Read Angami Naga Samuel Kenieu 3 Bible Online

Samuel Kenieu 3 - Angami Naga bible

Samuel Kenieu 3

¹Siro Saul kinuko mu David kinumiako terhü chü cha phita; David-e kuo miemie sieta mu Saul kinumiako thachü miemieta.

²Hebron nunu thepfumia penuopie David ketsüko nuorieu Amnon, Jezrilpfü Ahinoam nuou;

³kenieu Kilib, Karmelpfü Nabal kimia Abigail nuou; seu Geshurmia kediu Talmai nuopfü Maka nuou Absalom,

⁴diau Hagitpfü nuou Adonija; pengouu Abitalpfü nuo Shefatia;

⁵mu sorouu Ithriam, David kimia Egla geinu penuolie. Hako Hebron nunu penuopie David tsü.

⁶Siro Saul kinumia mu David kinumia donu terhü chüta, siro Abner-e Saul ki nunu puo thuo puo chü kemeteilie.

⁷Siro Saul pelipfü puo nyi, puo za Rizpa, puoe Aia nuopfü. Siro Ishbal sie Abner ki, “Kiüdi no a puo pelipfü ki le ga?” sita.

⁸Süla Ishbal die hau Abner nou chü kemeyie sewa; puo sie, “Ae Juda la tefü tsüu üya me? Thie ketso ae n puo Saul gei siro puo siezedzürie gei mu puo zeko gei ketseikevi mu dietho tsei ketuo thashü tuo zo, sidi n khapie David dzie nu shüwa mo zo; sirei no tsie thenu hapfü la puotou kemo se puo pie a peda bate.

⁹Süla Ukepenuopfü bu Abner gei mu sükezie rei chüshücie! Kekreilamonyü Jihova David ki rüsekeshü mhie tou di, a süu puo la chü tseishütuo,

¹⁰Saul kiu geinu kedirüvieu chü kediwatuo, sidi khapie David kedibau gei, Israel mu Juda gei; Dan nunu vo Beer-sheba ketso gei shüwatuo” sita.

¹¹Sitse Ishbal-e die yopuorei pupie Abner pfhekho lashülie kenjüta, puoe puo preiketa la.

¹²Siro Abner-e dieliemia ketsepie Hebron nu David kishü[4], sidi sie, “Kijüu supuo vie ga? No a ze dietseidiekholiecü sie, a Israel pete ze vor n tsü di n yapietatuo,” idi pushü.

¹³Sitse puo sie, “Viwe; a n ze dietseidiekhoshütuo. Derei a mhapuo n kinu lie morosuo; no a mehotuoü vorkecü ki, no Saul nuopfü Mikal ze vorshü kemosie a mhodzü vorlie kenjü” sita.

¹⁴Süsie David dieliemia ketsepie Saul nuou Ishbal ki shü di sie, “A kimia Mikal, a Filistinmia zhü krie dia pie vakhakeliepfü pie a tsüwaliecie” sita.

¹⁵Sitse Ishbal mia ketseshü di puo nupfu Laish nuou Paltiel dzie nunu zelieta.

¹⁶Derei puo nupfu hapfü sietsanu kra puo siemedzi zo se Bahurim ketso vor. Sitse Abner puo ki, “N kinu la votacie!” sishü. Süla puo la vota.

¹⁷Siro Abner-e, die ketsepie Israel phichüko tsü di sie, “Nieko puotei huo voketa ki David bu hieko mho kedi chünu di pfhü sie.

¹⁸Süla tsiewe süu chüliecie; kekreilamonyü Jihova David ki diephrashüte: A kituo David geinu a themia Israelko Filistinmia mu uko ngumvümia dzie nunu kelashütuo” siwa.

¹⁹Siro Abner-e Benjaminko ki rei mhotsou zo di pushü, sitse Abner-e Israel mu Benjaminko kiu pete rei mha pukeshüko chütuoü dojüketuoko se putuoü Hebron nu David ki vor.

²⁰Siro Abner-e mia mepfü ze di Hebron nu David ki vor tse, David-e Abner mu puo themiako la thehe puo chü.

