Read Angami Naga Kediko Kerieu 13 Bible Online

Kediko Kerieu 13 - Angami Naga bible

Kediko Kerieu 13

¹Sitse harie, Kepenuopfü themia puo Juda nunu Jihova die se di Bethel nu vor, mu Jeroboam-e mharekethengu thetuoü di ruosuobau khieki tha.

²Sitse themiau Jihova die medzi di shiekhoui ruosuobau petsou di sie, “He-i ruosuobau, ruosuobau, Jihova hakemhiekecü puya: ‘Harie, nuo puo penuo pie David kikru nu shütuo, puo zae Josia mu puoe thechü kerükrie geinu mharekethengu theyakezha zievoko pie n gei khashütuo, sidi themiako ru n geinu theshütuo.’ ”

³Mu teisozha sünhie zasi puo khashü di sie, “Hau Jihova pukeshü zasiu: ‘Harie, ruosuobau biemewatuo, sidi sügei keba migeko rüla tatuo’ ” si.

⁴Sitse kediue Kepenuopfü themiau die Bethel nu ruosuobau petsou di shiekeshü silie tse, Jeroboam-e ruosuoba geinu puo dzie yha sie di sie, “Puo teliecie” sita. Sitse puo dzie yhapie puo petsou kesier bouu lasiata, sidi süu ketse lalie kenjüta.

⁵Siro Kepenuopfü themiau zasi Jihova die nunu khakeshü mhiei ruosuobau rei sa prota, mu migeko ruosuobau geinu rülata.

⁶Sitse kediue Kepenuopfü themiau ki, “Tsie Jihova n Kepenuopfü ki n mezhiemelo di a la chashücie, sidi a dzie bu vi lalieyi” si. Sitse Kepenuopfü themiau Jihova ki chashü, sidi kediu dzie chüpevipie hadzü mhiei shüwa.

⁷Sitse kediu sie Kepenuopfü themiau ki, “A ze di a ki vorcie sidi rüleiliecie, mu a n zhakhra chüshütuolie” sita.

⁸Sitse Kepenuopfü themiau sie kediu ki, “No n rüvie ketoupuo zocü rei pie a tsütuoü zorei, a n ze volie lho morei a thechü hau nu mhacü morei dzü rei krielie lho.

⁹Kekreilamonyü Jihova die a ki khakeshü: No niekhrüda cü morei dzü rei krie hie, morei no kevo chau rei ze la vo hie” idi pushü.

¹⁰Süla puoe Bethel nu kevor chatsa la vo mota.

¹¹Sükisü Bethel nu siedzekesi ketsamia puo baya; mu puo nuonuoko vor di Kepenuopfü themiau Bethel nunu mha chükeshüko pete dze puo ki pushü; kediu ki die pukeshüko rei sa pie uko puou ki pushü.

¹²Sitse uko puoue uko üse, “Puo cha kiu ze vota ga?” sita. Sitse puo nuonuokoe Kepenuopfü themiau Juda nunu kevor-u cha ze voketa tha puo kieshü.

¹³Sitse puoe puo nuonuoko üse, “Gada puo keseshü a tsücie” si. Sitse ukoe gada puo keseshü puo tsü, mu puoe süu gei sie balie.

¹⁴Sidi puoe Kepenuopfü themiau sie whuo vota, mu puoe phriebo puo khro ba di puo ngulie, sitse puoe sie puo ki, “No Juda nunu kevor Kepenuopfü themiau me?” si. Sitse puo sie, “A süulie” sishü.

¹⁵Süsie puoe puo ki, “A ze di a ki vorlie, di mhacüliecie” sita.

¹⁶Sitse puoe sie, “A n ze pesie la morei n ze volie lho; morei a thechü hau nunu n ze mhacümhakrielie lho;

¹⁷kekreilamonyü Jihova die a ki pukeshü, no sünunu mhacümhakrie rei hie, morei no kevo chau ze la vor hie” sishülie.

¹⁸Puoe sie kekreiu ki, “Teigeidieliemia puo Jihova die se a ki: Puo bu mhacümhakrielieketuo la puo ze n ki vorliecie” sishü. Derei puo puo ki medawa.

¹⁹Süla puoe puo ze pesie la vota, sidi puo ki nunu mhacümhakrielie.

²⁰Sidi unie mizhü ki ba ru, puo kieze kevor siedzekesiu ki Jihova die vor.

²¹Sitse puoe Kepenuopfü themia Juda nunu kevor-u ki sie, “Jihova hakemhie puya: Noe Jihova dieze moketa la, mu n Jihova n Kepenuopfü n ki diekhakeshü se balie mote.

²²Sidi pesie la vor thechü hau nunu puo n ki pu di, ‘Mhacü mhakriehiecie,’ ikeshü chüu nunu mhacümhakrielieketa la, süla n kesiamo bu n puonuoko mekhru chü nu vorlie lhote” sita.

²³Sitse Kepenuopfü themiau mhacümhakrielieketa sie, uko puo zekevor siedzekesiu ze kevor-u la gada puo keseshü rie puo tsüshü.

²⁴Sidi puoe tuota tse chala nunu losha puo ze keselie, mu süu puo biekhriwata di kesia mo-u kelhou pie chanu zhü, mu gadau süu khieki tha, loshau rei sa kesiamo-u khie ki thata.

²⁵Sitse harie, miae süki vor, sidi kesia mo kelhou pie chanu kezhü, tsiu loshau kesiamo khieki ketha ngushü, sitse ukoe vor di siedzekesi ketsau keba nadiu nu pushü.

²⁶Mu siedzekesiu cha nunu puo ze la kevor themiaue süusü sishü tse, puoe sie, “Süu Kepenuopfü themiau zo, puoe Jihova dieze mote; süla Jihovae puo kha pie Losha tsüwate, süue puo ciechücierhawa, sidi puo tekhriwate, Jihova puo ki kepu die khekisü chüwate” si.

²⁷Mu puoe puo nuonuoko ki, “Gada puo keseshü a tsüthie” sishü. Sitse ukoe süu keseshü.

²⁸Sidi puoe tuo vo ru kesiamo-u kelhoupie chanu zhü, siro gadau mu loshau kesiau khiekiketha ngulie. Loshaue kesiamo-u cüwa mo, morei gadau ciechücierhawa mo.

²⁹Sitse siedzekesiue Kepenuopfü themiau mo-u chüpielie, sidi pie gadau gei shülie, di se vorta: sidi siedzekesi ketsaue puo krükratuoü mu puo khruwatuoü di nadi nu se vorlie.[12]

³⁰Sidi puoe kesiamo-u pie puo thuo puo mekhru nu shüwa, tsiu ukoe sie, “He-i, chüwate, a siezeu sü” chü di puo krükrata.

³¹Sitse puoe puo khrukewa sie, puoe sie puo nuonuoko ki, “A siata ro Kepenuopfü themiau khru piekezhü nunu a khruwaliecie; a ru pie puo ru donu piezhüwaliecie;

³²Puoe Jihova die se di Bethel nu ruosuoba petsou keshü la nu, siro Samaria nu nadiko nu keba thechü kerükrieko gei keba kiko petsoukeshüu chü touta zotuo.”

³³Mha hako sie Jeroboam-e puo mhathokesuo kechü nunu rüreilie mota, derei themia kehoukeruomia chüpie u bu thechü kerükrieko gei zievo chü, suomianie chünyüba shi, puoe süko chü kemesa pie puo bu thechü kerükrieko gei zievo chülie.

³⁴Mu mhahau la Jeroboam kiu chü kephoumawa, süu dathewa mu kijüu zieu geinu süu pekawatuoü kecü la.