Read Angami Naga Samuel Kenieu 6 Bible Online

Samuel Kenieu 6 - Angami Naga bible

Samuel Kenieu 6

¹Siro David-e Israel donu kedakelieko kie kengu lalie, süko mia nyie ser.

²Siro David mu puo ze ketuoko pete tuo Bale-Juda nu vo, sünunu Ukepenuopfü dietseidiekho bouu, krodiko Jihova idi puo kieyakezhau Cherubnie donu bayakezhau se vortuoü di.

³Siro ukoe Ukepenuopfü dietseidiekhobouu pie sei gari kesa puo gei shülie, sidi kijükhru gei keba Abinadab kiu nunu se parlie. Siro Abinadab nuonie Uza mu Ahio[9] unie bu sei gari kesau whuo.

⁴Mu Ukepenuopfü dietseidiekhobouu sa di sügeituo;[10] sitse Ahio-e dietseidiekhobouu mhodzünu tuo.

⁵Siro David mu Israel kinumia pete Jihova mhodzünu u kekuo pete se tsaliko[11] chü mu luoü mu harp khou, tsiu tambourin kekrei, siro ketsü khou mu kejokecü khouko se u dowhuo ituo.

⁶Siro uko vor Nakon shieu nu tsokelie ki, Uza-e puo dzie yhapie kho Ukepenuopfü dietseidiekhobou meheipielie, kekreilamonyü thudonie-e süu kekhekeshü la.

⁷Sitse Jihova nouyieu Uza gei phita; sidi Ukepenuopfü süki nu puo biekhriwa, puoe puo dzie yhapie vo dietseidiekhoubou biekecü la; sidi puo Kepenuopfü dietseidiekhoubou khieki siazhüta.

⁸Sitse David-e puo nei mota. Kekreilamonyü Jihova nouyieu rupie Uzza geikeshü la; süla thechü süu zapie Perez-uza[12] üdi kieta mu thie ketso rei si tuoya zo.

⁹David-e sünhie Jihova preita; sidi puo sie, “Kimhie di Jihova dietseidiekhobouu se a ki vorlie vituo ga?” sita.

¹⁰Süla David-e Jihova dietseidiekhobouu se puo kinu David nadiu nu vorketuo puo medo mota; süla süu se vo Gitmia Obed-edom kiu nu shüwa.

¹¹Siro Jihova dietseidiekhoubouu Gitmia Obed-edom kinu khrü se bata; sitse Jihova japie Obed-edom mu puo kiu pete tsüshü.

¹²Sitse mia kediu David ki, “Jihova Ukepenuopfü dietseidiekhobouu la japie Obed-edom kiu gei mu puo vienya pete gei shüshüte,” sishü. Süla David-e puo nei phi di vo Obed-edom kiu nu Ukepenuopfü dietseidiekho bouu se David nadiu nu vorta.

¹³Siro Jihova dietseidiekhobou kepieko phicha sorou philie tse, puoe thudo mu khunuo puophou keviko pie ruosuo chüshü.

¹⁴Siro David-e puo kekuo pete se Jihova mhodzünu puo dowhuo; siro David-e linen pfhe se puo chie phapfütuo.

¹⁵Süla David mu Israel kiu pete shiekhoui mu ketsü khou di Jihova dietseidiekhobouu se vorlie.

¹⁶Siro Jihova dietseidiekhobouu se David nadi nu vorlie tse, Saul nuopfü Mikal-e khirki nunu mehoshü ru kediu David-e Jihova mhodzünu rülhou mu puo dowhuoketuo ngushü; sitse hapfüe puo nounu puo rütseta.

¹⁷Siro uko Jihova dietseidiekhobou se vorlie di khapie David süu la pfheki pethoupie keba chüu nu shülie, siro David-e kethe ruosuoko mu vitho ruosuoko khapie Jihova mhodzünu shü.

¹⁸Siro David-e kethe ruosuoko mu vitho ruosuoko chü tseiwa tse, puoe krodiko Jihova za nunu japie themiako tsüshü.

¹⁹Sidi kecüca kezapie themia pete, Israel krodiu pete, thenu rei thepfu rei pete tsüshü, mia puo niekhrüda puo puo themuo huo, mu khube phro puopuokecü kha phreshü, süsie themia peteko u thuo u kinu vo phreta.

²⁰Süsie David-e japie kiu tsüketuo la vota. Derei Saul nuopfü Mikal David ze kesetuoü vor, sidi sie, “Kiüdi thie Israel kediu puo thuo puo chü ketherhu sete shi, thie puoe puo kituopfüko mhodzü puo whesetuo mote, ziezhü kemo themia puoe menga mo di puo pfhenei se mo tuoyakezhamia puo tuoi tuote!” sishü.

²¹Sitse David sie Mikal ki, “Süu Jihova mhodzünu zolie, puoe n puou mu puo kinuko pete donu a bu Jihova themiako, Israelko mho kedi chütuoü kedalie, süla a Jihova mhodzünu a dowhuotuolie.

²²Siro a haha kirei mhathomharo kemo pfü chütuo, sidi a thuo a mhikiwe cü miemietatuo; siro no kituomia dze kepuko a süko rhutuo” sita.

²³Süsie Saul nuopfü Mikal sünhie yawinu puo se ketso rei nuojü chüta.