Read Angami Naga Samuel Kenieu 2 Bible Online

Samuel Kenieu 2 - Angami Naga bible

Samuel Kenieu 2

¹Süsie David-e Jihova ketso la di sie, “A bu Juda nadiko kehoupuo nu rei kholie vi mo mo ga?” sishü. Sitse Jihova sie, “Kholiecie” si. Siro David lasie, “Kiu nu a bu votuo ga?” sishü. Sitse puo sie, “Hebron nu kholie” sishü.

²Süla David-e puo kimianie, Jezrilpfü Ahinoam, mu Karmelpfü Nabal kimia Abigail ze di sünu kho.

³Siro David-e puo zeketuo themiako, mia puopuokecü u kicükinumia sa idi ze khor, sidi uko vo Hebron rünako nu lhouta.

⁴Sitse Judako vor, sidi David kenhepie Juda mho kedi chülie. Siro uko David ki, “Jabesh-gilidkoe Saul khrushüwe” idi pu,

⁵Sitse David-e dieliemia ketsepie Jabesh-gilid themiako ki pushü, di uko ki, “Jihova bu japie nieko ketsüu chülie, kekreilamonyü niekoe nie niepuu Saul gei ketseikevi thashü, sidi puo khruwaketa la!

⁶Süla tsie Jihova bu ngukemezhie mu ketho-u nieko gei thashüyi! Mu a rei nieko zhakhra chüshütuo, kekreilamonyü nieko mha hau chüshüketa la.

⁷Süla nieko dzie bu meteiliecie, mu thepfuliecie, nie niepuu Saul sü siate, mu Juda kiue a kenhepie a bu uko mho kedi chüliete” sishü.

⁸Derei Ner nuou Abner Saul rüpfhünuo mho kezhaue Saul nuo Ishbal[2] ze Mahanaim nu vor.

⁹Puoe puo chüpie Gilid, Ashurmiako, Jezril, Efraim, Benjamin mu Israel pete mho kedi chülie.

¹⁰Siro Saul nuou Ishbal cie hiedia ki Israel mho di sedelie, mu puoe cie kenie kedi chü. Derei Juda kiu zocüwe David siemedzita.

¹¹Siro David-e Hebron nu Juda mho dikecü cie thenie di khrü sorou.

¹²Siro Ner nuou Abner mu Saul nuou Ishbal kituoko Mahanaim nunu tuo se Gibeon nu vo.

¹³Siro Zeruia nuou Joab mu David kituoko pra di Gibeon dzükhou khieki nu kese. Uko kro puo dzükhou tietsa puo balie mu kro kekreiue dzükhou kekreitsa balie.

¹⁴Sitse Abner sie Joab ki, “Khriesako bu tuo pra di u mhodzünu rüzhü kemetsa khe” sishü. Sitse Joab sie, “Uko bu parlie” sishü.

¹⁵Süla ukoe tuo par, mu mia kerekenie Benjamin mu Saul nuou Ishbal la, tsiu David kituoko rei mia kerekenie.

¹⁶Siro uko mia puopuokecü puo kepetsouu teshülie, sidi zhiecha pie puo kepetsouu tsei zeshü. Süki uko keze tetsu phreta. Süla thechü süu zapie Helkat-hazurim[3] iya, süu Gibeon nu ba.

¹⁷Sünhie terhüu re se; mu David kituokoe Abner mu Israelmiako penyüwa.

¹⁸Siro Zeruia nuo thepfumia se Joab, Abishai mu Asahel hako sünu ba. Siro Asahel-e puo phi mesapie chüzhie tuoi zo.

¹⁹Asahel-e Abner whuo puo zatsa morei puo vitsa rei vata mo zo volie.

²⁰Sitse Abner puo sietsa rürei la vo di sie, “No Asahel me?” ishü, sitse puo sie “U, a süuwe” sishü.

²¹Abner sie puo ki “Rürei thezatsa morei thevitsa vata, sidi khriesako mia puo teliecie, sidi puo mha vakelie pielie” sishü. Derei Asahel puo siemedzi ketuo nunu rürei mvüta.

²²Süsie Abner la sie Asahel-e ki, “A siemedzi ketuo nunu rüreitaliecie; kiüdi a bu n dukhripie kijüshüwatuo mu? Siwa ro süsie a bu kedipuo mhie di a ziepie n dzürieu Joab pengulie ta?” sishü.

²³Derei puo la mvüta. Süla Abner-e puo ngou tieu pie puo va zephawa, mu puo sietsa zepha pata. Sidi puo sünunu tetsuta, sidi puo tetsuketa chaüu nunu siata. Siro themia Asahel tetsu di siazhüketa chüu nu kevor pete thopfü thata.

²⁴Derei Joab mu Abishai unie Abner whuo zo vota. Sidi niaki letakezhü ki unie Ama kijüthou-u gei Gibeon rayhau kevatsa Gia mhodzünu kebau nu vor.

²⁵Siro Benjaminko vor Abner khrükhro nu kengulie di keze kro puo chülie, ukoe kijükhruu mezü gei thalieta.

²⁶Sitse Abner Joab kie di, “Zhiechau bu kechachie mia peka ba zotuo me? Kenuotsa süu pfhü taketuo no si mo me? Kedipuo nu no n themiako bu u siezedzüriemia whuo motanu di puwatuo ga?” sishü.

²⁷Sitse Joab sie, “Ukepenuopfü rhei ketuo mhiei, mhanuüu no diepushü mo tse, themiako rülei mo di khise ketso u siezedzürieko whuotuo muü” sishü.

²⁸Sitse Joab ketsü khoushü mu themia pete thata; sidi uko Israel whuo sa mota morei terhü kegei sa mota.

²⁹Siro Abner mu puo themiako süzhü teizeizha pete Araba nu tuo zo, sidi uko Jordan cieparlie; mu thehe mhodzü tuotuo di uko Mahanaim nu vorlie.

³⁰Joab-e Abner whuo ketuo nunu la vorta; mu puo themiako kie kengukelie ki, Asahel sakemo David kituoko mia kerethepfü pfhü pejüta.

³¹Derei David kituou Abner Benjaminmia mia krie se di hie sorou dukhriwa.

³²Siro ukoe Asahel pielie di se vo puo puou mekhru nunu puo khruwa, süue Bethlehem nu ba. Joab mu puo themiako teizeizha pete tuotuo, sidi teiso parcü ki Hebron nu vorlie.