Read Angami Naga Samuel Kenieu 8 Bible Online

Samuel Kenieu 8 - Angami Naga bible

Samuel Kenieu 8

¹Siro puotei huo sie, David-e Filistinko whuo di süko penyüwa; sidi David-e Filistinmia dzie nunu Metheg-ama lielie.

²Siro puoe Moabmia rei sa penyülie, mu uko bu kijü zhülie, sidi keropie mejülie; siro puoe dukhriwaketuo la kero süu chie kenie mejülie, mu rhei baketuoko la süu chie puo mejülie. Siro Moabmiakoe David kituomia chüta sidi khezhanuo se vorya.

³Siro David-e puo za nu tsiepou sepie kebau lalietuoü[17] tuo Eufrat rüu nu kevo ki Zobamia Rehob nuou kediu Hadadezer rei dukhriwa.

⁴Siro David-e puo kinu gura kesemia nyie puo di krie thenie, mu pephi ketuo chüpahi mia nyie mepfüekenie zelie. David-e gari kese gurako phika zawa, derei guragari krie puo la we khapie balie.

⁵Siro Damaska nu Siriamia Zoba kediu Hadadezer khruohituoü vor tse, David-e Siriamia nyie mepfüekenie dukhriwa.

⁶Süsie David-e Damaska nu Siria donu chüpahiko khapie bawa, sidi Siriamia David kituomia chüta sidi khezhanuo khashüya. Siro Jihovae David bu kehoura vo zorei kuolielieta.

⁷Siro David-e Hadadezer kituokoe piekecü suna pezhüko pielie di süko se Jerusalem nu vorta.

⁸Siro Hadadezer rünako, Beta mu Berothai nunu kediu David-e merenyi kekra chülie.

⁹David kediue Hadadezer rüpfhünuo pete penyüwata ükecü Hamath nu kedi Toi-e silie tse,

¹⁰Kediu David-e Hadadezer ze kegei di puo penyüwaketa la, Toi-e kediu David kelushüketuo la puo nuo Joram ketseshü. Siro Hadadezer-e tsiekenuo Toi ze terhü chüyacü la. Siro Joram-e rakachü, suna mu merenyi pie kechü vienyako sa se vor;

¹¹hako rei kediu David se Jihova tsüwa, siro puoe seyie kekreikreikecü penyükelieko nunu rakachü mu suna sa kesapie khashü,

¹²Edom nu, Moab nu, Ammonmia, Filistinmia, Amalek mu Rehob nuou Hadadezer Zoba kediu kinu vakelie vieko pete khashüwa.

¹³David-e kuolie di puo thuo puo za kralie. Puoe la kevor ki, puoe metsie Razhau nunu Edommia[18] nyie kerethetha dukhriwa.

¹⁴Puoe puo chüpahiko khapie Edom nu bawa, mu Edommia pete David kituomia chüta. Siro Jihovae David kevo cha pete nu kuokelie pie puo tsü.

¹⁵Süla David-e Israel pete mho kedi chülie; sidi David-e puo themia pete gei kethocau mu thetou-u chüshü.

¹⁶Siro Zeria nuou Joab-e rüpfhünuoko mho kezhau chü; Ahilud nuou Jehoshafat ro kethuu chü;

¹⁷Ahilud nuou Zadok mu Abiathar nuou Ahimelek unie bu zievo chü; Seraia bu leshükethuu chü;

¹⁸Jehoiada nuou Benaia bu Keretko mu Peletko mho kezha chü; mu David nuonuoko bu zievo chü.