Read Angami Naga Samuel Kenieu 13 Bible Online

Samuel Kenieu 13 - Angami Naga bible

Samuel Kenieu 13

¹Siro puotei huo vota. Siro David nuou Absalom-e puo üpfü zivi se cüpfü puo ba, puo zae Tamar; siru David nuou Amnon-e puo ngu puo neita.

²Siro Amnon-e puo üpfü Tamar la meyhumezhie zo di mhachü bata, kekreilamonyü hapfüe phouse ba zo, mu süu la Amnon hapfü gei mhapuorei chülie kenjükecü le.

³Derei Amnon-e puo zemia puo baya, puo zae Jonadab, puoe David dzürieu Shimea nuo; mu Jonadab-e themia mhachü si sekecü puo.

⁴Puoe sie puo ki, “He-i kediu nuou, kiüdi khunhiekhunhie ki n ngu pesuo miemietazhü ga? No a ki pulie lho me?” ita. Sitse Amnon sie puo ki, “Ae a siezeu Absalom üpfü Tamar ngu a nei batelie” sishü.

⁵Sitse Jonadab sie puo ki, “No ke n zhügei zhülie, sidi suokezhü do chülie; sidi n puou n mehotuoü kevor ki, no puo ki, ‘A üpfü Tamar bu a ki vor di kecüca pie a vachüshücie, mu kecücau a mhinguki nu chalie, a bu süu ngu di puo dzie nunu cücie’ idi pushülie” sishü.

⁶Süla Amnon-e ke zhülie, sidi suokezhü do chülie; siro kediu puo mehotuoü vor tse, Amnon sie kediu ki, “N pezie rei a üpfü Tamar bu a ki vorcie, sidi a mhingu kinu niekhrüda se dia rielie, di a bu puo dzie nunu cücie” sita.

⁷Süla David-e mia ketsepie Tamar kinushü, sidi sie, “Sielie di n prüu Amnon ki vocie, sidi puo la kecüca keseshülie” sita.

⁸Süla Tamar-e puo prüu Amnon kezhü kiu nu vor. Süsie hapfüe thoulha pielie, sidi süu nelie, mu puo mhodzü kinu niekhrüda chülie di rieshü.

⁹Süsie hapfüe mekhou puo chülie di süko khapie[26] puo mhodzünu shü, derei puo cü mvüta. Sitse Amnon sie, “Themia pete bu a kinu nu tuo prataliecie” sishü. Süla mia pete rei puo kinunu tuo prata.

¹⁰Sitse Amnon sie Tamar ki, “Kecücako se thezhübou nu lerliecie, sitse a n dzie nunu cülietuo” sishü. Süla Tamar-e puo chükelie niekhrüdako pielie di süko se puo dzürieu Amnon zhübou nu le.

¹¹Derei hapfüe süko se puo penuo phir tse, puo hapfü telie, sidi sie puo ki, “Vor di a zezhücie, a üpfü” sita.

¹²Sitse hapfü puo die kela di, “Molie a prüu, no a kemvüchü hiecie; kekreilamonyü mha sikecü Israel donu chü mo zoluo; mha kesuo haicü chü suo zo!

¹³Siro a la liro, a bu a ngau se kirapuo vota? Siro n la zo rei, Israelmia donu miatho kemomia puo chütatuo. Süla tsie, a n ki chaya, kediu ki pushücie; kekreilamonyü puo mhakipuorei n kinunu a khase batalie lho zo” sita.

¹⁴Derei puoe hapfü pfhe rünyü mvüta mu hapfü kirei kuoko, süla hapfü kemvü chü di puo zezhüwa.

¹⁵Süsie Amnon-e hapfü ngumecü pie mhapuo chüta; sidi puoe hapfü ngumecükecüu puoe hapfü ngu puo nei di meyhumezhie kevor-u ki rekuota. Sitse Amnon sie puo ki, “Tuotalie” sita.

¹⁶Derei hapfü sie puo ki, “Mo, a prüu; no kekrü di a ketsewatuoükecü hau we no a gei chükewau ki rei suokuote” sita. Derei puo hapfü pfhe rünyü mota.

¹⁷Sidi puoe khriesamia puo puo thekeyakezhau kielie di sie, “A mhodzünu nu thenu hapfü teshü prawalie, sidi puo hapfü sietsa nu kikhau ciewalie” sishü.

¹⁸(Siro hapfüe boulie puo boucha di rütshukecü puo setuo; kekreilamonyü thiedzü kerieki kedimia nuonuo phousemia pfhenei sükemhie seyakezha la.) Süla puo kituoue hapfü teshü pawa sidi puo sietsa nu kikhau ciewa.

