Read Angami Naga Kediko Kerieu 1 Bible Online

Kediko Kerieu 1 - Angami Naga bible

Kediko Kerieu 1

¹Tsie we David kediu tsa mu phichü phita; mu uko pfhe pie puo wheshü zoürei puo lelie mota.

²Süla puo kituokoe sie puo ki, “A niepuu la rüüphouse kemedzü puo pfhüliecie, mu puo bu kediu pfhethalie, tsiu puo thekeshülie; puo bu puo merü gei zhülie, di kediu a niepuu bu lelie cü mu” sita.

³Süla ukoe Israelmia rüna pete nu rüü kezivi puo pfhü, sidi Shunammiapfü Abishag ngulie, di puo ze kediu ki vorshü.

⁴Rüüpfüe zivi phi, tsiu puoe kediu pfhe ba di puo thekeshü; derei kediu puo ze kesikecü chü mo.

⁵Süki Hagit nuou Adonija puo thuo puo chü pezhalie di sie, “A kedi chütuo we” sita; sidi puoe guragari mu gura themia, mu mia hiepengou bu puo mhodzü votuoü keselie.

⁶Siro puo puoe mhakipuorei puo ki, “No kiüdi hakemhie chüya ga?” ikecü pu di puo neikemo chüya chie mo, Puoe themia ngu pevi se cü puo; siro puo zuoe Absalom sie puo penuoshü.

⁷Puoe Joab Zeruia nuou mu Abiathar zievo-u ze kedovalie, sidi unie-e Adonija siemedzi di puo khruohishü.

⁸Derei Zadok zievo-u, mu Benaia Jehoiada nuou, mu Nathan siedzekesiu, mu Shimei, mu Rei, mu David themia kekuoko Adonija kitsatie ba mota.

⁹Adonijae tekuo, thudo mu peri puo phou kevi pie En-rogel khie Zohelet tsieu kinu dukhrilie, süu En-rogel khie ki ba, sidi puo siezedzürieko pete, kediu nuonuoko, tsiu Juda kedi kezhako pete kieshü,

¹⁰derei puoe Nathan siedzekesiu morei Benaia morei kekreimiako morei puo siezeu Solomon we kie mo.

¹¹Süla Nathan-e Solomon zuo Bathsheba ki pu di sie, “Hagit nuou Adonija kedi chüketa no siba me? Mu David uko niepuu süu si ba mote.

¹²Süla tsie vorcie, a bu n rüchüshü thie, siliero no n thuo n kerheiro, tsiu n nuou Solomon kerheiro kelalietuo.

¹³Tuo volie sidi David ki leliecie, sidi puo ki, ‘A niepu, kediu, n nuou Solomon n sie kedi chü tou zotuo, mu puoe a kediba gei ba tuo idi noe n kituopfü ki rüse pie zhü mo me? Siliro kiüdi Adonija bu di bata ga?’

¹⁴No kediu ze kerüchü thaluokecü nu, a rei n sie lerlietuo, sidi n dieko peshütuo.”

¹⁵Sitse Bathshebae kediu kibouu nu kediu ki le. Kediu tsatota; mu Abishag Shunampfü kediu theke baya.

¹⁶Sitse Bathsheba rünuo tsu di kediu kelushü. Sitse kediu sie, “No kedipuo menguya ga?” sishü.

¹⁷Sitse puoe sie puo ki, “A niepuu, no Jihova n Kepenuopfü za se rüse di n kituopfü ki kepu hakemhie: A sie n nuou Solomon kediba gei batuo.

¹⁸Mu tsie, harie, Adonijae kedi chü bate, sizoürei tsie a niepu kediu we si ba mote.

¹⁹Siro puoe pedo mu peri puo phou kevi mu tekuo kekra dukhri pie ruosuo chü, mu puo kediu nuonuo peteko, mu Abiathar zievo-u, mu Joab, rüpfhünuoko mhokezhau kie, derei n kituou Solomon we kie mo.

²⁰Mu tsie kediu a niepuu, Israelmia pete mhi-e n meho ba, süusü supuonie n sie kedi a niepuu kediba gei bakecü mese shikecü noe pukeshü mese.

²¹Simoü kecü sie we, puotei puo vortuo, kediu a niepuu puopfutsanuoko ze zhüta tse, a mu a nuou Solomon üse puotoukemo kechümia ütatie” sishü.

²²Siro puoe kediu ki mhapu tha zoluokecü nu, Nathan siedzekesiu rei lerlie.

²³Sitse ukoe kediu ki, “Nathan siedzekesiu haki tuo” sishü. Mu puoe kediu mhodzü lerlie tse, puo thuo nuketsu kijü zerepfü zhüta.

²⁴Sitse Nathan sie, “Kediu a niepuu, ‘Adonijae a sie kedi chütuo, mu puo kediba gei batuo; sikecü no pushü me?’

²⁵Kekreilamonyü puoe thie tuo vote, sidi pedo mu peri puo phoukevi mu tekuo kekra dukhripie ruosuo chüshüte, siro kediu nuonuoko pete mu rüpfhünuoko mho kezhau Joab[1], mu Abiathar zievo-u kie, mu harie ukoe puo mhodzünu nu cüükrie bate, sidi sie, ‘Kediu Adonija bu rheikechau chücie!’

²⁶Derei a, n kituou mu Zadok zievo-u mu Benaia Jehoiada nuou, mu n kituo Solomon we kie mo.

²⁷Mha hako kediu a niepuu chüshü me, sidi noe supuonie kediu a niepuu sie kediba gei batuo shikecü pie n kituou pekieshü mote me?” sita.

