Read Angami Naga Samuel Kenieu 4 Bible Online

Samuel Kenieu 4 - Angami Naga bible

Samuel Kenieu 4

¹Siro Saul nuou Ishbal-e Abner Hebron nunu siaketa silie tse, puo kethepfu jüta, mu Israel pete rei u chamezieta.

²Saul nuo terhü whuokecü kroko krüta kenie tuo; mia puo za Bana mu kekreiu zae Rekab. Unie Birot nu Benjamin yiemia, kekreilamonyü Birot üse Benjamin phou chüta üya.

³(Siru Birotmia ta se Gitaim nu vota, sidi thie ha ketso rei sünu kelhoumia chü tuote.)

⁴Saul nuou Jonathan-e puo nuo phiyho puo baya. Siro Jezril nunu Saul mu Jonathan unie siaketa dielie si kevor ki puoe cie pengouta. Puo thekepfüe puo chüpielie di tashü, sidi puoe ta rükri seketuo ki u nuoyo petewa süla puo phi rüyhota. Puo za Mefibosheth[6].

⁵Sitse Birotmia Rimmon nuonie Rekab mu Bana unie tuoshü, sidi khinhieluo ki Ishbal kiu nu vorlie, puoe khinhieluo rüleiyakezha teiu nu rüleikeba ki.

⁶Unie-e kinu telha pfütuoükecü do chü ler, sidi unie puo vadi zephawa, sidi Rekab mu puo siezeu Bana unie tata.

⁷Unie-e kinu keler ki puo puo zhübou nu puo zhü gei zhü, süki unie-e puo biewa, sidi puo dukhriwata, tsiu puo tsü zielie, sidi unie teizeizha pete Araba chau nu vo.

⁸Siro unie Ishbal tsüu se Hebron nu David ki vor sidi sie kediu ki, “Saul nuou Ishbal, n ngumvüu n kerheiro pfhü tuoyakezhau, tsü sü harie; Jihova thie a niepuu kediu Saul mu puo seyieko khe pushüte” sishü.

⁹Sitse David-e Rekab mu puo siezeu Bana, Birotmia Rimmon nuonie die kela di sie, “Jihova rheiketuo mhiei, puoe a perhiekezha pete nunu a kelashüte,

¹⁰mia puoe a ki pu di, ‘Mehoshücie, Saul sü siate’ isi di thedze kevi se vor zoürei, a puo telie di Ziklag nunu puo dukhriwa, hau sü puo dielie se kevor la puo zhakhra chükeshüu zo.

¹¹Siüliro themia kesuomia kemiathomia puo kiu nu, puo zhü geinu dukhriwaketa ha sükezie rei ngulie zhü moü me! Süla tsie puo zie a n dzie nunu lielie, sidi kijüu nunu n pekawakecü mese moü me?” sita.

¹²Süla David-e khriesako ki diekhashü, sitse uko unie dukhriwa; uko unie dzie mu unie phi dawa, sidi unie mo pie Hebron nu rüzieu khieki nu goupie zhawa. Derei uko Ishbal tsü we pie vo Hebron nu Abner mekhru nunu khruwa.