Read Angami Naga Kediko Kerieu 15 Bible Online

Kediko Kerieu 15 - Angami Naga bible

Kediko Kerieu 15

¹Siro Nebat nuou kediu Jeroboam dikelie cie kerethethaketa ki, Abijam-e Juda nu kedichülie.

²Puoe teicie se Jerusalem nu kedichü, mu puo zuo zae Maka Abishalom nuopfü.

³Mu puoe puopuo puo mhodzü kephouma kechü pete chü zo, sidi puo noue puo krü David mhie mota, sidi Jihova puo Kepenuopfü ze puo tou chülie mota.

⁴Sirei David la nu Jihova puo Kepenuopfü Jerusalem nu, puo sie puo nuo puo pesieshütuoü, mu Jerusalem chüshütuoü mitu puo pie puo tsü.

⁵Kekreilamonyü David-e Jihova mhingu ki kiu vi shikecü chü, mu Hitmia Uria dzeu nu zokemo sie, puo kerheichie puo ki diekhakeshüko therhieta mo.

⁶Siro puo rheichie Rehoboam mu Jeroboam unie donu terhü chütuo tso.

⁷Tsiu Abijam mhatho kekreiko mu puo chükeshüko pete, süko Juda kediko leshüda nu thu piezhü moü me? Siro Abijam mu Jeroboam unie terhü chü.

⁸Abijam-e puo puonuoko ze zezhüta; ukoe David nadiu nunu puo khruwa: süsie Asa puo nuou puo sou nu kedichülie.

⁹Israelmia kediu Jeroboam dikelie cie mepfü cie, Asae Juda mho kedichülie.

¹⁰Mu puo Jerusalem nu cie hiediaepuokrü kedichü. Siro puo zuo zae Maka, Abishalom nuopfü.

¹¹Siro Asae puo puo David mhiei, Jihova mhingu ki puotoukecüu chü.

¹²Sidi puoe kijü sünu rüsuokiko nu thepfumia thuo thepfumia zeyakecüko khawa, siro puo krüe chükeshü terhuomiarhiko pete chüwa.

¹³Sizomonyü puoe puo zuopfü Maka bu kedi chü mota, puoe kemecükecü Ashera miarhi rhikeshü la; tsiu Asae puo terhuomiarhiu bie pesuowa, sidi Kidron Rüu nunu thewa.

¹⁴Derei thechü kerükrieko nu we biekediwa mo. Sirei Asa noue puo kerheichie Jihova ze puotouchütuo tso.

¹⁵Siro puoe puo puo phrapie kezhü mhanyako mu puo thuo phrapie kezhü kethezie mhanyako se la vor Jihova kinu shülie, sükosü rakachü, suna mu mhabouko.

¹⁶Siro Asa mu Israel kediu Baasha donu unie kerheichie terhü chütuo tso.

¹⁷Sidi Israel kediu Basha kho di Juda perhie sidi Rama chülie, süusü miapuorei bu Juda kediu Asa ki le morei pra motuoükecü la.

¹⁸Sidi Asae Jihova kinu keba rakachü mu suna kinyiko pete, siro kediu kinu kinyi keba pete pielie di khapie puo kituoko dzienu shüwa, sidi Asa kediue süko ketse pie Benhadad, Tabrimon nuou, Hezion nuou, Siria nu kediu, Damaska nu kebau ki shü, di sie,

¹⁹“Avu donu pfhekho ba khe; n puo mu a puo unie mhie di harie, a rakachü mu suna methuo ketseshü n tsüshüzhie, Israel kediu Basha bu a ki nunu tuotaketuo la, vo di puo ze kepfhekhopie kebau bierhuowayi” sita.

²⁰Sitse Benhadad-e kediu Asa die rünyülie, sidi rüpfhünuoko mho kezhau bu Israel nadiko perhieketuo la ketseshü. Sidi puo vo Ijon, Dan, Abel-beth-maka, Kinerot mu Naftali kijü pete sa di pekawata.

²¹Mu Baashae süu dze silie tse, puoe Rama chükebau khawata, sidi Tirza nu lhou bata.

²²Tsiu kediu Asae dielie pie Juda pete nu shü, sünu miapuorei khawa mo; sidi ukoe Rama nu Baashae chükeshü ketsieko mu melako chü se vo, sidi Asae süko pie Benjamin nu Geba mu Mizpa chülie.

²³Asa mhatho kekreiko pete, mu puo kekuo mu puoe chükeshü pete, puoe chükelie nadiko, süko Juda kediko dze leshüda nu thu piezhü moü me? Derei puoe phichüta tse puo phi gei kechü puo parta.

²⁴Sidi puo puonuoko ze ze zhüta, mu puo puo David nadi nunu puo puonuoko sa di khruwa; tsiu puo nuou Jehoshafat puo sounu kedichülie.

²⁵Juda kediu Asa dikelie cie kenieu cie Jeroboam nuou Nadab Israel nu kedi chülie, mu puo cie kenie Israel mho di.

²⁶Mu puoe Jihova mhingu ki mha kesuo shüüko chü, tsiu puo puo zho rhinu tuota, siro puo kephouma nunu Israel chüpie phoumawa.

²⁷Abija nuou Basha, Isakar yieu, sie puo petsouta; sitse Basha Gibethon nu, Filistinmia kijünu kebau nunu puo biewa, kekreilamonyü Nadab mu Israel pete-e Gibethon re baketa la.

²⁸Juda kediu Asa dikelie teicie se cie Bashae süu dukhriwa, sidi puo sounu di bata.

²⁹Sidi puo kedichülie mumetha Jeroboam kinumia pete dukhriwa, sidi puoe puo pekawa kemochie, kerheiro yopuo rei peshapie Jeroboam tsü mo, Jihova puo kituou Ahija, Shilon-u geinu pukeshü khekisü chü.

³⁰Kekreilamonyü Jeroboam kephouma kechü la nu Israel chü pie phoumawa, mu puoe Jihova Israel Kepenuopfü nou chü kemeyiekeshü la.

³¹Siro Nadab mhatho kekreiko tsiu puoe chükeshü peteko, süko Israel kediko dze leshüda nu thupie zhü moü me?

³²Siro Asa mu Baasha Israel kediu donu unie kerheichie terhü chütuo tso.

³³Juda kediu Asa dikelie cie se cie Ahija nuou Basha Tirza nu kedi chü sedelie, di cie mepfüedia di.

³⁴Puoe Jihova mhingu ki mhakesuo shüüko chü, mu Jeroboam zho nu lhou, sidi puo kephouma nu Israel bie kephoumashü.