Read Angami Naga Kediko Kerieu 14 Bible Online

Kediko Kerieu 14 - Angami Naga bible

Kediko Kerieu 14

¹Süki Jeroboam nuou Abija mhachülie.

²Sitse Jeroboam puo kimia üse, “Sielie, sidi n thuo n rhi chüpekreilie, sidi noe Jeroboam kimia ücü mia bu si hie, sidi sie Shilo nu vocie; harie, sünu Ahija siedzekesiu baya, puoe a bu themia hako mho kedi chütuoükecü pukeshüu.

³Siro niekhrüda ker, kecüca huo, mu mepfhidzü pou puo selie di puo ki vocie; puo n ki unuoyo kedipuo mhietatie shikecü pushütuo ho” sishü.

⁴Jeroboam kimiae sükemhie chülie, di sie Shilo nu vo, mu Ahija kinu vor. Derei Ahija tsaketa la mha ngulie kenjüta.

⁵Sitse Jihovae sie Ahija ki, “Harie, Jeroboam kimia puo nuoyo la mha ketsotuoü di n ki vorzhie ho, puoe mhachü baketa la. No hakemhie di puo kipushülie” sishü. Thenupfü vor, mu puoe thenu kekreimia mevi chütuo.

⁶Derei Ahija-e kikha nu puo chatuo pfhe silietse sie, “Lerlie, Jeroboam kimia no kiüdi n thuo n chü pie thenu kekreimia mevi chüya ga? Kekreilamonyü dielie kere pie n ki shünu a ketseshüte.

⁷Vo di Jeroboam ki, ‘Jihova, Israel Kepenuopfü hakemhie puya: Ae themiako donu n chüpezhashü, tsiu n chüpie a themia Israel mho kedi chü.

⁸Siro David kikru nunu kedirüvie biephrowa di pie n tsüshüe, sirei no a kituo David, a die khakeshüko chüüzekelieu mu puo nou pete pie a siemedzikelieu a mhingu ki mezhüükecü rübei chükecüu mhielie mote.

⁹N mhodzükelhou pete kirei mha kesuo chü, kekreilamonyü noe vo di terhuo miarhi kekrei rhilie, mu mhathepezha pie miarhi rhilie, sidi a nou chükemeyieketuou chü, tsiu a khapie n sietsa shüwate.

¹⁰Süla harie, a mha kesuo se Jeroboam kinu vortuo, sidi Jeroboam kinu thepfumia pete pekawatuo, siro Israel nu kediemia rei miadiechükemomia rei mu Jeroboam kinu peshapie kebako chüsetatuo, mia puoe thubuo jüta kemochie mipie the bayakezha tuoiwatuo.

¹¹Jeroboam themia kehoupuorei nadiu nu siaketa pete tefüe cütuo, siro lie nunu siaketako teirakoe cütuo; kekreilamonyü Jihovae süu pushüte ru.’

¹²Süla no sielie, la n thuo n kinu votalie, no n phi pie nadi nu lelie mumetha unuoyo siatatuo ho.

¹³Tsiu Israel pete puo la kratuo, sidi puo khruwatuo, Jeroboam gei kepar puo rübei mekhru nu leketuo la, kekreilamonyü Jeroboam kiu nu puo rübei gei Jihova Israel Kepenuopfü kitsa mha kevi huo bakecü ngulie.

¹⁴Sizomonyü Jihova Israel mho kedi puo pesieshütuo, puoe teisozha sünhie Jeroboam kikru pekawatuo, mu süu tsie reita zo!

¹⁵“Jihovae Israel vüshütuo, dzü nu tekhriebo he keniekeshü tuoi, mu puoe Israel rüna keviu hau khapie puo puonuoko ketsüu nunu thewatuo, sidi biekezapie Eufrat rüu tse vowatuo, kekreilamonyü ukoe Asherako chülie di Jihova bu puonou meyiete.

¹⁶Mu Jeroboam kephoumako la nu Israel khakegewatuo, puoe phoumawate, mu Israel chü kephoumawate” sita.

¹⁷Sitse Jeroboam kimiae sielie, di tuota, sidi Tirza nu vorlie mu puoe kikha ki kicie nu phirlie tse unuoyo siata.

¹⁸Israel pete puo khruwa mu puo krükra, Jihova die khekisü chü, süu puo kituou siedzekesiu Ahija ki pukeshüu chü tseiwa.

¹⁹Tsiu Jeroboam mhatho kekreiko, puo kedipuo kemhie di terhü chü shikecü mu kimhie di kedi chü shikecüko sü Israel kediko thedze leshüda nu thupietuo zo.

²⁰Jeroboam-e teicie mepfüekenie kedichülie puo puonuoko ze zezhüta, süsie puo nuou Nadab puo sou nu kedichülie.

²¹Tsiu Solomon nuou Rehoboam Juda nu di. Rehoboam-e kedichü sedekelie ki teicie hiediapuokrüta, mu puoe Jerusalem nu teicie kerethenie kedi chü, Israel seyie pete donunu Jihovae puo za khapie batuoü di kedakelie nadiu nu. Puo zuo zae Naama, Ammonmiapfü puo.

²²Siro Judae Jihova mhodzünu mha kesuo chüta, sidi ukoe uko puonuoko kechü tsügei rei uko kephouma kechüko geinu puonou chükemeyie.

²³Kekreilamonyü süko rei u thuo u la la kijü khru kerükrie peteko mu seibo kepejo khrüko nunu tsiepfheko pfhe mu Asherako selieta.

²⁴Siro kijü sünu rüsuoki nu thepfumia thuo thepfumia ze mha kesuo chü, sidi ukoe Jihovae Israelmia mhodzünu nu kelhoukewa kerütsekecü seyieko mhatho kemhie pete chüta.

²⁵Situo di Rehoboam kediu dikelie cie pengou cie, Ijipt kediu Shishak vor di Jerusalem perhie.

²⁶Sidi puoe Jihova kinu kinyi kengu piekebako mu kediu kinu kinyi kengupiekebako chüseta, puoe mhapeteko seta zo: süsie rei puoe Solomon chükeshü suna pie kechü pezhüko pete chüseta.

²⁷Rehoboam-e süko sounu merenyi pie pezhü chülie, sidi süko khapie kepfhekezhau dzienu shüwa, puoe kediu kiu kikha pfhe baya.

²⁸Süla kediue Jihova kinu kele metsei kepfheu süko toupielie, di süko se la vor kepfheu kibou nu shüwawaya.

²⁹Tsiu Rehoboam mhatho kekreiko, mu puoe chükeshü pete Juda kediko thedze leshüda nu thupiezhü moü me?

³⁰Siro Rehoboam mu Jeroboam unie donu terhü chü si tuotso zo.

³¹Sidi Rehoboam-e puo puonuoko zezhüta, mu David nadiu nunu puo puonuoko ze di khruwa, tsiu puo zuo za liro Nama, Ammonmiapfü puo, süsie puo nuou Abijam puo sou nu kedichülie.