Read Angami Naga Samuel Kenieu 24 Bible Online

Samuel Kenieu 24 - Angami Naga bible

Samuel Kenieu 24

¹Siro Jihovae Israel gei puo noumeyie lata, sidi puoe David nou chüpie uko petsou di sie, “Vo di Israel mu Judamiako phrücie” si.

²Süla kediue puo zeketuo Joab mu rüpfhünuo mho kezhako üse, “Vo Dan nunu Beer-sheba ketso seyie pete nu volie, sidi themiako phrülie, sidi a bu themia kide ba shiü siliecie” sishü.

³Derei Joab sie kediu ki, “N Kepenuopfü Jihova bu themia kedithede puo ba shiü, süde thekrie sa pekrashükelieu chüliecie, sidi a niepu kediu mhi bu süsü ngukelieu chücie! Derei kiüdi a niepuu kediu mha hau chütuoüte shi?” ishü.

⁴Derei kediu die-e Joab mu rüpfhünuo mho kezhako mho kuota. Süla Joab mu rüpfhünuo mho kezhakoe Israel nuolhou phrütuoü kediu mhodzünu nu prata.

⁵Siro uko Jordan cie pralie, sidi Aroer nunu sede di razha metsuo nu nadiu nunu zo Gad kevatsa Jazer nu zo vota.

⁶Süsie uko Gilid nu vorlie, sidi tuo Hitmia kijünu[44] Kadesh nu volie; sidi uko Dan nu vorlie, mu Dan[45] nunu uko Sidon khieümhoura volie,

⁷sidi Tur dahou kemetei nu vorlie mu Hitmia mu Kanan nadiko pete nu vorlie, sidi uko Beer-sheba nu Juda nu Negeb ketso vo.

⁸Siro uko kijü süko pete whiwa tse, ukoe khrü thepfü di zha mepfü nhie Jerusalem nu vorlie.

⁹Sidi Joab-e themia phrükelieko dze se kediu ki pushü; siro Israel nu chüpahi zhiecha selie kevi mia nyie krie thetha ba, mu Juda nu mia nyie krie pengou ba.

¹⁰Derei kenuotsa David-e puo melou suota, puoe themiako phrükewa la. Sitse David-e sie Jihova ki, “A mhatho chüwaketau la phouma pezhathorwate. Derei tsie, he-i Jihova, a n ki chaya, n kituou kephouma chüsetayi; kekreilamonyü nyathorkecü mhatho chüwate” sishü.

¹¹Siro David khise sielie tse, Jihova die Gad siedzekesiu, David kepethau ki vor di sie,

¹²“Vo di David ki pushücie: Jihova hakemhie puya: A mha se kha n tsüya; süko donu puo kedaliecie, sitse a süu chüpie n tsütuo” sishü.

¹³Süla Gad-e David ki vor di puo ki pushü; puoe puo ketso di, “Teicie se pekrie bu n kijü vortuo mo? Mo khrü se n ngumvümia bu n whuo di uko mhodzünu tatuo tuo ga? Mo thepe bu teisozha se n kijü nu vortuo ga? Tsie leshü di pepishülie, a bu se vo a ketsekeshüu ki pushüketuo la” sishü

¹⁴Sitse David sie Gad ki, “A kemezhie se bate, hie bu Jihova dzienu letacie, kekreilamonyü puo ngukemezhie zhathor zo; derei a bu we te themia dzienu leta hieyi” sishü.

¹⁵Süla Jihovae khise nu vo puotei chiekeshüu ketso thepe puo ketsepie Israel nu shü; sidi Dan nunu vo Beer-Sheba ketso mia nyie hiethenie siata.

¹⁶Derei teigeidielieu puo dzie yhapie Jerusalem pekawatuoü sie tse, Jihovae mha kesuou la puo nou kedita, sidi kepeka se themiako gei vorkeshüu ki “Ci zorei vite, n dzie kethetalie” ishü. Süki Jihova dielieu Jebusmia Arauna shieu khieki tha.

¹⁷Siro David-e teigeidielieu themia pekakewau ngu tse, puoe sie Jihova ki, “A rübei phoumakewa zo, mu a a rübei mha kesuou chüwate; derei tekuo hako kedipuo chüwata ga? A n ki chaya n dzie bu a mu a puo kiu petsouliecie” sishü.

¹⁸Sünhie Gad-e David ki vor di sie, “Vo di Jebusmia Arauna shieu nunu ruosuoba puo chüpie Jihova tsücie” sishü.

¹⁹Siro Gad pukeshü tuoi, David tuo kho, Jihova diekhakeshü mhie di.

²⁰Siro Arauna mehoshü tse, kediu mu puo kituoko tuo puo kitsa vorkezhü ngulie; sitse tuo pra di vo puo khapie kediu mhodzü tsu kijü zerepfü zhüta.

²¹Sidi Arauna sie, “Kiüdi a niepuu kediu puo kituoko ze vorzhü ga?” ishü. Sitse David sie, “Ruosuoba puo chüpie Jihova tsütuoü di n ki shieu khrütuoü di lie, sidi themiako gei thepeu bu lalieketuo la” sishü,

²²mu Arauna sie, David ki, “A niepuu kediu bu lielie di puo mhodzü ki viücüu chüliecie; hakiha kethe ruosuo la pedo tsiu mha kege nyako mu sei chülieketuo la pedo vocieko bawe.

²³He-i kediu, hako pete, idi Arauna se kediu tsüshü.” Sitse Arauna sie kediu ki, “N Kepenuopfü Jihova bu n gei puo neikelieu chüliecie” ishü.

²⁴Derei kediu sie Arauna ki, “Mo, derei a puoma puo sa di n kinu khrü petuo zotuo; siro a puoma puorei chü kemo se kethe ruosuo chüpie a Kepenuopfü Jihova tsülie lho zo” ishü. Süla David-e shieu mu pedo la rakachü shekel hiepengou pie khrülie.

²⁵Siro David-e sünunu ruosuoba puo chüpie Jihova kishü, sidi kethe ruosuo mu vitho ruosuo khashü. Siro Jihovae kijüu la puo kechau rünyülie, sidi Israel gei thepeu chükediwa.