Read Angami Naga Samuel Kenieu 20 Bible Online

Samuel Kenieu 20 - Angami Naga bible

Samuel Kenieu 20

¹Siro sünu themia kesuo se puo baya, puo zae Sheba, Bikri nuou, puoe Benjaminmia. Siru puoe ketsü puo khoushü di sie, “Úko David kitsa u ya ba mo, Jese nuou kitsa hieya jü! Kehoupuorei u thuo u pfheki nu votalie, he-i Israel!” sidi shieshü.

²Süla Israelmia pete David kinunu tuota sidi Bikri nuou Sheba siemedzita; derei Juda themiako we Jordan nunu vo Jerusalem ketso David siemedzi zo vo tsolie.

³Siro David-e Jerusalem nu puo kiu nu vorlie; sidi kediue puo pelipfü kerko, puo uko bu ki pfhe baketako zelie, di uko khapie kepfhemia bu pfhe bata, mu uko caüvako khashü, derei uko ki we le sa mota. Süla uko bu samimia kemhie di uko se ketso uko khapfü di lhou.

⁴Süsie kediu sie Amasa ki, “Teisozha se donu Judamiako kie kenguliecie, tsiu no rei sa hanu vor baliecie” sishü.

⁵Süla Amasae Juda themiako kiekengutuoü vota; derei puoe puotei chiepie puo ketsüu zie bata.

⁶Süla David sie Abishai ki, “Sheba nuou Bikri-e Absalom kirei mhapeka krashülie vite; süla no niepuu kituoko zelie di puo sie whuocie, moro puoe puo dahou houpie keba nadiko lielie di u kinunu tata rei silie lho mu” sishü.

⁷Sitse Joab themiako Keretmiako, Peletmia mu terhümiaviko pete keze puo sie whuo vota; ukoe Jerusalem nunu pata di Bikri nuou Sheba whuo.

⁸Siro ukoe Gibeon nu ketsie kezhau khieki volie tse, Amasae uko ze kesetuoü vor. Siru Joab-e chüpahimia pfhenei setuo, tsiu süu mhogei zhiecha puo shie pie puo leikhei gei goupfütuo; mu puoe tuo vo zhükecü ki süu rüzuta.

⁹Sitse Joab sie Amasa ki, “A siezeu no vituo zo mo?” ishü. Sidi Joab-e puo mebotuoü puo dzie puo zatsa pie puo tiemie teshülie.

¹⁰Derei Amasae Joab dzienu zhiecha ketuou ngu mo; mu Joab-e süu pie puo va zewa di puo rie bu rüla kijü tsuta, sidi puo siata. Mu puoe va kenie pie ze sa mota. Süsie Joab mu puo siezeu Abishai unie Bikri nuou Sheba whuo vota.

¹¹Siro Joab themiako mia puoe Amasa khieki thalie di sie, “Supuonie Joab kitsa mu David kitsa puo neiya shi, puo bu Joab siemedziliecie” sishü.

¹²Süki Amasae tetsu cha metsuo nu puo thuo puo zie nu zhü, mu themiaue themia peteko thathaketa ngushü, siro themiaue themia kevor pete thaketa ngushü tse, puoe cha metsuo nunu Amasa chü keyiepie lieu nu shüwa, sidi pfhe puo kelha pie puo whewa.

¹³Siro puo cha metsuo nunu puo chüwa mumetha, themia pete rei Bikri nuou Sheba whuotuoü Joab siemedzi vota.

¹⁴Siro Sheba Israel seyie pete nunu vo Beth-maka[36] nunu Abel ketso vo; sitse Bikrimia pete vo kengulie, sidi puo siemedzi lata.

¹⁵Siro Joab chüpahiko vor Beth-maka Abel nu puo whuo; ukoe nadiu petsoukecü thekre thielie, sidi le thekre thiekelieko nu thalie. Siro Joab chüpahikoe dahou biemewatuoü sie.

¹⁶Sitse thenumia mhakesipfü puoe nadiu nunu mia kie di, “Rünyüshücie! Rünyüshücie! Joab ki, ‘Haki vorcie; a n rüchü nyü balie’ ishülie” sishü.

¹⁷Sitse puoe puo penuo phir, ru thenupfü sie, “No Joab me?” si. Puoe sie, “U we” sishü. Sitse hapfü sie puo ki, “N kituopfü dieko rünyüshücie” ishü. Sitse puo sie, “A rünyü ba zo,” ishü.

¹⁸Sitse hapfü sie, “Thiedzümia we sie, ‘Uko bu vo Abel nuou ketsocie’ idi mha pepiya.

¹⁹Ae Israel nu mia ze kezevi mu dietho di lhou bayakezhapfü puo; noe Israel nu keba nadi; Israel nu miazuopfü pekawatuoü pfhüya; no kiüdi Jihova kayieu mezulietuoü pfhüya ga” sishü.

²⁰Sitse Joab sie, “A mha mezulie morei pekatuoükecüu bu a penuo hie, süu bu a therhietacie!

²¹Mha süu mote! Derei Efraim kijü khruu gei mia puo, puo za Sheba, Bikri nuou, puo dzie yhapie kediu David petsoute; puo khashücie, sitse a nadiu nunu tuotatuo” sishü. Sitse thenupfü sie Joab ki, “Dahou mho geinu puo tsü kelhoushü n tsüshütuo ho” sishü.

²²Sitse thenupfüe mhasi nu rhü seketuou pie themia peteko ki vo. Sitse ukoe Bikri nuou Sheba tsü zielie, sidi süu kelhou pie Joab tsüwa. Süla puoe ketsüu khoushü, sidi ukoe nadiu nunu tuota, mu uko pete u thuo u kinu vo phreta, mu Joab-e Jerusalem nu kediu ki vota.

²³Hateiki Joab-e Israel rüpfhünuo pete mho kezha chü ba;[37] Jehoiada nuou Benaia-e Keretmia mu Peletmia mho kezha chü;

²⁴siro Adoram-e mhatho themiako mho ba; Ahilud nuou Jehoshafat-e kethuu chü;

²⁵Sheva bu kethuu chü; Zadok mu Abiathar bu zievo chü;

²⁶tsiu Jairmia Ira-e David zievo-u chü.