Read Angami Naga Samuel Kenieu 17 Bible Online

Samuel Kenieu 17 - Angami Naga bible

Samuel Kenieu 17

¹Süsie rei Ahithofel sie Absalom ki, “A bu mia nyie kerekenie kedaliecie, sitse a tsiezhü sie di David whuotuo.

²Sidi puoe thachü tsiu puo nyiekeba ki a puo gei phituo, di puo kedeshütuo; sitse themia puo zeketuo pete tatatuo. A kediu rübei dukhrituo.

³Siro thenupfüe puo nupfuu ki la vorketuo tuoi di a themia pete ze la vor n tsüwatuo. Noe mia puo[33] kerheiro rübei pfhüya, mu themia pete kezevi di batatuo” sishü.

⁴Sitse pukeshü süu Absalom mu Israel phichüko pete rei chülie.

⁵Sitse Absalom sie, “Arkit-u Hushai rei sa kieshücie, sidi puo kedipuo putie shi uko keze rünyüshü khe” sishü.

⁶Sidi Hushai-e Absalom ki vor tse, Absalom sie puo ki, “Ahithofel hamhiekecü puyalie; uko puo pukeshü kemhie chütuo me? Mhanuü silie lho ro, no hie ki pushülie” sishü.

⁷Sitse Hushai sie Absalom ki, “Ahithofel tarhokeshü dieu tsieu va la vi mote” ishü.

⁸Siro Hushai pu sa di, “Noe n puo mu puo themiako terhümiavimiacü si ba, mu ukoe u nou meyiemehü bate, lie nu thega krüpfü mia puo nuonuo chüseketa kemhie bate. Süsie rei, n puoe terhü chü sithor; puoe chüpahiko ze di teizeizhau rei pevolie lho.

⁹Siro tsie zorei puoe vo kheho puo nu rüshü batuo, morei thechü kekrei huora rei batuo. Siro keperhiekecü therie nu u chüpahi huo penyüwa, sidi kehoupuorei süu kesimia sie, ‘Absalom siemedziketuo chüpahiko u thuo u donu kegei bate’ isituo.

¹⁰Sitse terhümiavi kethepfutho-u, puo meloue losha melou kemhiekecüu rei michie di ze jütatuo; kekreilamonyü Israel pete rei n puoue terhümiavimia, mu puo zeketuokoe terhümiavimia kethepfuthomia ücü si ba.

¹¹Derei a tarhokeshü liro Israel pete kie kengupie n kitsa shüliecie, Dan nunu vo Bersheba ketso, dzükezha khie theshünyo tuoi zolie, sitse no n thuo, mia puo chü di terhü nu voliecie.

¹²Sidi hiekoe puo ngulie kevira nu puo gei phituo, sidi thezei krü kijü ketsu tuoi hieko puo gei tsurlietuo; siro puo morei puo zeketuo kehoupuorei pesha pie balie lho.

¹³Mhanuü puoe nadiu nunu tsiesieta tse, Israel pete-e kero se nadiu nu vorlietuo, sidi hieko süu teshü se kerü nu votatuo, ketsie kecünuoyo puo zokecü rei kebachie siwa zotuo” sishü.

¹⁴Sitse Absalom mu Israelmia pete sie, “Arkit-u Hushai tarhokeshüu Ahithofel tarhokeshü ki vikuote” sita. Jihovae Ahithofel mharhüu penyüwatuoücü la, süusü Jihovae kepeka pie Absalom gei vorshüketuo la zo.

¹⁵Süsie Hushai sie zievomia Zadok mu Abiathar ki, “Hakemhie di Ahithofel-e Absalom mu Israel phichüko tarhoshü; mu hamhie di a ketarhoshüwe.

¹⁶Süla rükri di mia ketsepie David ki, ‘Tsiezhü rayha razhau nu zhü motalie, derei kehouchürei ketsa khie votaliecie, si mo liro kediu mu puo ze ketuokoe pete mezulie rei si lhomu’ ishüliecie” sishü.

¹⁷Siro Jonathan mu Ahimaz unie En-rogel nunu pfhe ba; kituopfü yopuoe haki vor di unie ki mha pushüyacü la, mu unie-e vo di kediu David ki pu lalieya; kekreilamonyü unie-e nadi nu ler di mia bu ngu suokecü la.

¹⁸Derei thepfuyo puoe unie nguwa, sidi Absalom ki puwa; süla unie kenienie rei rükri tuota, sidi Bahurim bu mia puo ki vorta, puoe puo kitiezha nu dzükhou baya; sidi unie-e sünu lelie.

¹⁹Sitse themiau kimiapfüe mha kewhe puo se vor dzükhouu whewa, sidi sügei telha khashüwa; süla sünu mhapuorei silie kenjüta.

²⁰Siro Absalom kituoko vor di kiu nu thenupfü ketso di sie, “Ahimaz mu Jonathan unie kirapuo ba ga?” sishü. Sitse thenupfü sie unie ki, “Unie-e rücüu cie vote” siwa. Sidi unie pfhü derei ngulie mota, sidi ukoe Jerusalem nu la vota.

²¹Ukoe tuoketa sie, themia nie dzükhou nunu parlie, sidi vo kediu David ki pushü. Unie sie David ki, “Sielie di tuo rükri dzüu cie votalie; kekreilamonyü Ahithofel n petsou di hakemhie pushüte” sishü.

²²Süla David mu puo zeketuo themia peteko sielie di tuo Jordan ciepata; sidi khise teiso kevor ki Jordan ciepfüliekemo nu miapuorei tuo mota.

²³Siro Ahithofel-e puo pukeshüu medzi moketa ngulie tse, puoe puo gada gei pfülie di tuo puo thuo puo nadiu nu puo kinu vorta. Siro puoe puo kinu mhako kepfewa, sidi puo thuo puo gou khriwa, sidi puo siata mu puo puou mekhru nunu puo khruwa.

²⁴Süsie David-e Mahanaim nu vorlie, süki Absalom-e Israel thepfumia pete ze di Jordan rüu ciepfü.

²⁵Siro Absalom-e Amasa bu Joab sounu rüpfhünuo mho kezhau chüta. Amasae Ishmaelmia[34] Ithra nuou, puoe Abigal, Nahash nuopfü Zeruia üpfü Joabnuo zuo lie.

²⁶Ishmaelko mu Absalom-e Gilid kijünu razhüchü balie.

²⁷Siro David-e Mahanaim nu vorlie tse, Raba nu Ammonmia Nahash nuou Shobi, Lo-debar nu Amiel nuou Makir, siro Rogelim nu Gilidmia Barzilai,

²⁸thezhüko, mekhouko mu rünyo liko, telha, barli thoulha, lhako, rücü mu kerhüthuokecü,

²⁹mepfhidzü mu thunudzü khie, tekuo, mu Chis David mu puo themiako bu cüketuo la se vor; kekreilamonyü ukoe sie, “Chüpahikoe rayha nunu merü, mezie mu terhü bate” isikecü la.