¹⁹Derei Tamar-e mige pie puo tsü geishülie, tsiu puo boulie kerütshuu seketuou cierhawa; sidi hapfüe puo dzie pie puo tsü kegulie di cha ze kra vota.

²⁰Sitse puo prüu Absalom-e puo ki, “N prüu Amnon n ze zhü me? Tsie kemekrie batalie, a üpfü; puo n prüu zo; hau pie n noushü setuo hie” sita. Süla Tamar-e thedzü kezei chü di puo prüu Absalom kinu bata.

²¹Siro kediu David mha hako pete silie tse, puo puo noumeyie seta, derei puo siazha pie puo nuou tsü mo, puoe puo khrieu, mu puoe nuorieucü la.

²²Derei Absalom we Amnon ki dievidiesuo puorei pu mo zo; Absalom-e Amnon ngumecüta, puoe puo üpfü Tamar shüwakecü la.

²³Siro ciete kenie sie Absalom-e Baal-hazor nu, süusü Efraim khieki, tekuo mie kebemia ba, mu Absalom-e kediu nuoko pete kieshü.

²⁴Süsie Absalom-e kediu ki vor, sidi sie puo ki, “N kituoue tekuo mie kebemia ba; kediu mu puo kituoko bu n kituou ze volie vituo me?” sishü.

²⁵Derei kediu sie Absalom ki, “Lie lho, a nuou, uko pete vo hie khe, siro süu n la thepie kere puo chütalie vi mu” sishü. Sidi puoe puo ki pu bei zo derei puoe vo mvüta sirei puoe japie puo tsüshü.

²⁶Sitse Absalom sie, “Mhanuü no volie lho ro, n pezie rei a siezeu Amnon bu hieko ze vocie” sishü. Sitse kediu sie, puo ki, “Kiüdi puo bu n zenu ga?” sita.

²⁷Derei Absalom-e Amnon bu vonushü kemochie pu beita, süla kediu nuonuoko pete ze vota. Siro Absalom-e kediu he kemhiekecü thehe puo chü.

²⁸Süsie Absalom-e puo kituoko ki pu di, “Amnon zu krie kedzüle parkelie ki nieko puo meho balie, sidi a nieko ki, ‘Amnon dukhriwalie’ ikeshü ki, puo dukhriwaliecie. Michieta hie; a a thuo diekhashü moü me? Thepfulie mu meteilie” sita.

²⁹Süla Absalom kituokoe Absalom diekhakeshü kemhie chüpie Amnon geishüwa. Sitse kediu nuonuoko sielie, sidi mia puopuokecü puo gura gei pfülie di tata.

³⁰Siro uko cha nu ketuo ki, dielie David ki vorkecü Absalom-e kediu nuonuoko pete dukhriwate, mu miapuorei lhieshü mokecü puta.

³¹Sitse kediu sielie di puo pfhenei cierhata, sidi kijü zhüta; tsiu puo kituoko puo khieki kethako pete rei u pfhenei cierhata.

³²Derei David siezeu Shimea nuou Jonadab-e sie, “A niepuu bu kediu nuonuoko pete dukhriwata ücü leta hiecie; Amnon rübei siaketa zo. Mha hau Absalom-e Amnon puo üpfü Tamar shükewa yawinu le tuote.

³³Süla tsie, a niepuu kediu bu kediu nuonuoko pete siataücü puo nou leta hiecie; kekreilamonyü Amnon rübei sia zo” sishü.

³⁴Derei Absalom tata. Siru khriesamia rükhou pfhe kebau puo meho sie ru, puoe kijüthoutsa Horonaim chau[27] nu themia kekra vorkezhü ngulie.

³⁵Süla Jonadab sie kediu ki, “Mehoshücie, kediu nuonuoko vorzhie; n kituou pukeshü mhiei, sütuoi vorzhie” sishü.

³⁶Siro puo die pu thewa mumetha kediu nuonuoko vortsolie, sidi uko pfhephrasie di krata, sitse kediu mu puo kituoko pete rei kra phita.

³⁷Derei Absalom we tata, sidi ta Geshur kediu Amihud nuou Talmai ki vota. Siro David-e teisonhie puo nuou krükra bata.

³⁸Absalom-e ta se Geshur nu vo di teicie se lhou tuota.

³⁹Siro kediu noue Absalom menguta; kekreilamonyü puoe Amnon seu nunu puo[28] nouluo lalietakecü la.