Read Angami Naga Samuel Kenieu 9 Bible Online

Samuel Kenieu 9 - Angami Naga bible

Samuel Kenieu 9

¹David sie, “A bu Jonathan la ketseikevi thapie kieshü morokesuo tsie rei Saul kinumia huo baluo me?” idi ketso.

²Süki Ziba ükecü puo ba, ru puo kie ze David ki vor. Sitse kediu sie puo ki, “No Ziba me?” sishü. Sitse puo sie, “N lietho nu tuowe” sishü.

³Kediu sie, “Saul kinumia huo ba di a bu tsie rei Ukepenuopfü ketseikevi thashü morokesuo baluo me?” sita. Sitse Ziba sie David ki, “Jonathan nuo puo ba; puoe puo phi rüyho” sishü.

⁴Sitse kediu sie puo ki, “Puo kirapuo ba ga?” idi ketso. Sitse Ziba sie kediu ki, “Puoe Lo-debar nu Amiel nuou Makir kinu baya” sishü.

⁵Sitse kediu mia ketsepie Lo-debar nu Amiel nuou Makir ki nunu puo ze vorlie.

⁶Siro Saul nuou Jonathan nuou Mefibosheth David ki vor tse puo zie pesulie di ke puo rüsuorüsuta. Sitse David sie, “Mefibosheth” ishü. Sitse puo sie, “A sü n kituouwe” idi puo die kelashü.

⁷Siro David sie puo ki, “Michie hiecie, kekreilamonyü n puou Jonathan la a ketseikevi thashü n kietuo; siro a n puotsau kijü pete kelalashü n tsütuo, mu n bu a mizhü geinu mhacü sei tuotatuo” sita.

⁸Sitse puoe nuketsu puo kelu la di sie, “N kituou sü kedipuo üdi no puo mehotieya mu? A sü tefü siaketa kemhie puo ze” ita.

⁹Sitse kediu Saul kituou Ziba kielie di sie puo ki, “A Saul vie kheko siro puo kiko pie n niepuu tsuu tsüwate ho.

¹⁰Mu n nuonuoko mu n kituoko liecie pie puo tsütuo, sidi puo si vükelieko se vortuo, sitse n niepuu tsuu kecüca nyilietuo, derei n niepuu tsuu zo we a mizhü geinu mhacü seituo” sita. Siro Zibae puo nuo thepfumia kerepengou mu kituomia mepfüekenie nyi.

¹¹Sitse Ziba sie kediu ki, “A niepuu kediu puo kituou ki die khakeshü medzi di a mha pete chütuo” sishü. Süsie Mefibosheth-e kediu nuonuoko mhie di David mizhüu[19] geinu mhacü bata.

¹²Siro Mefibosheth-e puo nuo thepfumia yopuo ba, puo za Mika. Sidi Ziba kiu nu keba pete Mefibosheth kituomia chüta.

¹³Siro Mefibosheth-e Jerusalem nu lhouta, puoe kediu mizhü geinu mhacüyacü la. Siro puo puo phi kenienie rüyho.