Read Angami Naga Kediko Kerieu 10 Bible Online

Kediko Kerieu 10 - Angami Naga bible

Kediko Kerieu 10

¹Siro Sheba kedipfüe Jihova za nunu Solomon-e zapuzayie chükeba silie tse, puoe ketsokecü kere kro puo se puo dojütuoü vor.

²Mu hapfüe mhakekra se Jerusalem nu vor, mharekethengu, suna kekra, ketsie puomakere ut geinu toupfü vor, mu puoe Solomon ki vorlie tse, puoe puo nou kedipuo ba shi pete se puo rüchü.

³Tsiu Solomon hapfü puo ketsokecü pete kelashü; kediue mhapuorei pulie kenjüketa chü mo.

⁴Mu kedipfü Shebae Solomon mhasi, mu puoe ki chükelie.

⁵Puo mizhü gei kecükekrie, puo kituoko keba, kituoko puo pfheketha uko pfhenei, puo hie kepieko, mu puoe Jihova kinu kekho chapra ngushü tse, puo ngorei ngodapfüchü mota.

⁶Sidi puoe sie kediu üse, “A a kijü nunu n mhatho mu n mhasi dze kesi kethotou zo.

⁷Derei a vor di a mhi üse nguwa kemochie, a die süko pelelie mo, mu harie, süko ketou puode rei a ki pushü molie, n mhasi mu n kinyi-e a kesi zie se.

⁸N themiako, n kituomiako, n mhodzü ki tha di n mhasi dieko rünyü bayakezhako we thejakepfümia zo.

⁹Jihova n Kepenuopfü n ngu puo neiyakezhau, sidi n khapie Israel kediba geikeshüu bu zapuzayie chüliecie! kekreilamonyü Jihovae kechachie Israel khrieya, puoe n chüpie n bu kedi chüliete, kemezhü mu kemiatho mhatho chütuoü di,” sishü.

¹⁰Sidi puoe suna talent krie puo di mepfü, mharekethengu kekra mu ketsie puoma kere pie kediu tsü, Sheba kedipfü mharekethengu pie kediu Solomon ketsü de-icü süsie la vor sa mota.

¹¹Süsie Hiram rou themiakoe Ofir nunu suna, almug sei mu ketsie puoma kere kekra se vor.

¹²Mu kediue almug seiko pie Jihova ki coko kediu kiu, nyarübouko rei sa mu ükechümiako la übouko chülie; almug sei süthede vor sa mota, morei thie ketso rei ngu mo zo.

¹³Siro kediu Solomon-e Sheba kedipfü mengu pete chüshü, puo ketsokecü pete pushü, sütsügei rei puoe puo kedinya pie puo tsü. Süsie hapfü puo kituoko zelie di tuo puo ra la vota.

¹⁴Siro teicie puo nu suna mesi talent krie sorou di hiesorouesorou Solomon ki vorya.

¹⁵Sütsügei rei puoe lhitholhiü chüyakezhamia mu mharekethengu lhithomia mu Arabia kediko pete mu rüna ahngko kinu ngulieya.

¹⁶Mu kediu Solomon-e suna rükrikelie pie pezhü kezha chülie, pezhü puo la suna kemejü krie sorourou.

¹⁷Süsie rei puo suna rükrikelie pie pezhü krie se chülie; pezhü puo la suna kemejü puo di puotie, sidi kediu süko khapie Lebanon ketsa kiu nu ba.

¹⁸Sizomoü kediue tsohu pie kediba kezha se puo chülie, sidi puo mhogei suna kevithopfü pie dalie.

¹⁹Kedibau gei chapra sorou ba, mu kediba tsü gei puo sietsatie metou, siro thebau lutsahatsa puobou ba mu puokhie losha puopuo tha.

²⁰Mu chapra sorouko yopuo gei lutsahatsa losha puopuo kecü kerekenie tha. Kediba puo nu rei hakemhie chüya mo zo.

²¹Mu kediu Solomon krieyakezha hie pete rei suna se chü phre, mu Lebanon ketsa kiu nu mhanyako pete rei suna se chü phre, rakachü pie yopuo rei chü mo; süsie Solomon teiki süu üse mhathomharokemo chüya zo.

²²Kekreilamonyü kediue dzükezha nu Tarshish roukethumiae Hiram roukethumia ze tuo; teicie se donu vapuo Tarshish roukethumia, suna rakachü, tsohu, tepfi mu rüü[10] se vorya.

²³Sükemhie di kediu Solomon-e kinyi tsatie rei mu mhasi tsatie rei kijüu gei kedimia pete ki kevitho chü.

²⁴Mu kijüu pete Solomon mhasi Kepenuopfüe khapie puo noukeshü rünyütuoü puo pfhüya.

²⁵Tsiu uko mia puopuokecü mha methuo se vorya, rakachü, mu suna se kechü mhanya mu pfhemenei, mu terhü nyie, mharekethengu, gura mu mhakepfü khunuoko teicie kepra se vorya.

²⁶Siro Solomon-e guragari mu gura themia kie kengulie, mu puoe guragari nyie puo di krie dia, mu gurathemia nyie kerekenie ba, puoe süko pie guragari nadiko mu Jerusalem nu kediu bu seya.

²⁷Kediue Jerusalem nu rakachü pie ketsie kemhie kehoukeruo chü zo, mu sedarbo kijü thezha nu krathortacü pie khrabvübo kemhiewata.

²⁸Mu Solomon-e Ijipt mu Kue nunu gura se vorlie mu kediu lhithomiakoe Kue nu puoma kepukelie nunu lielieya.

²⁹Ijipt nunu guragari puo raka shekel krie sorou mu gura puo krie puo di hiepengou di kelie. Sidi lhithomiako geinu ukoe Hitmia kediko mu Siriamia kediko ki ketseshülieya.