Read Angami Naga Samuel Kenieu 19 Bible Online

Samuel Kenieu 19 - Angami Naga bible

Samuel Kenieu 19

¹Sitse mia Joab ki, “Kediue kra di Absalom la thekrü chü bate” ishü.

²Süla sünhie kuokelie pie chüpahi pete bu thekrü kechü tei puo chüwa; chüpahi pete rei, “Kediue puo nuou la thenousuo bate” ikecü sikecü la.

³Sünhie chüpahiko pesikhuoi di nadiu nu vor, terhü nu taketamia mengaketuo kemhieta.

⁴Kediu puo zie dzelie mu kediu kra peto di sie, “He-i, a nuo Absalom, he-i, Absalom, a nuo sü, a nuo sü!” ita.

⁵Sitse Joab sükinu kediu ki ler, di sie, “No thie, n kerheiro, n nuonuoko thenu rei thepfu rei, tsiu n kimiako mu n pelipfüko kerheiro kelakeshü kezhamiako pete kengawate,

⁶kekreilamonyü no n ngumvümia khrie mu u kekhriemia ngumecüte. Noe thie nyie mho kezhako mu n kezhaü kekreimiako mhatho moükecü tha kemecüshüte; kekreilamonyü mhanuü Absalom tuoicü rhei ba mu hieko pete thie siata ükecüwe no n neikuota zoketuo a siliete.

⁷Süla sieliecie, sidi die kevi pupie n kituoko rüchüshücie; kekreilamonyü a Jihova za se rüsetuo, mhanuü no tuo pa mo liro, miapuorei tsiezhü n ze balie lho; sitacü sie n khriesa teiki nu vor tsie ketso n gei mha kesuo vorkecü ki kirei suokuo vorta zotuo” sita,

⁸Sitse kediu sielie di ke care ki balie. Siro chüpahiko pete ki “Harie, kediu care ki bate” isishü, mu chüpahiko pete kediu mhodzünu vor. Siro Israelmia pete ta u thuo u ki nu vota.

⁹Mu Israel seyie pete nu themia pete rei, “Kediue u ngumvümia dzie nunu u kelashü, siro puoe Filistinmia dzie nunu u kelashü, mu tsie we puoe Absalom la kijü hau nunu tatuote.

¹⁰Derei Absalom, we puo kenhe pie u mho shükeshüu, terhü nu siate. Süla tsie kiüdi kediu ze la vorketuo la pulie mo ga?” idi kepu boutuota.

¹¹Sitse kediu David-e dieliemia ketsepie zievonie Zadok mu Abiathar tsü di sie, “Juda pehüko ki, ‘Nieko kiüdi kediu ze puo ki la vortuoücü kenuotho-u chüya ga? Israel pete die vor kediu tso bate.

¹²Nieko a siezedzüriemia ze, niekoe a ru mu a chü ze, siü ro nieko kiüdi kediu ze la vortuoükecü kenuotho chüya ga?’

¹³Siro Amasa ki, ‘No a ru mu a chü mo me? Mhanüu tsie yawinu n bu Joab sounu a rüpfhünuo mho kezhachü moü liro, Ukepenuopfü bu sükemhiekecü, tsiu sükezie rei chüshü a gei shücie ishülie’ idi pushülie” sishü.

¹⁴Sitse Amasa Juda themia pete nou chüpie puo chüwa, sidi uko die ketsepie kediu ki shü di, “No mu n kituoko pete la vortaliecie” sishü.

¹⁵Süla kediu Jordan nu la vorlie, mu Juda kediu ze kesetuoü mu puo ze Jordan ciepashütuoü di Gilgal nu vor.

¹⁶Siro Benjaminmia Gera nuou Shimei, Bahurim nunu kevor-u, rükri Judamiako ze kediu David ze kesetuoü vor;

¹⁷mu Benjamin nu themia nyie puo puo ze tuo. Siru Ziba, Saul kinu kituou, puo nuonuo mia kerepengou mu puo kituo mia mepfü zelie di ta rükri Jordan nu kelie di kediu mhodzü rie vota,

¹⁸ukoe kerüu cie ketha ki, kediu kinuko zepfü tuoü mu puo nei chüshütuoü di. Sitse Gera nuou Shimei-e kediu mhodzü tetsu zhüta, puoe Jordan cietuoü ketha ki,

¹⁹sidi kediu ki, “A niepuu bu kejo-u pie a gei shü hieyi, morei a niepuu kediu Jerusalem nunu paketa nhie n kituoue mha kesuo chükeshüu no rükra hietayi, kediu bu süu pie puo nou shüse bata hieyi.

²⁰Kekreilamonyü n kituou ae phoumawaketa si bate; süla harie, a thie Josef kinuko donu a niepuu kediu ze kesetuoü vor keriethowe” sita.

²¹Sitse Zeruia nuou Abishai sie, “Shimei-e Jihova kenhekelieu rüsekecü la, mha hau la puo bu siata lhoü me?” sita.

