Read Angami Naga Samuel Kenieu 5 Bible Online

Samuel Kenieu 5 - Angami Naga bible

Samuel Kenieu 5

¹Siro Israel seyieko pete Hebron nu David ki vor, sidi sie, “Harie, hieko ha n ru mu n chü zo.

²Siro puotei huo, Saul hie mho dikecü ki, Israel chatha pa mu lekecüu sü no zo. Jihova n ki: A themia Israelko kepfheu sü no zo, n bu Israel mho kekhatuo” si zo.

³Süla Israel phichüko pete Hebron nu kediu ki vor, sidi kediu David-e Hebron nu Jihova mhodzünu nu uko ze dietseidiekholie; tsiu ukoe David kenhe pie Israel mho kedi chülie.

⁴David di sedekelie ki puo cie serta, mu puo cie hiedia kedi chü.

⁵Puoe Hebron nu Juda mho cie thenie mu khrü sorou di, mu Jerusalem nu puoe Israel mu Juda mho cie serese di.

⁶Kediu mu puo themiakoe Jebusmia perhietuoü di Jerusalem nu kho, ukoe kijü süu nu lhou baya, ukoe sie David ki, “No hanu vorlie kenjü, mhiciemia mu phiyhomia zorei n whuo petawalie vi” si. Ukoe, “David-e hanu vorlie kenjü” icü lekecü la.

⁷Sirei David-e Zion dahou kemeteiu lielie, süusü David nadiu.

⁸Sitse David-e sünhie pukecü, “Kehoupuorei Jebusmia biekelieu, puo bu dzüchau melei kho di mhiciemia mu phiyhomia, David-e ngumecüyakezhako[7] biewatuo” sishü. Süla ukoe pukecü, “Mhiciemia morei phiyhomia kinu lerlie lho” isiya.

⁹Siro David-e dahou kemeteiu lielie, sidi süu za pie David rüna isilie. David-e Millo nunu sede di nadi houkeselie.

¹⁰Siro David-e zha miemie sieta, kekreilamonyü Jihova, krodiko Kepenuopfü puo zeketuo la.

¹¹Tur nu kediu Hiram dieliemia ketsepie David kishü, puoe sedar boko, mu sei mistirimia tsiu ketsiekechümia sa ketseshü, David kiu chütuoü di.

¹²Siro David-e Jihova puo bu Israel mho kedi chü, tsiu puo themia Israel la puo kedirüvieu chü pezhakeshü silieta.

¹³Siro David-e Hebron nunu vorkelie sie, puoe Jerusalem nunu puo pelipfümia mu puo kimia lie salie; sidi thenumia mu thepfumia penuo sapie David tsüshü.

¹⁴Hako Jerusalem nunu penuopie puo ketsüko: Shammua, Shobab, Nathan, Solomon,

¹⁵Ibhar, Elishua, Nefeg, Jafia,

¹⁶Elishama, Eliada mu Elifelet.

¹⁷Siro Filistinkoe David kenhepie Israel mho kedi chülieketa silie tse, Filistinmia pete David pfhütuoü kho; derei David süu silieta süla puo dahou kemeteiu nu keta.

¹⁸Siro Filistinko khor di Refaim razha pete tshupfü balie.

¹⁹Sitse David Jihova ketso di sie, “A bu Filistinko perhieketuo la khotuo me? No uko khapie a dzie nu shüwatuo me?” ishü. Sitse Jihova sie puo ki, “Khocie, kekreilamonyü a Filistinko khapie n dzie nu shü touwa zotuo” si.

²⁰Süla David Baal-perazim nu vorlie, sidi David sünu nu uko penyüwa, di puo sie, “Jihovae dzüdipie pfüphakeshü mhie a ngumvü pfüphashüte” si. Süla thechü süu zapie Baal-perazim[8] isilie.

²¹Siro Filistinkoe uko rhuorhiko khapie sünu zhüwa, David mu puo themiako süko chüseta.

²²Siro Filistinko la vor, sidi Refaim razhau nu tshupfü balie.

²³Siro David-e Jihova ketsokecü ki, puoe sie, “No kho hie; derei uko sietsa rho volie, sidi balsam bo kepetsoutsa nu uko ki voliecie.

²⁴Sidi niekoe balsam bo mezü geinu mia tuoketuo pfhe sishükecü ki, nieko sie dojülie; Jihova Filistinmia rüpfhünuo biewatuoü nieko mhodzü voketa la” sita.

²⁵Siro David-e Jihova puo ki diekhakeshü mhie chülie; sidi puoe Geba nunu vo Gezer chau nu kevo ketso Filistinko biewa.