Read Angami Naga Samuel Kenieu 7 Bible Online

Samuel Kenieu 7 - Angami Naga bible

Samuel Kenieu 7

¹Siro kediue puo kinu balie, mu Jihovae puokhie puomhou puo ngumvü pete donunu kerülei khashü puo tsü.

²Sitse kediu sie siedzekesiu Nathan ki, “Tsie mehoshüi, a we sedar kinu ba, derei Kepenuopfü dietseidiekhobouu we dzüpfheki nu ba zo” ishü.

³Sitse Nathan sie kediu ki, “Volie, sidi no kedipuo n nou ba shi chüliecie; kekreilamonyü Jihova n zetuo zo” sita.

⁴Derei süzhü Jihova die Nathan ki vor di sie:

⁵Vo di a kituou David ki pushücie; Jihova hakemhie puya: A bu lhou baketuo la ki puo chütuoü kebau no me?

⁶Ae Ijipt nunu Israelmiako ze kepar yawinu vor thie ketso ki puo nu rei ba mo zo, derei pfheki nu tsiu pru nu baba vor.

⁷Siro a Israelmiako donu rühou ketuo ki, a Israel seyie krütako, a uko bu a themia Israel kepfhe chütuoü di pukeshüko die puorei pu di, “Nieko kiüdi sedar ki puo chüpie a tsü mo ga?” ishü mo zo.

⁸Süla tsie no a kituo David ki hakemhie pushücie; krodiko Jihova hakemhie puya: No lie nu tekuo siemedzi ketuo nunu a n bu a themia Israel mho kedi chütuoü n zelie;

⁹mu no kehourapuo vo zorei a n ze tuo zo, tsiu n mhingu kinu n ngumvüko pekawa, sidi a n za chü pezhapie kijü nu kekuo kezhamia za tuoishütuo.

¹⁰Süsie a themia Israel la thechü puo kedalietuo, sidi uko bu sünu balietuo, sitse ukoe u thuo u thechü nu lhou balietuo, mu mha uko kebvü salie lho; siro thiedzü tuoi themia kesuomia u keyhu salie lho,

¹¹a capimiako khapie a themia Israel mho keshü yawinu; siro a a ngumvümia pete donunu n bu rüleilietuo. Sizomonyü Jihovae ki puo chüpie n tsütuoücü n ki puya.

¹²Siro n teisozhako tseilie, sidi no n puonuoko ze zhüta tse, ae n sie n nuosenuoyie pie siershütuo, puoe n chü n mo geinu partuo, sidi a kedibau chüpie kechachie balietuo.

¹³Puoe a la ki puo chütuo, tsiu a kechachie puo kediba nu kediba chüshütuo.

¹⁴A puo puou chütuo, mu puo a nuo chütuo. Siro puo kephouma chüketa ki, themia kevü seiro mu themia pechüyakezha üse puo pechütuo.

¹⁵Derei a a kekhrieu puo geinu chüseta lho[13], Saul geinu chüseketa, a n mhodzünu nu chüseketa mhielie lho.

¹⁶N kiu mu n kedirüvieu kechachie a mhodzü balietuo;[14] n kedibau kechachie balietuo.

¹⁷Die hako pete mu ziemho hako pete mhie di Nathan-e David ki pushü.

¹⁸Süsie kediu David le, di Jihova mhodzü balie di sie, “A supuo mu, he-i Niepuu Ukepenuopfü, mu a kiu ha kedipuo üdi no ha ketso a ze vorshü ga?

¹⁹Sirei n mhiki we hau rei mhatho puo mie, he-i Niepuu Ukepenuopfü; noe n kituou dze kenuokenuotsa la rei pushüte. He-i Niepuu Ukepenuopfü, haha bu themiako pethakeshü puo chülie üthienyü!

²⁰Siro David-e kedipuo n ki pu salie ta? Kekreilamonyü noe n kituou si ba, he-i Niepuu, Ukepenuopfü.

²¹Kekreilamonyü n die phrakeshü ki ze, mu n noukele ki ze, no mhakezha hako pete chüshü, n kituou bu süu silieketuo la.

²²Süla noe zha zo, he-i Kepenuopfü Jihova; kekreilamonyü n kemhie miapuorei jü, mu n sie Kepenuopfü kekrei tuo mo, hie hie nyie pie sikelie pete mhie di.

²³Supuonie n themia Israel mhie ga? Kijü nu seyie kikecüpuoe puo themia chütuoü tsiu puo thuo puo za chütuoü, uko la mhakezha mu kemerie chüshü, themiako mu uko rhuorhiko mhodzünu whuo se parta[15] di n thuo zo vo rhakelieko mhietuo ga?[16]

²⁴Siro no n thuo n la Israel bu kechachie n themia chütuoü chüshüte; mu no, he-i Jihova, uko Kepenuopfü chüliete.

²⁵Siro tsie, he-i Kepenuopfü Jihova no n kituou mu puo kiu dze pukeshü kemhie kechachie la chüshüwacie; no phrakeshü kemhie chüshücie.

²⁶Hakemhie di kechachie n za pu pezhatuo, ‘Krodiko Jihova Israelko mho Kepenuopfü zo’ isituo; mu n kituo David kiu bu n mhodzünu kechachie balietuo.

²⁷Kekreilamonyü no, he-i krodiko Jihova, Israel Kepenuopfü, hau n kituou pesi di pukecü, ‘A ki puo chüpie n tsütuo’ isi; süla n kituou thepfu di kecha hau n ki chashüzhie.

²⁸Siro tsie, he-i Ukepenuopfü Jihova, noe Ukepenuopfü zo, mu n dieko ketho zo, mu noe mha kevi hau se n kituou ki phrashüte.

²⁹Süla tsie japie n kituou kiu nu keshü n neilieyi, sitse süu kechachie n mhodzünu balietuo; kekreilamonyü no, he-i Kepenuopfü Jihova, pushüte, mu n theja se di n kituou kiu bu kechachie theja pfükelieu chücie” sita.