²²Derei David sie, “A bu nie ze kedipuo chütuomu, nie Zeruia nuonuoko, nieko thie a ngumvümia chü tatieya me? Thie Israel nu mia bu sie siatatuo me? Thie a Israel nu kediu taükecü a si bata mo me?” sishü.

²³Sidi kediu sie Shimei ki, “No siatalie lho” sishü. Mu kediue puo ki rüseshü.

²⁴Siro Saul tsuu Mefibosheth-e kediu zekesetuoü ker; puoe kediu tuoketa nhie nu rhei di la vorcü ketso puo phi khrü mo, morei puo tiemie rei bewa mo, morei puo pfheneiko rei menyi mo.

²⁵Sidi puoe Jerusalem nunu kediu ze kesetuoü vor tse, kediu sie puo ki, “No kiüdi a ze tata mo ga? Mefibosheth” sishü.

²⁶Sitse puo sie, “A Niepuu, he-i kediu, a kituou a sewalie; kekreilamonyü n kituou puo ki, ‘Gada puo keseshü a tsücie, sitse a süu geinu ta kediu ki volietuo’ ishü. kekreilamonyü n kituou sü phiyhomia zeru.

²⁷Puoe a niepuu kediu ki n kituou dze pu pesuoshü. Derei a niepuu kediu ha Ukepenuopfü dieliemia kemhie; süla n mhiki viükecüu chüwacie.

²⁸Kekreilamonyü a kinuko pete a niepuu kediu mhodzü ki we kesiamia chüte; derei noe n kituou khapie puo bu n mizhü gei ba di mhacükecüko donu shüshü. Süla a kediu ki kedipuo pu saketuo ba ga?” sishü.

²⁹Sitse kediu sie puo ki, “No kiüdi n thuo n dze pu saya ga? A pepiliete; no mu Ziba nnie bu kijüu kezatuo” sishü.

³⁰Sitse Mefibosheth sie kediu ki, “Puo bu pete lieliecie, a niepuu kediu rhei di kinu la vorlieketa la” sishü.

³¹Siro Gilidmia Barzilai-e Rogelim nunu ker; sidi puoe kediu ze Jordan ciewatuoü puo ze Jordan nu vo.

³²Barzilaitsa phita, puo kelhouzha cie hiethethata. Puoe kediu Mahanaim nu keba ki kecüca pie puo tsüshü; puoe mhakenyimia puocü la.

³³Sitse kediu sie Barzilai ki, “No a ki tsurtacie, sitse a Jerusalem nu a khieki nu mha se morokesuoko kha n tsüshütuo” sishü.

³⁴Derei Barzilai kediu ki, “A bu kediu ze Jerusalem nu vonukecü ha a kichiepuo lhou satuo di mu?

³⁵A thie teicie hiethethate; mu a mha kevi mu kesuo si kekreilie viü di me? N kituou kedipuo cü mu krieya shi si kekreilie vi me? A tsierei thepfumia thepfhekechü mu thenumia thepfhekechü rünyü viütuo me? Siliro kiüdi n kituou bu a niepuu kediu keyhu tuo mu?

³⁶N kituou kediu ze Jordan tse za phishütuo. Kiüdi kediu zhakhra sikecü pie a tsütieya mu?

³⁷N pezie rei n kituou bu latacie, sidi a bu a thuo a rüna nu a puo mu a zuo unie mekhru khieki nu siatayi. Derei n kituou Kimham haki ba; puo bu a niepu kediu ze voliecie; sidi n mhodzü ki viücüu chüpie puo geishüliecie” sishü.

³⁸Sitse kediu sie, “Kimham-e a ze votuo, sidi a n mhodzüki kiu vi shi chüshü puo gei shütuo mu no a bu n la kedipuo chüshü nyüya shi a süu chüshütuo” sishü.

³⁹Sitse themia peteko Jordan cie vota, mu kediu rei ciepalie; siro kediue Barzilai meboshü di japie puo tsüshü, sidi puo tuo la puo thuo puo kinu vota.

⁴⁰Siro kediue Gilgal nu vozhü, mu Kimham rei puo ze vota; siro Juda themia pete siro Israelmia ketoupuoe kediu ze puo cha nu vota.

⁴¹Süsie Israelmia pete kediu ki vor, sidi sie puo ki, “Kiüdi hie siezedzürieko Juda themiakoe n rügu zeta, sidi kediu mu puo kinuko tsiu David themia pete Jordan cie vorshü ga?” silie.

⁴²Sitse Judamia pete Israelko die kela di, “Kekreilamonyü kediue hieko seyiemiakecü la zo. Siliro kidi nieko mha hau la nie nei moya ga? Hieko kediu vie cüükrielietaü ba me? Morei puo mha methuo pie hieko tsüwaü ba me?” sita.

⁴³Derei Israelmiako Judamiako die kela di, “Hieko kediu kitsa hie ya za ker ba, mu hie David kitsa rei hie nieko ki krakuo. Di siro kidi nieko hie ngumecüta ga? U kediu ze la vorketuo hieko pu rieshü mo me?” sita. Derei Judako die we Israelko die ki rekuota.