Read Angami Naga Samuel Kenieu 11 Bible Online

Samuel Kenieu 11 - Angami Naga bible

Samuel Kenieu 11

¹Siro bayie teiu nu, kedimiako terhü nu voyakezha teiki, David-e puo kezhako pie Joab mu Israel pete sa di ketseshüwa; sidi uko Ammonmiako pekawa, mu Raba re. Derei David-e Jerusalem nu bata.

²Siba di thevatie, David-e puo zhü nunu sielie di kedi kiu mhogei rühoutuo, sitse thenumiapfü puo ki mhogeinu dzürülukeba ngu; thenupfü zivithor.

³Sitse David-e thenupfü dze ketsotuoü mia ketseshü. Sitse mia puo üse, “Hapfüha Bathsheba, Eliamnuopfü Hitmia Uria kimiapfülie” ishü.

⁴Süla David-e dieliemia ketseshü di puo ze vor, mu hapfü puo ki tuoler, sitse puo hapfü ze zhüwa. (Hateiki hapfüe kerhu sekecü nunu puo chü kemesawata.) Süsie hapfü la puo ki vota.

⁵Thenupfü puo rübei mo bata; süla hapfü mia ketseshü di David ki, “A phoupie mo bate” ishü.

⁶Süla David die ketsepie Joab kishü di, “Hit-u Uria ketsepie a kishücie” ishü. Süla Joab-e Uria ketsepie David kishü.

⁷Siro Uria-e David ki vor tse, David-e Joab mu puo themiako kedipuo mhie ba shi, mu terhü kechü kimhie ba shicü ketso.

⁸Süsie David-e Uria ki, “N kinu kelie di n phikhrüwacie” sishü. Sitse Uria kediu ki nunu tuota, süki kediue mha khapie puo ketsü ketseshü.

⁹Derei Uria we puo niepuu kituoko pete ze di kediu kikha ki zhüta, sidi puo kinu vo mota.

¹⁰Siro ukoe kediu ki, “Uria puo ki ke mowe” ishü. Sitse David sie Uria ki, “No rüve tuo di vor zo. Siro kiüdi n kinu vo mo ga?” sishü.

¹¹Sitse Uria sie David ki, “Dietseidiekho bouu mu Israel tsiu Judae pru[21] nu ba zo, siro a niepuu Joab mu a niepuu kituoko pete phouyo nu ba zo; siüro a a kinu ke di mhacümhakrie di a kimia zezhütuo me? No rhei ketuo mhie, tsiu a ruopfü rhei ketuo mhie, a mha haikecü chülie lho” sita.

¹²Süsie David sie Uria ki, “Thie rei sa batalie, mu a sodu nu n ketsewatuo” sishü. Süla Uria sünhie sa Jerusalem nu bata. Süsie nhie,

¹³David puo bu puo mhodzünu nu mhacümhakrietuoü kieshü, sidi puo die kemezewa; mu thevatieta tse puoe puo niepuu kituoko ze zhütatuoü puo zhü nu vota, sidi puo kinu vo mota.

¹⁴Siro süsie duü, David-e leshü puo thupie Joab tsü, sidi süu pie Uria dzie nunu ketseshü.

¹⁵Leshüu nu puo thukeshü “Uria ketsepie terhü keretho nu shücie, sidi no puo kinu tuotalie, sitse mia puo biewa di puo bu siatatuo” sishü.

¹⁶Siro Joab-e nadiu re ba zo, mu puo Uria ketsepie terhümiavimia tha nu shü.

¹⁷Sitse nadiu nu themiako tuo par di Joab ze kegei; siro themiako donu ketuo David kituomia huo siata. Sünu Hit-u Uria rei sa siata.

¹⁸Sitse Joab-e terhü kegeikecü dze pete ketsepie David ki pushü.

¹⁹Sidi puo dielieu ki, “No kediu ki terhü kegeikecü dzeko pu tseikewa,

²⁰ki mhanuü kediu puo noumeyie parta, mu puo n ki, ‘Kiüdi nieko terhü chütuoü nadi penuo phi vo ga? Niekoe uko dahou geinu theü cieshüyakecü si mo me?

²¹Supuonie Jerubal[22] nuou Abimelek dukhriwa ga? Thenumiapfü puoe dahou geinu mha kegetsie puo kelhou pie puo peshü di puo bu Thebez nunu siata moü me? Kiüdi nieko dahou penuo se phi ga?’ isi ro, no sie, ‘N kituou Uria Hit-u rei sa siate’ ilie” sishü.

²²Süla dielieu tuota, di vor David ki Joab pukecü pete pushü.

²³Dielieu sie David ki, “Themiako hieko mhokuo vorta, sidi lie nu hieko perhie vorta; derei hieko kharu nu kele kinu uko whuo pesie lawa zo.

²⁴Sirei dahou geinu theü ciepie n kituoko peta; sidi kediu kituoko huo rei siate; mu n kituo Hit-u rei sa siate,” sishü

²⁵Sitse David sie dielieu ki, “No hakemhie di Joab ki pushülie, ‘Mhahau bu n nou chükemezhie hie, zhiechae tsie rei kenuo rei mia dukhriwayacü la; nadiu perhiezhü zo, sidi süu penyüwacie’ sishülie. Sidi puo chü kethepfushülie” ishü.

²⁶Siro Uria kimiapfüe puo nupfu siaketa silie tse, puoe puo la thekrüchü.

²⁷Siro thekrü kechü teiu tseita tse, David-e mia ketseshü di hapfü ze puo ki vorta, sidi hapfüe puo kimia chüta, tsiu thepfu puo penuoshü puo tsü.