²⁸Sitse kediu David-e puo die kela di sie, “Bathsheba kiepie a ki shücie,” sita. Sitse hapfüe kediu mhodzü vor, sidi kediu mhodzü thalie.

²⁹Sitse Kediu rüse di sie, “Jihova rheiketuo tuoi, puoe kemezhiekecü pete nu a kelashü,

³⁰Ae Israelmia Kepenuopfü Jihova za se rüse di pushüya, ‘N nuou Solomon-e a sie kedi chü tou zotuo, siro puo a sou nu kediba gei batuo,’ süusü a thie rei chüshü tou zotuo.”

³¹Sitse Bathsheba zerelie di sie, “Kediu a niepuu David bu kechachie rheiketuou chüliecie” sishü.

³²David-e sie, “Zadok zievo-u, Nathan siedzekesiu mu Jehoiada nuou Benaia kie pie a ki shücie” sita. Süla ukoe kediu mhodzü vorlie.

³³Sitse kediu sie uko üse, “Nieko Jihova kituoko zelie, sidi a nuou Solomon bu a gura gei balie, sidi puo ze Gihon gei keliecie.

³⁴Sidi Zadok zievo-u mu Nathan siedzekesiu unie bu puo kenheliecie, süsie ketsüu khoushülie, di sie, ‘Kediu Solomon bu rheikechau chülie!’

³⁵Süsie nieko puo medzi khorlie, sidi puo bu vor di a kedibau gei baliecie; puoe a sou nu kedi chüketuo la; mu ae puo kedapie puo bu Israel mu Juda mho kedi chütuoüwate” sishü.

³⁶Sitse Jehoiada nuou Benaia kediu die kela di sie, “Amen, Jihova, a niepuu Kepenuopfü bu rei sikecü puüthienyü.

³⁷Jihovae kediu a niepuu zeketuo tuoi, puo bu Solomon ze tuokelieu chüliecie, tsiu puo kediba chüpie kediu a Niepuu David kediba kirei zhakuoliecie” sita.

³⁸Süla Zadok zievo-u, Nathan siedzekesi, mu Jehoiada nuou Benaia, mu Keretmiako, mu Peletmiako; keze tuo ke, sidi Solomon bu kediu gura gei balie, sidi puo ze Gihon nu vorlie.

³⁹Sünu nu Zadok zievo-ue ruosuopfhekiu nunu mithukia nu keba tier chülie di Solomon kenhelie, süsie ukoe ketsü khoushü, siro themia peteko sie, “Kediu Solomon bu rheikechau chücie!” ishü.

⁴⁰Süsie themia pete puo siemedzi khor, luoü khou, sidi u neipie mhapuochü, süla uko pfhe kijüu vakeza pfü vota.

⁴¹Adonija mu puo ze keba themia pete hielieta tse süu pfhe sishü. mu Joab-e ketsü kekhou pfhe sishü tse, puoe sie, “Nadi nu mhapfhe kemerie chükeba hau puoca kiü ba ga?” sita.

⁴²Mu puoe mhapu tha luokecü nu harie, Abiathar zievo nuou Jonathan vor, Adonija sie, “Lerlie, noe mhachüliekesümia puo mu thedze kevi se vor meciecü la” sishü.

⁴³Sitse Jonathan-e Adonija die kela di sie, “Molie, kekreilamonyü uko Niepuu kediu David-e Solomon chüpie puo bu kedi chüwate;

⁴⁴Kediue Zadok zievo-u, Nathan siedzekesiu mu Jehoiada nuou Benaia, mu Keretmia, mu Peletmiako bu puo ze di ketseshüwate, mu ukoe puo bu kediu gura gei balie.

⁴⁵Siro Zadok zievo-u mu Nathan siedzekesiu unie Gihon nunu puokenhe pie puo bu kedi chüliete; mu ukoe sünunu u nei pie mhapuochü di khote, süla nadiu melemeüte. Hauha niekoe sikecü pfheülie.

⁴⁶Solomon-e kedibau gei bate.

⁴⁷Sizomoü kediu kituoko japie uko kediu niepuu David tsütuoü vor, di pukecü ‘N Kepenuopfü Solomon za chüpie n za kirei meyiekuo shüte, tsiu puo kediba chüpie n kediba kirei zhakuo shüte’ site. Tsiu kediu thuo zorei puo zhü geinu zeretsu zhüte,

⁴⁸mu kecha chü sa di sie, ‘Jihova, Israelmia Kepenuopfü bu keviu chüliecie. Puoe mia puo bu thie a kediba gei baliete, a mhinie rei süu ngu bate ru’ ” sishü.

⁴⁹Sitse Adonija ze keba themiako pete michieta, sidi sielie, di mia puopuokecü puo thuo puo cha nu vota.

⁵⁰Siro Adonija Solomon preita; süla sielie di tuo vo ruosuoba kia theze se thata.

⁵¹Sitse mia Solomon ki, “Harie, Adonijae kediu Solomon prei bate; kekreilamomyü harie, puoe ruosuoba kia thezelie, sidi pucü, ‘Solomon bu thie puo kituou zhiecha pie dukhriwa lho ükecü rüsepie a ki shücü mu’ sibatelie” sita.

⁵²Sitse Solomon sie, “Mhanuü puoe pelelie kesü miapuo ükecü thashükelie siewe, puo geinu thaprü yopuo rei te kijü tsutalie lho; derei mhanuü puo gei mhakesuo ngulietakecü sie, puo siatatuo” sishü,

⁵³Süla kediu Solomon mia ketseshü, sidi ukoe ruosuobau geinu puo ze kerta. Mu puoe vor di zere tsu kediu Solomon mhodzü zhüta; sitse Solomon sie puo ki, “N kinu votalie” siwa.