Read Angami Naga Samuel Kenieu 15 Bible Online

Samuel Kenieu 15 - Angami Naga bible

Samuel Kenieu 15

¹Siro mha hako sie, Absalom-e guragari mu gura, mu mia hiepengou bu puo mhodzü ta rie voketuo keselie.

²Sidi Absalom-e khiserüna sielie di vo kharu nu kele chau khieki thalie; sidi mia kehoupuorei dienya se kediu ki vor ro, Absalom-e puo kielie di sie, “No nadi kiu nunu vor ga?” siya. Sidi themiau sie, “N kituoue Israel nu themia sikecü puo mu seyie sikecü puowe” ishü ro,

³Absalom sie, “Harie, n kepuu vi mu mezhü zo; derei kediue n pfhe rünyütuoü miapuorei kedapie ba mote” siwaya.

⁴Siro Absalom pu sa di sie, “Mhanuü a kijü hau nu capi chücü we! Themia kehoupuorei dienya huo morei thenyie huo se a ki vorkecü sie, a uko gei kethocau chüshütuo” sishüya.

⁵Sidi kehoukipuorei themia puo penuo vorkecü ki, puoe u kelushüya, sidi puoe puo dzie se uko teshülie di uko meboshüya.

⁶Sidi Absalom-e dienya la kediu ki kevor pete gei hakemhie chüshü, süla Absalom-e Israelmia pete nou teshülieta.

⁷Siro teicie dia[29] sie Absalom-e kediu ki, “N pezie rei a bu Hebron nu vocie sidi a bu Jihova ki rüsekeshüu chüwacie.

⁸Kekreilamonyü n kituou Siria Geshur nu keba ki rüseshüwate. Mhanuü Jihova a ze Jerusalem nu vor toushü ro, a Hebron nunu Jihova rüsuotuo” sishü.

⁹Sitse kediu sie puo ki, “Thenou mene di voliecie” sita. Süla puo sielie di Hebron nu vota.

¹⁰Derei Absalom-e pekhre di dielie ketsepie Israel seyie pete nu shü di sie, “Nieko ketsü kekhou pfhe sishü tse, nieko shieshülie; sidi Absalom Hebron nu kedi chüte ho!” sishülie.

¹¹Siro themia krie kenie Absalom ze prata; sükosü kiepiekebako, siro ukoe mhachütuoü keba ca puorei si mo di vota.

¹²Siro Absalom-e ruosuo chü keba ki, puoe puo nadi Giloh nu, David ketarho-u, Gilonmia Ahithofel kietuoü mia ketseshü. Siro keperhiekecüu re miemieta, mu Absalom kitsa themia kra miemie sieta.

¹³Sitse dieliemia puo David ki vor di sie, “Israelmiako noue Absalom kitsa vate” sishü.

¹⁴Sitse David Jerusalem nu puo ze keba puo kezhako pete ki, “Sieliecie! Úko tata khe, moro úko Absalom kinu talie motalie vite. Rükriliecie, moro puo vor úko tsolietatuo, sidi kepeka se u gei vortuo, tsiu nadiu zhiecha pie pekawatuo mu” sishü.

¹⁵Sitse kediu kezhamia puo sie puo ki, “N kituokoe hie niepuu kediu pepikeshü pete chütuoü dojüpfü ba zo” sishü.

¹⁶Süla kediu tuota, puo pelipfüko bu kiu pfhetuoü khapie kebako rübei sie puo kinuko pete puo siemedzi pata.

¹⁷Siro kediu tuoshü mu themia pete puo siemedzi di pata; sidi uko ki kenuotho-u nu balie.

¹⁸Siro puo kezhako pete puo khieki balie; siro Keretmia pete, mu Peletmia pete, tsiu Gitmia puo siemedzi kevor mia krie sorou pete, kediu mhodzü vota.

¹⁹Siro kediu sie Git-u Itai ki, “Kiüdi no rei hieko ze vorzhü ga? La votalie, sidi kediu ze batalie; kekreilamonyü noe chazoumia, mu n kinunu whuokewamia zomu.

