Read Angami Naga Kediko Kerieu 12 Bible Online

Kediko Kerieu 12 - Angami Naga bible

Kediko Kerieu 12

¹Siro Rehoboam-e Shekem nu vota. kekreilamonyü Israelmia pete-e puo bu kedi chütatuoü Shekem nu vorta.

²Siro Jeroboam Nebat nuou süu dze silie tse (kekreilamonyü puoe tsie rei Ijipt nu ba zo, puoe kediu Solomon mhodzünu nu tata) sitse Jeroboam-e Ijipt nunu[11] la vorlie.

³Mu ukoe mia ketseshü di puo kielie, sitse Jeroboam mu Israel kehou pete vor di sie Rehoboam üse,

⁴“N puoe hieko vocie chü kemesi shüte, süla no tsie n puo mhatho kereu mu puo vocie kemesi hie gei keshüu chü kemedzashü cü mu, sitse hie n lie chülietuo” si.

⁵Sitse puoe uko ki, “Nieko zha se la tuotalie, sidi la a ki vorcie” sita. Mu themiakoe tuota.

⁶Süla kediu Rehoboam-e phichümiako ketsoshü, sükoe Solomon puo kerhei ki puo mhodzünu thathaya, sidi sie, “A bu kedipuo kemhie di themia hakoha die kelakeshü nieko medo ga?” sishü

⁷Sitse uko sie puo ki, “No thie themia hako kituomia chülie, sidi uko lie chüshülie, mu uko die kelashülie, sidi uko ki die kevi pulie liro ukoe kechachie n kituomia chülietuo” sishü.

⁸Derei puoe phichüko puo ki kepu dieko khawa, sidi khriesamiako puo tshümiako, puo khie ki thathaya kezhako ketsota.

⁹Sidi puoe uko ki, “N puo kha pie hie geikeshü vocieu chükemedza kuoshücie, idi kepu themia hakoha ki a bu kedipuo pushüketuo nieko le ga?”

¹⁰Sitse khriesamiako puo tshümiako puo ki, “N ki, ‘N puo hie vocie chü kemesishü, derei no hieko gei süu chükemedzashücie’ idi kepuko ki no hakemhie pulie, ‘A dziekinuo kecüyo zorei a puo chie zhüda ki shükuotuo.

¹¹Sizomonyü a puoe vocie kemesi pie nie geishü, a nieko vocie süu chüpekrashütuo, a puo seiro pie nieko petha, derei a we seba pie nie pethatuo.’ ”

¹²Süla Jeroboam mu themiako pete zha se nhie la Rehoboam ki vo, kediue zha se nhie a ki la vorcie idi pukeshü mhie di.

¹³Mu kediue mehiemeha zo di themiako die kelashü, tsiu phichümiakoe puo ki pukeshü dieu medzi mota.

¹⁴Mu puoe khriesako die tuoi uko ki, “A puoe nieko vocie chü kemesishü, ae nieko vocieu chüpekra sashütuo; sizomonyü a puoe seiro pie nie petha; derei a we seba pie nieko pethatuo.”

¹⁵Süla kediue themiako die rünyü mvüta; kekreilamonyü mha süusü Jihova kinu kevor Ahija Shilon-u Jeroboam Nebat nuou ki kepuu chü tseilieketuo la.

¹⁶Siro Israelmia pete rei kediu uko die rünyü moketa ngu tse, themiakoe sie kediu ki, “David kitsatie hieya kedipuo ba ga? Hieko we Jese nuou kinu kayie puorei jü. He-i Israel! Tuo nie pfheki nu votalie! Tsie n thuo n ki meholiecie, David” sita. Sidi Israel-e u pfhekiko nu vota.

¹⁷Derei Israel themia Juda nadiko nu kelhouko we Rehoboam bu uko mho kedi chü.

¹⁸Süsie kediu Rehoboam-e khezhanuo mehoyakezhau Adoram ketseshü, süki Israelko ketsie pie puo vakhriwa. Süla kediu Rehoboam-e ta Jerusalem nu votatuoü rükri puo guragari gei pfülie.

¹⁹Süla Israel thie ketso rei David kiu petsoutuoya zo.

²⁰Situo di Israelmia pete Jeroboam la vorketa silie tse puo chüpie puo bu Israel pete mho kedi chü; süko donu Juda yieu sie, mia kekreipuorei David kikru medzi mota.

²¹Siro Rehoboam-e Jerusalem nu vorlie tse, Israel kikru ze kegei di kedirüvie lie lapie Solomon nuou Rehoboam tsütuoü Juda kiu pete mu Benjamin yieu sa terhümiavimia lakh puo di nyie hiethetha kie kengulie.

²²Derei Kepenuopfü die Shemaia, Kepenuopfü themiau ki vor di sie,

²³Rehoboam Solomon nuou, Juda kediu mu Juda mu Benjamin kikru pete, mu themia peshapiekebako ki pushücie,

²⁴“Jihova hakemhie puya, nieko nie siezedzüriemia Israel themiako ze kegeituoü kho hie. Mia pete u thuo u kinu votalie; mha hauha a kinu vorta zocü la.” Süla ukoe Jihova die rünyülie di Jihova die tuoi u thuo u kinu la vota.

²⁵Süsie Jeroboam we Efraim kijü khru geinu Shekem chülie, sidi sünu lhou bata, mu puoe sünunu pra di Penuel chülie.

²⁶Sitse Jeroboam-e puo nou nu sie, “Tsiewe kedirüvie se David kiu nu la vortatuo.

²⁷Mhanuü themia hako kho Jerusalem nu Jihova ki nunu ruosuo chü ro, uko noue la uko niepuu kitsa votatie, Juda kediu Rehoboam kitsa votatie, sidi uko sie a dukhriwatie, sidi la Juda kediu Rehoboam kitsa votatie” sita.

²⁸Süla kediue mharhülie, sidi suna pie mithunuo kenie rhilie, sidi sie uko ki, “Jerusalem nu khokecü nie la rethorte. Harie Israel, Ijipt nunu nie ze parkeshü nie rhuoko sü cüge” sita.

²⁹Sidi puoe puo pie Bethel nu, mu kekreiu pie Dan nu shüshü.

³⁰Mu mha hauha kephouma mhatho puo chüta, kekreilamonyü themiakoe vo di Bethel nu kebau mu vo Dan nu kebau ketso rüsuota.

³¹Puoe thechü kerükrieko gei rei ki chüshü, sidi Levimia kemo miahoumia bu zievoko chüta.

³²Siro Jeroboam-e thekhrü thelau nu, zha kerepengou nhie, Juda nu thehe mhiekecü puo keselie, sidi puoe ruosuoba geinu ruosuo chü, sümhie di puoe Bethel nu rei chü, ruosuo chüpie puoe chükelie mithunuoko tsü, siro puoe zievoko khapie puoe chükeshü thechü kerükrieko gei shüshü.

³³Sidi puoe Bethel nunu chükelie ruosuoba gei thekhrü thethau nu zha kerepengou nhie; puo nou nu rhükelie thekhrü nu ruosuo chü, tsiu Israel themiako la thehe puo chütuoülie, sidi puoe kho ruosuoba geinu ruosuo chü, tsiu mharekethengu theshü.