Read Angami Naga Kediko Kerieu 11 Bible Online

Kediko Kerieu 11 - Angami Naga bible

Kediko Kerieu 11

¹Solomon-e seyie kekreimiapfü kekra Faro nuopfü, Moabmiapfü, Ammonmiapfü, Edommiapfü, Sidonmiapfü mu Hitmiapfü ngu puo neita.

²Seyie sükosü dze Jihovae Israelmiako ki pukeshü, “Nieko süko lielie lho morei süko kinyilie lho, kekreilamonyü sükoe nieko nou chüpie uko rhuoko kitsatie vota tou zotuo” isi, Solomon hako ngu puo neita di uko kitsatie tuota.

³Puoe puo kimia krie thenie, kedimia nuonuo mu puo meshüpfüko krie se; tsiu puo kimianuoko puo nou chükediwata.

⁴Kekreilamonyü Solomon-e tsaketa ki puo kimiakoe puo nou teshüpie terhuo kekrei kitsa shüwa, sidi puo noue Jihova puo Kepenuopfü ze puotou chütuo mota, puo puo David nou kemhie tuo mota.

⁵Kekreilamonyü Solomon-e Sidonmia rhuo Astoreth mu Ammonmia kerütsekecüu Milkom medzita.

⁶Sidi Solomon-e Jihova mhodzünu mha kesuo chü, sidi Jihova medzi tsei mota, puo puo David kemhie tuo mota.

⁷Sitse Solomon-e Kemosh Moabmia kerütsekecüu la Jerusalem mhodzünu kijüthouu geinu thechü kerükrie puo chüshü, siro Molek Ammonmia kerütsekecüu la chüshü.

⁸Sidi puo kimia seyie kekreipfüko mharekethengu the mu ruosuo chüpie uko rhuoko tsükecü pete puorei chüta.

⁹Sitse Jihovae Solomon ngu puo nei mota, kekreilamonyü puo noue Jihova Israel Kepenuopfü, va kenie puo pengukeshüu kinu rüdita.

¹⁰Siro mha hauha dze puo ki pushüwata zo, süusü puo bu terhuo kekrei medzita suokecü: derei puo Jihova puo ki pukeshüu chüüzelie mota.

¹¹Süla Jihova sie Solomon ki, “No mha hau chüwaketa la, mu noe a diekhakeshü mu a zhoko, a n ki khakeshüko chüüzelie moketa la a n geinu n kediba cierhawatatuo, sidi khapie n kituomia tsüwatatuo.

¹²Sishierei n puou David la nu n teiki siwalie lho, derei n nuou teiki a puo dzie nunu cierhawatuo.

¹³Sirei a kediba pete cierhawalie lho; derei a kituou David mu a kedakelieu Jerusalem la nu seyie puo pie n nuou tsüshütuo.”

¹⁴Sidi Jihovae Solomon ngumvümia puo peseshü, Hadad Edom-u puoe Edom nu kedi seyiemia puo.

¹⁵Kekreilamonyü David-e Edom nu keba ki, rüpfhünuoko mhokezhau Joab-e Edom nu thepfumiako pete dukhrikewa sie kesiamoko khruwatuoü di khota.

¹⁶(Kekreilamonyü Joab-e Edom nu thepfumia pete dukhriwa kemochie, thekhrü sorou Israelmiako ze sünu bate;)

¹⁷derei Hadad puo mu puo puo kituo Edommiako puo zelie di Ijipt nu ta vota; Hadad-e medzü ba zoluo.

¹⁸Ukoe Midian nunu sielie di Paran nu volie. Mu ukoe Paran nunu themia pie uko salie, sidi ukoe Ijipt nu Faro kediu ki vorlie, puoe ki puo khashü puo tsü mu kecükekrie keseshü, mu kijü khashü puo tsü.

¹⁹Siro Hadad-e Faro khrie pfülieta, süla puo thuo puo kimia siezepfü pie puo ki nyishü, Tahpen kedipfü siezepfü.

²⁰Mu Tahpen siezepfüe Hadad nuo Genubat penuoshü puo tsü, Tahpen-e Faro ki nunu thekekeshüu, tsiu Genubat-e Faro nuonuo ze di Faro kinu baya.

²¹Derei Hadad-e Ijipt nu ketuo ki David-e siata di puo puonuoko ze khruwataü mu rüpfhünuoko mhokezhau Joab siaketa silie tse, Hadad-e sie Faro ki, “A bu tuotayi, sitse a tuo a ra votatuo” sita.