²⁰No ndu nu vor ze, mu a thie n bu hie ze rühou di n ziejü ketuomia chütatuo me? Sirei a we a medora votalie vi. La votalie, mu n siezedzürieko rei bu n ze votalie; mu Jihova bu ketseikevi mu ketho-u thapie n kieshücie” sita.

²¹Derei Itai kediu die kela di, “Jihova rheiketuo mhie, mu a niepu kediu rhei ketuo mhie, a niepu kediu thechü kirapuo votuo shi, kesia nu morei kerhei nu rei, n kituou sünu tuo zotuo” sita.

²²Sitse David sie Itai ki, “Si üro sielie di tuoshülie” sishü. Süla Git-u Itai puo themia pete, mu puo ze ketuo nhicumia pete puo ze di tuoshü.

²³Siro themia pete tuo pakezhü ki rüna pete kra peto phita, siro kediu Kidron Rücüu ciepalie; mu themia pete tuo rayhatsa petsou vota.

²⁴Siro Abiathar mu Zadok rei sa di Leviko pete Ukepenuopfü dietseidiekho bouu toupie di khor. Sidi ukoe themia pete nadiu ciepralie kemochie Ukepenuopfü dietseidiekho bouu khapie balie.

²⁵Süsie kediu sie Zadok ki, “Ukepenuopfü dietseidiekho bouu pie la vo nadiu nu shüwaliecie. Mhanuü ae Jihova nei chülie liro, puoe a ze la vorshütuo, sidi a bu sünu rei a kebachü rei ngu lalietuo.

²⁶Derei mhanuü puoe sie, ‘A n ngu a neilie mote’ ita liro a haki ba zo, puo bu a pie puo mhiki viücüu chüliecie” sishü.

²⁷Süsie rei kediue sie zievo-u Zadok ki, “Harie, no mu Abiathar, n nuonie sa, n nuou Ahimaaz, mu Abiathar nuou Jonathan zelie di n nou mene di tuo nadiu nu votalie.

²⁸Harie, n kinu die a pesi vor kemochie ae rayha razha nu pfhe batuo.”

²⁹Süla Zadok mu Abiathar unie Ukepenuopfü dietseidiekho bouu se Jerusalem nu vowata, sidi unie sünu bata.

³⁰Derei David-e Oliv kijüthou melikho, tsiu puoe phithuo mu puo tsü dzepfü di meli chakhrie kratuo; siro themia puo ze ketuo pete rei u tsü zepfü di melikhozhü, tsiu tuo chakhrie kra khota.

³¹Siro mia David ki Ahithofel rei Absalom ze puo perhiekecü nu mia puotaükecü pushü. Sitse David sie, “He-i Jihova a n ki chaya, Ahithofel mia tahitarhokecü chüpie mhasi kemomia die chüwacie” sita.

³²David-e kijüthou mezü gei, puoe Ukepenuopfü rüsuokecü gei vorlie tse, Hushai Arkit-u puo boulie cierha tsiu rünyo pie puo tsü geishü se di vor puo ze kese.

³³Sitse David sie puo ki, “Mhanuü no a ze vo liro, no a la thepie puo chütatuo.

³⁴Derei mhanuü no nadiu nu la volie di Absalom ki, ‘He-i kediu, a n kituo chütatuo; voketa teiko nu n puou kituo chü kevor tuoi, a tsie rei n kituo chütatuolie’ silie. Siliro no a la Ahithofel ketarho die penyüwatuo.

³⁵Siro zievomia Zadok mu Abiathar unie n ze di sünu balietuo. Süla no kediu kinu mhakehoupuorei silie ro se zievonie Zadok mu Abiathar ki pu seiliecie.

³⁶Siro unie nuonuo unie ze sünu ba, Zadok nuou Ahimaz mu Abiathar nuou Jonathan unie ze ba ho; mu uko geinu noe sikelie pete ketsepie a kishülietuo” sishü.

³⁷Süla Absalom Jerusalem nu vor tsokelie ki David khrietho-u Hushai rei nadiu nu vor tsolie.