Read Angami Naga Samuel Kenieu 22 Bible Online

Samuel Kenieu 22 - Angami Naga bible

Samuel Kenieu 22

¹David-e Jihova puo ngumvümia pete dzie nu mu Saul dzie nunu puo kelakeshü nhie, puoe Jihova ki die hako pushü.

²Puoe sie; Jihova sü a tsiekrieu, a dahou, mu a kelakelieu,

³a Kepenuopfü, a tsiekrie, a puo geinu rüzhükelieu, a zhüu mu a kelakelie kiau, a kemeteiu mu a keyau, a kelakelieu; noe kepeka nunu a kelashü.

⁴A Jihova kieshü, puoe tshekezhüu zo, sitse a ngumvüko dzienu a kelaliete.

⁵Kesia khrüu vor a houpfülie, kepeka dzü kru vor a va;

⁶Sheol roko vor a phalie, kesia bieko a ze kese.

⁷A kemezhiekecü nu a Jihova kieshü; a Kepenuopfü ki melieshü. Puoe puo rüsuoki nunu a pfhe silie, mu a kekrau puo nyienu lelie.

⁸Sitse kijüu mele di peta; teiko mvüdzeko pe mu rünieta, puoe puo nei moketa la.

⁹Puo nyhü nunu mikhu par, mu puo me nunu mhathe pejükelie miü par. puo geinu mizhü ketu par.

¹⁰Puo teigeiko bie kerünuoshü, mu süu tetsur, zeide-ikecü puo phikhro ba.

¹¹Puo Cherub geituo, sidi pruota; puoe teikhrieshü gei tuo di mia bu puo ngu,

¹²Puoe kezei pie puo houlie di puo kebachü chülie, kimhou shüde-ikecü, dzüko bie kengulie.

¹³Puo mhodzünu mha vavaikecü nunu mizhü ketu par.

¹⁴Jihovae teigei nu melieshü; Kerükrietho-u puo pfhe phrashü.

¹⁵Puoe theü cieshü, sidi süko kezakeziwa, teimelashü, sidi uko ta vota.

¹⁶Süsie dzükezha chako ngu parta, kijü mvüdzeko ngu parta, Jihova kerhiekeshü ki, puo nyhü nu hakeshü ki.

¹⁷Puoe peso geinu a tsolie, puo a teshülie, puo dzü kekra keba nunu a teshü se parliete.

¹⁸Puoe a ngukemvü re sekecü nunu a kelashü, themia a mecüyakezhako ki nunu; kekreilamonyü sükoe a la kuothor zo.

¹⁹Sükoe a kemezhiekelie nhie a gei vor, derei Jihova la a balie.

²⁰Puoe a ze thechü kemeya puo nu vorshü; Puoe a kelashü, puoe a ngu puo neiyakezha la.

²¹Jihovae a miatho kize a zhakhra chüshü; a dzie kemesa ki ze puoe a zhakhra chüshüte.

²²Kekreilamonyü ae Jihova zhoko ze balie, mu rügerüzhü di a Ukepenuopfü therhieta mo.

²³Kekreilamonyü puo zhoko pete a mhodzü ki ba zo, mu puo kepetha dieko nunu a rüreita mo.

²⁴Ae puo mhodzüki mezhü tuo zo, sidi kephouma nunu a thuo a kerei setuolie.

²⁵Süla Jihovae a miatho kize, puo mhiki mesakecüu ze di a zhakhra chüshüte.

²⁶Diethokecüko gei n thuo n dietho thashü, mezhükecüko gei n thuo n kemezhü thashü;

²⁷Mesakecüko gei n thuo mesakecü thashü, mu rüpfhikecüko gei no n thuo n zho kesuo thashü.

²⁸Noe rünuomenekecümia kelashü, derei kesuoko bu tetsutatuoücü la n mhi-e süko gei baya.

²⁹Ketho zo, noe a mitubouu zo, he-i Jihova, Jihovae a kezeiu bie pezieshü.

³⁰N geinu ae chüpahi kro-u bietshiewalie vi, tsiu a Ukepenuopfü geinu ae prou dahou cie palietuo.

³¹Ukepenuopfü hau-puo cha vitsei; Jihova phrakeshüu ketho ücü thashü; puoe puo rüzhü kevorko pete keyau zo.

³²Kekreilamonyü supuo Ukepenuopfü ga? Jihova mo di! Siro supuoe tsiekrieu ga? Kepenuopfü rübei zowe!

³³Ukepenuopfü kekuo se a chiephakeshüu, sidi a chau chü kemeyashüte.

³⁴Puoe a phi chüpie chüzhie phi tuoishüte, sidi a bu kerükrieko gei khrukhre balie.

³⁵Puoe terhü la a dzie pethashü, sidi a boue merenyi theü kehoulie vite.

³⁶Noe n kelakelie pezhüu se a tsüshü, sidi n kekhruohiu[39] a chü pezhashü.

³⁷Noe a phichako chü kerüüshüi, sidi a phi bu tsierhieta mo;

³⁸A a ngumvümiako whuo vo di uko pekawa, mu uko pejüwa kemochie morei la mo zo

³⁹A uko pekawa; a uko biekhriwa, süla uko lasielie lhote; uko a phi khro lerte.

⁴⁰Kekreilamonyü no terhü la kekuo pie a chiephashü; noe a kepetsouko bu a khro rüle lete.

⁴¹Noe a ngumvüko bu u chie kereipie a tsü, a ngumecüyakezhako, di a bu uko pekawa.

⁴²Uko meho sie, derei miapuorei uko kelalie kenjüta; uko Jihova ki melieshü, derei puo uko pfhekhoshü mo.

⁴³Ae uko vütshiepie kijünu nyophe kemhiewa, a uko bietshielie sidi chaü nu nyoba tuoi kedewa.

⁴⁴Noe themia kebvükebou keba donu a kelashü;[40] no a bu seyieko tsüu chüshü; a sikemo themiako bu a liechü

⁴⁵Chazoumia vor di u khapie a tsü; uko a pfhe si mumetha, uko a diezete.

⁴⁶Chazoumia u nouthachüte, sidi u dahou kemeteiko nunu pe vor.

⁴⁷Jihova rhei ba! A tsiekrieu tsheliecie, sidi a Ukepenuopfü, a kelakelie tsiekrieu bu zapuzayie chüliecie,

⁴⁸Ukepenuopfü, a khepushü, mu themiako bu a khro letaya kezhau,

⁴⁹Puoe a ngumvüko dzie nunu a shüphrashü; no sü a chü kerükriepie a petsouyakezhako mhodzü shüwate, no sü mha pekakezhamia dzie nunu a kelaliete.

⁵⁰Hau la seyieko donu a n pu kerükrietuo, he-i Jihova, sidi n za tshekecü tsali chütuo.

⁵¹Puoe puo kediu la kelakelie dahouu zo, sidi ketseikevi se puo kenhekelieu gei, David mu puo nuosenuoyieko gei kechachie la pekieshüya.