²²Derei Faroe sie puo ki, “No a ze bakecü kedipuo nu tsopfhüta di tsie n thuo n ra la votaketuo leya ga?” sita. Sitse puo sie puo ki, “Mhapuorei mo, derei a bu tuota cü mu” sita.

²³Kepenuopfüe puo la ngumvümia kekrei puo peseshü, Eliada nuou Rezon, puoe puo niepuu Hadadezer Zoba kinu tatuota.

²⁴Sitse puoe themia kiekengu pie puo ki shülie, sidi themia kro puo mhokezha chülie, David-e Zoba nu uko dukhrikecü sie, mu ukoe Damaska nu volie, sidi sünu lhou bata, sidi puo bu Damaska nu kedi chülie.

²⁵Tsiu Solomon kerheichie Rezon-e Israel ngumvümia chütuo tso, sütsügei rei Hadad mhie puo kelhie sa; tsiu Rezon-e Israel ngumecü di Siria mho kedi chü.

²⁶Solomon kituomia puo Nebat nuou Jeroboam, Efratmia Zereda, puo zuo zae Zerua, samimiapfü puo zorei puo dzie yhapie kediu petsouta.

²⁷Mu puo dzie yhapie kediu petsouketa cau ro hai: Solomon-e Millo chüshü, mu puo puo David nadi tsozhüketau kemieshü.

²⁸Jeroboam themia kethepfu puo, siro Solomon-e khriesa hau shürheikecü ngu tse, puo bu Josef ki kemeho-u chü.

²⁹Siro situo di Jeroboam-e Jerusalem nunu prata tse, Ahija siedzekesiu Shilon-u cha nunu puo ngulie; mu puoe pfhe kesa puo dzietuo; mu unie unie rübei lie nu tuo.

³⁰Sitse Ahija-e puo gei ketuo pfhe kesau rhuolie, di süu cierha pie kerekenie chüwa.

³¹Sidi puoe Jeroboam ki: N thuo n la ker lieliecie, kekreilamonyü Jihova Israel Kepenuopfü hakemhie puya, “Harie, ae Solomon dzie nunu kedibau cierhawatatuoüzhie mu seyie ker pie n tsüshütuo.

³²(Derei puoe a kituou David la nu, mu Jerusalem, a Israel la pete donunu kedakelie rünau la nu seyie puo ngulietuo),

³³kekreilamonyü ukoe a rükra mote, sidi Sidonmia rhuopfü Ashtoret, Moabmia rhuo Kemosh mu Ammonmia nuonuoko rhuou Milkom rüsuote, sidi a cha nu tuo mote, a mhi ki puotoukecüu, mu a kepethazhoko mu ahzako puo puo David tuoi chüüzelie mote.

³⁴Sirei ae puo dzie nunu kediba pete chüwalie lho; derei a kituo David, a kedakelieu, diekhakeshüko mu a kepethazhoko chüüzekelieu la nu puo kerheichie puo bu kezha chütuo.

³⁵Derei a puo nuou dzie nunu kedibau sese tatuo, sidi süu khapie n tsüwatatuo, seyie ker pie n tsütuo.

³⁶Derei a seyie puo pie puo nuou tsütuo, süusü a kituou David bu Jerusalem nu, a a za khapie batuoü di kedakelie rünau mhodzü ki kechachie kezie puo chülieketuo la.

³⁷Mu a n lielietuo, sidi n kemengu mhie n bu kedichütuo, mu no Israel mho kedi chütuo.

³⁸Mu mhanuü noe a kha n ki keshüko pete rünyülie, tsiu a kituou David cha nu tuolie, a kepetha zhoko mu a diekhakeshüko ze di a mhi ki puotoukecüu chülie liro a n zetuolietuo, tsiu ki ketho puo chüshü n tsütuo, a David la chükeshü tuoi, mu Israel khapie n tsütuo.

³⁹Mu hau la ae David seyieko pechütuo, derei kechachie la silie lho” sishü.

⁴⁰Süla Solomon-e Jeroboam dukhriwatuoü puo pfhüta, derei Jeroboam sielie di ta Ijipt nu Shishak kediu ki vota, sidi Solomon siata kemochie sünu bata.

⁴¹Tsiu Solomon mhatho kekreiko, puoe chükeshü peteko mu puo mhasi, süko Solomon mhatho leshüda nu thu piezhü moü ba me?

⁴²Siro Solomon Jerusalem nu teicie hiedia Israel pete mho kedi chü.

⁴³Sidi Solomon-e puo puonuoko ze zhüta, di puo puo David rüna nunu khruwata, sitse Rehoboam puo nuou puo sou nu kedichülie.