²¹Sitse Abner sie David ki, “A bu vo di Israelmia pete kie kengu pie a niepuu kediu ki vorshücie, sidi uko bu n ze dietseidiekhoshülie, sitse no n kemengu se di uko mho dilietuo” sishü. Süla David-e Abner bu tuota, mu puoe puo nou mene di tuota.

²²Süki David kituokoe, Joab sa ze di terhü whuokecü nunu vor, ukoe mha vakelie kekra sa se vor. Derei Abner-e David ze di Hebron nu ba mota, kekreilamonyü David-e puo ketsewata, mu puo puo nou mene di tuo vota.

²³Siro Joab mu rüpfhünuo puo zeketuoko vorkelie ki, ukoe sie Joab ki, “Ner nuou Abner kediu ki vor, mu puoe puo ketsewa, mu puoe puo nou mene di tuote” sishü.

²⁴Sitse Joab kediu ki vo di puo ki, “No kedipuo chüwata ga? Abner n ki vor; No kiüdi puo ketsewa di puo bu tuota ga?

²⁵Ner nuou Abner n kedotuoü vor, mu n keprakele tsiu no kedipuo chüya shi pete silietuoükecü la ze” silie.

²⁶Siro Joab-e David kinu par mumetha, puo dieliemia ketsepie Abner sieshü, sidi ukoe Sira dzükhou nunu puo ze la vor; derei David we süu si ba mo.

²⁷Siro Abner-e Hebron nu la vorlie tse, Joab-e pekhre puo ze kerüchütuoü di puo ze kharu khie prata, mu sünunu puoe puo va zephawa. Siro puoe Joab siezeu Asahel zie pekrukecü la siaketa zo.

²⁸Kenuotsa David-e süu dze silie, sitse puo sie, “A mu a kedirüvieu kechachie Ner nuou Abner zie tsatie we Jihova mhodzünu kejo jü zo ho.

²⁹Kejo-u bu[5] Joab tsügei pfülie, sidi Joab kikru donu mpa kechümia, morei phiyhomia u the kese morei zhiecha geinu tetsukecü, morei kecüca jütsopfhükecü bu jüketa chü hiecie!” sita.

³⁰Süla Joab mu puo siezeu Abishai unie Abner dukhriwa, puoe unie siezeu Asahel Gibeon rüyachü nunu dukhrikewa la.

³¹Süsie David sie Joab mu puo zeketuo themia pete ki, “N pfhenei cierhawacie, sidi gakhropfhe dzielie, sidi Abner krükraliecie,” sita. Süsie kediu David-e mopiera medzi vota.

³²Ukoe Hebron nunu Abner khruwa. Siro kediue puo pfhephra sie di Abner mekhru kinu kra, mu themia pete rei puo krükra.

³³Siro kediu Abner la thekrü chü di sie, “Abner-e kenyamia tuoi siatuo me?

³⁴N dzienie phawa mo ze, n phinie kekhawa mo ze, miapuoe kelhiekecümia mhodzünu teketsu tuoi” sita. Sitse themia pete puo la krata.

³⁵Süsie themia pete rei teiso baluocü nu David bu mhacü nu vor; derei David-e rüse zo di sie, “A niaki kele mhodzü kecükekrie kehoupuorei sewa ro Jihova bu sükemhie morei sükezie rei chüpie a geishücie!” sita.

³⁶Sitse themia peteko süu ngu, mu süu uko neichülieta; kediu mhakehoupuo chü rei themia pete neichülieta.

³⁷Süla themia pete mu Israel pete rei sünhie kediue Ner nuou Abner dukhrikecü nu mhapuorei puo ma kemo silieta.

³⁸Mu kediu sie puo kituoko ki, “Thie Israel nu kedimia nuonuo puo tsiu themia kezha puo tetsuketa nie si mo zo me?

³⁹Thie a kenhekelie kediu zoürei, a kekuo jüte; Zeruia nuonuo themia hako a la u zho suothorte. Jihovae kelhiekecümia kesuo khe ki ze puo zhakhra chüshütuo” sita.