Read Angami Naga Samuel Kenieu 23 Bible Online

Samuel Kenieu 23 - Angami Naga bible

Samuel Kenieu 23

¹Hako David die thelako: Jese nuou David die, Ukepenuopfü chü pezhakeshü themiau die, Jakob Kepenuopfü thuo puo kenhekelieu, Israel Kekuou keneitho-u:

²Jihova ruopfüu a geinu die pushü, puo die a meü nu tuo.

³Israel Kepenuopfü pushüte, Israel Tsiekrieu a ki pushü; dietho di themia Kekhayakezhau, Kepenuopfü keprei nunu mhakekha sekebau,

⁴Puoe khise kezieu mhie zo, khise kimhou jü di niaki thukepar mhie, kijü nu nha thekeba gei teirü pie vashü di phriephriekeba tuoi zo.

⁵Ukepenuopfü ze di a kiu rei hailie moü me? Kekreilamonyü puoe a ze di kechachie dietseidiekho puo chüliete, mha pete nu diekhashü mu khrukhre bate, puoe a kekhruo mu a mengu pete chüpie vikechülie motuo me?

⁶Derei pelekemomia[41] pete a la we zohu kelhouwaketa mhie zotuo, sükoe u dzie se chülie kenjücü la;

⁷Süko nyüketuo la mia thegi morei rüngou jü seya. sidi puo chü nunu mipie süko the pejüwaya.[42]

⁸David themia terhümiavimiako za hako: Tahkemon-u Josheb-bashebet, puoe mia Seko mho kezhau, puoe va puo nu puo ngoupie mia krie thetha geiwa.

⁹Siro puo sie terhümiavimia seko donu mia puo liro Ahohi nuo Dodo nuou Eliazar. Filistinko terhü chütuoü vor kengukelie nu puoe David ze di uko chie. Israelmiako tsie sieta,

¹⁰derei puoe puo chü nu tha zolie. Sidi puoe puo bou mezieta kemochie Filistinko bie zo thalie, puo zhiecha thezepie tha zolie. Jihovae sünhie uko bu kuo pevi philie. Süsie themiako puo ki la vor derei kesiako gei mhanya bieketuo la rübei zo.

¹¹Siro puo sieu liro Hararmia Agi nuou Shama. Siro Filistinko vo Lehi nu kengukelie ki, süusü rücü thuo tshukecü lie puo, mu chüpahiko Filistinko kinunu tata.

¹²Derei puo lieu metsuo nu thalie, sidi süu yalie, sidi Filistinko dukhriwa; sidi Jihovae kuo pevi phikelie se vorshü.

¹³Siro liekere sede ki miavimia mia serko donu mia se-e tuo Adulam tsiepfüu nu David ki ker, süki Filistin kro puoe Refaim razhau nu ba.

¹⁴Siro David-e dahou kemetei nu ba; mu Filistin chüpahikoe Bethlehem nu ba.

¹⁵Sitse David-e dzü mengu se di sie, “He-i mia puo tuoicü vo Bethlehem nu kharu ki dzükhouu nunu dzü pie vor a bu krieücü we!” ishü.

¹⁶Sitse terhümiavimia sekoe Filistin chüpahiko pfüthe vo di Bethlehem nu kharu ki dzükhouu nunu dzü ülie, sidi süu se vor David tsü. Derei puo süu krie mvüta; sidi puoe süu ru pie Jihova ki shü.

¹⁷Sidi puoe, “A bu hau chü a thiediu chü, he-i Jihova. U thuo u kelhou pie kemichie nu keshümia zie ae krietuo me?” Süla puo süu krie lho üta. Terhümiavi se hako mha hako chüwe.

¹⁸Siro Joab siezeu Zeruia nuou Abishai-e mia Serko[43] donu kezhau chü. Puoe puo ngou se di mia krie se perhie, sidi süko geiwa, di mia Seko donu puo za kralie.

¹⁹Siro puoe mia Serko donu therhutho-u, sidi uko mho kekhakecüu chülie; derei puoe Seko mia puo chülie mo.

²⁰Jehoiada nuou Benaia-e Kabzil nunu kevor terhümiavi kethepfu puo, mhakezha chüyakecü mia puo; puoe Moabmia Ariel nuo kenie biewa. Siro puo pekrie krükecü teiki tsu di kheho puo nunu losha puo geilie.

²¹Süsierei puoe Ijiptmia khriesa zivi secü puo geiwa; Ijipt-ue puo dzie nu rüngou theze setuo; derei Benaia kethe puo se di puo perhie vo di Ijipt-u dzie nu rüngouu selie, sidi süu ngou-u pie süu geiwa.

²²Sükemhiekecü Jehoiada nuou Benaia chüshü, sidi terhümiavimia seko ze puo za kralie.

²³Puoe mia Serko donu therhu pfü phi, derei mia Seko mia puo chülie mo. Siro David-e puo bu puo kepfheko mho kezhau chü.

²⁴Siro mia Serko donu hako rei sa; Joab siezeu Asahel, Bethlehem-u Dodo nuou Elhanan;

²⁵Harod-u Shama; Harod-u Elika;

²⁶Paltmia Helez, Tekoamia Ikesh nuou Ira;

²⁷Anathoth-u Abiezer, Hushatmia Mebunai;

²⁸Ahohit-u Zalmon; Netofa-u Maharai;

²⁹Netofamia Bana nuou Heleb; Benjaminmia Gibia-u Ribai nuou Itai;

³⁰Pirathonmia Benaia; Gash rücüu nu keba Hidai;

³¹Arbatmia Abi-albon; Bahurimmia Asmaveth

³²Shalbon-u Eliahba; Jashen nuonuoko: Jonathan

³³Hararmia Shama nuou, Hararmia Sharar nuou Ahiam;

³⁴Makamia Ahasbai nuou Elifelet; Gilonmia Ahithofel nuou Eliam;

³⁵Karmel-u Hezro; Arbi-u Parai;

³⁶Zobamia Nathan nuou Igal; Gadmia Bani;

³⁷Ammonmia Zelek, Birotmia Naharai, Zeruia nuou Joab rüngou kepieu;

³⁸Ithritmia Ira; Ithritmia Gareb;

³⁹Hitmia Uria-pete kesa mia serethenie.