Read Angami Naga Samuel Kenieu 21 Bible Online

Samuel Kenieu 21 - Angami Naga bible

Samuel Kenieu 21

¹Siro David teiki teicie se pekrie vor, teicie puo sie puo idi, teiciekepa sita; süla David sie Jihova ketsota. Sitse Jihova sie, “Thezie pekrukecü kejo-u Saul mu puo kiu gei bate, kekreilamonyü puoe Gibeonko dukhriwate” sishü.

²Süla kediue Gibeonko kielie di sie uko ze kerüchü (Gibeonko ha Israelmia mo, derei Amormia lhiekeshümia zo; Israelkoe uko kelashütuoü rüsepie zhü zorei, Saul-e Israelmiako mu Judako la puo nou mehü di uko pekawatuoü sieta.)

³Sitse David sie Gibeonko ki, “A bu nieko la kedipuo chüshütuo ga? Nieko bu japie Jihova kayieu tsülieketuo la, a bu kedipuo se phousou chütuo shi?” si.

⁴Sitse Gibeon sie puo ki, “Hieko mu Saul morei puo kinuko donu thenyie hau rakachü morei suna pie chükelie vie mo; morei hie la nieko Israel donu miapuorei dukhriwalie lho” ita. Sitse puo sie, “A bu nieko la chüshüketuo nie kedipuo putuo ga?” si.

⁵Sitse “Hieko bu Israel kijü pete nu thechü puo nu rei balie lhoü di hie pejüwatuoü mu pekawatuoü di kesieu

⁶nuonuo thepfuko mia thenie khapie hie tsücie sitse hie Gibeon nu Jihova kijüthou gei Jihova mhodzünu uko gouwatuo” sishü. Sitse kediu sie, “A uko khashütuo” sishü.

⁷Derei kediue Mefibosheth, Jonathan nuou, Saul tsuu peshashü, kekreilamonyü David mu Saul nuou Jonathan unie donu Jihova ki keshü rüse puo tuo.

⁸Siro kediue Aia nuopfü Rizpa nuo thepfumia kenie, puoe penuopie Saul ketsü nie, Armoni mu Mefibosheth tsiu Saul nuopfü Merab nuonuo thepfu pengou, hapfü penuopie Meholatmia Barzilai nuou Adriel ketsüko zelie;

⁹sidi puo hako khapie Gibeonko dzienu shüshü, mu ukoe kijüthou gei Jihova mhodzünu uko gouwa. Sidi uko mia thenieko keze siata. Sidi lieyie teisozha therie ki, barli lie kere therie ki uko bu siata.

¹⁰Sitse Aia nuopfü Rizpa-e gakhropfhe chülie, sidi puoe lie kere nunu vo teigei nu teirü ketsur ketso, süu kelhapie tsiekrie puo gei shülie; siro hapfüe teirako bu khinhie gei, morei khunuoko bu theva geinu uko moko gei kevor khawa.

¹¹Siro mia David ki Aia nuopfü Rizpa, Saul pelipfü kedipuo chüshü shikecü pushü.

¹²Sitse David-e vo di Jabesh-gilidko ki nu Saul mu puo nuo Jonathan ruko chülie, sükoe Beth-shan zieke nunu süko rügulieta, Filistinmia-e Gilboa geinu Saul dukhriwakecü nhie, Filistinmia sünunu unie gou piezhawa;

¹³sidi puoe Saul ruko mu puo nuou Jonathan ruko se vorlie; siro goupiekezhako ru rei rhuo kengulie.

¹⁴Sidi ukoe Saul mu puo nuou Jonathan ruko pie Benjamin kijü nu Zela puo puo Kish mekhru nunu khruwa; ukoe kediu pukeshü pete chülie. Süsietsa Ukepenuopfüe kijüu la u mezhiemelokeshüko rünyülie.

¹⁵Filistinkoe Israel ze terhü chütuoü di vo, mu David rei puo kituoko ze vo. Sidi ukoe Filistinko ze kegei, süki David phisiata.

¹⁶Sitse Ishbi-benob, kezhakechamia nuonuo puo, puo ngou mesi thegi shekel krie sekecü, tsiu rünyie kesa[38] pfüketuoue David dukhriwatuoü puta.

¹⁷Derei Zeruia nuou Abishai vor puo khruohilie, sidi Filistin-u perhie di puo geiwa. Sitse David themiako sie puo ki rüse di, “N bu hasie we hieko ze terhü nu pa salie lhote, sitse no Israel nu mitu pemhewa molietuo” sita.

¹⁸Mha hako sie, Gob nunu Filistinko ze terhü kegei; süki Hushat-u Sibekai-e Saf, themia kezhakechamia yie puo dukhriwa.

¹⁹Süsie Gob nu Filistinko ze terhü kegeikecü puo ba la; sitse Bethlehemmia Jaare-oregim nuou Elhanan-e Gitmia Goliat, puo ngou dzübo mhie zokecüu dukhriwa.

²⁰Süsie rei Gath nu terhü kegei, sünu kezhakecha mia puo dziekinuo sorourou, mu puo phi kinuo sorourou, kesa mepfüedia ba; puo rei kezhakecha yiemia.

²¹Sidi puo Israel pese phir tse, David siezeu Shimei nuou Jonathan-e puo dukhriwa.

²²Mia dia hako Gath nu kezhakechamia yie nu vor, ukoe David mu puo kituoko dzie nunu tetsuta.