünu nu tata; sidi David bu uko guragari krie thenie, mu gura kesemia nyie hiedia dukhriwa,[20] tsiu chüpahi mho kezhau Shobak bie kerüzawa, sidi puoe süki nu siata.

¹⁹Siro kedimiako Hadadezer kituo chüyakezhako Israel-e uko penyüwaketa ngu tse, ukoe Israel ze vitho chüwa, sidi uko lie chüta. Sidi Siriamia Ammonmia khruohi sa michieta.