Read Angami Naga Kediko Kerieu 16 Bible Online

Kediko Kerieu 16 - Angami Naga bible

Kediko Kerieu 16

¹Sitse Jihova die Jehu, Hanani nuou ki vor di Baasha kerhie di sie,

²“Ae nyophe nunu n chü pezhashü ze, sidi n chüpie n bu a themia Israel mho kezha chü; mu noe Jeroboam zho-u nu lhou, siro a themia Israel chü kephouma sidi uko kephoumako se a nou chükemeyie,

³harie, ae Basha mu puo kinumia chükediwatuo, sidi n ki chüpie Jeroboam Nebat nuou kikru mhiewatuo.

⁴Baasha themia nadi nunu siakecüko tefüe cütuo; tsiu puo themia lie nunu siakecüko teirakoe cütuo.”

⁵Siro Baasha mhatho kekreiko mu puoe kedipuo chü shikecü, tsiu puo kekuo, süko Israel kediko dze leshüda nu thupie zhü moü me?

⁶Sidi Bashae puo puonuoko ze ze zhüta, sidi Tirza nunu puo khruwa; sitse Ela puo nuou puo sou nu kedi chülie.

⁷Süsie siedzekesiu Jehu Hanani nuou geinu Jihova die Basha mu puo kikru petsou, puoe Jihova mhingu ki mha kesuo kechü pete la, puo dzie mhathopie puo nou chükemeyiekecü la, Jeroboam kikruko kemhietakecü la, siro puoe süu rei peka phrekewa la.

⁸Juda kediu Asa dikelie cie mepfüesorou cie, Basha nuou Ela Tirza nu Israel mho cie kenie di.

⁹Derei puo kituou Zimri, puo guragariko ketou puo mhokezhau, puo petsou sierta. Puoe Tirza kedikiu kepfheu Arza ki nunu zukrie mezekeba ki.

¹⁰Zimri vor di puo vü khriwa, sidi puo sou nu kedichülie, Juda kediu Asa dikelie cie mepfüethenie cie.

¹¹Puoe kedi chü sedelie mu kedi bagei balie mumetha, puoe Baasha themiako pete dukhriwata, puoe puo seyiemia morei puo khriethokhriechü thepfumia puorei peshashü tsü mo.

¹²Hamhie di Zimri-e Basha kikru pete pekawa, Jihova die khekisü chü, puoe Jehu siedzekesiu geinu Baasha petsoukeshü mhie di.

¹³Kekreilamonyü Baasha kephouma pete la mu puo nuou Ela kephouma pete la, sünunu ukoe Israel chü kephoumawa, uko terhuomiarhiko se di Jihova Israel Kepenuopfü nou chükemeyie.

¹⁴Siro Ela mhatho kekreiko mu puoe chükeshü peteko, süko Israel kediko dze leshüda nu thupie zhü moü me?

¹⁵Juda kediu Asa dikelie cie mepfüethenie cie Zimri-e Tirza nu teisozha thenie kedi chü. Sitse chüpahi krokoe Gibethon, Filistinmia kijü perhietuoü vo balie.

¹⁶Sitse whuotuoü vo batakecükoe die puo sikecü, “Zimri-e sie kediu dukhrituoü rhü di puo dukhriwate” si. Süla Israel pete Omri, chüpahi mhokezhau bu sünhiesü nunu Israel mho kedi chülieta.

¹⁷Sidi Omri mu Israel pete rei puo ze di Gibethon nunu khota, sidi ukoe Tirza whuo.

¹⁸Mu Zimri-e nadiu lielieketa ngu tse, puoe kediu kediki nu le, sidi mi pie kediu ki theshü, sidi mi nunu puo thekhriwa,

¹⁹kekreilamonyü Jihova mhodzüki nu mha kesuo chükecü, puo kephouma la, Jeroboam zho nu tuokecü la, tsiu puo kephouma la Israel chü kephoumawa.

²⁰Tsiu Zimri mhatho kekreiko, mu puoe mia gei mha kesuo rhükecüko, süko Israel kediko dze leshüdanu thupie zhü moü me?

²¹Süsie Israelko chükho kenie chüwa. Mia ketoupuoe Genath nuou Tibni bu kedi chütuoü di puo siemedzita; mu ketoupuoe Omri siemedzita.

²²Derei Omri siedzikoe Ginath nuou Tibni siedziko mho kuolieta: Süla Tibni siata, mu Omri kedichülie

²³Juda kediu Asa kedi chükelie cie serepuokrü cie, Omri Israel nu kedi chü sedelie di cie kerekenie di: süki cie sorou Tirza nu di.

²⁴Siro puoe raka talent kenie pie Shemer kinu Samaria kijüthou-u khrülie, mu kijüthou geinu ki chülie, sidi puoe chükelie nadiu üse Samaria chülie, Shemer kijükhru-u niepuu za se di.

²⁵Omri-e Jihova mhodzü mha kesuo shüüko chü, sidi puo mhodzü kelhouko pete kirei suokuota.

²⁶Kekreilamonyü puoe Nebat nuou Jeroboam zho pete chü, di puo kephouma zho pete chü, mu puo kephouma nunu Israel chü kephoumawa, terhuomiarhiko se di Jihova Israel Kepenuopfü nou chükemeyie.

²⁷Siro Omri mhatho chükeshü kekreiko tsiu puo kekuo pengukeshüko, süko Israel kediko dze leshüda nu thupie zhü moü me?

²⁸Sidi Omri-e puo puonuoko ze zezhüta, mu Samaria nunu puo khruwa, siro puo nuo Ahab puo sou nu kedichülie.

²⁹Juda kediu Asa dikelie cie serethetha cie Omri nuou Ahab-e Israel mho kedi chülie; siro Omri nuo Ahab-e Samaria nu Israel mho cie mepfüe kenie di.

³⁰Tsiu Omri nuo Ahab-e puo mhodzü kelhouko pete kirei Jihova mhodzünu mha kesuo chütho.

³¹Situo di mhale kerüdza di puoe Nebat nuou Jeroboam kephouma nu tuota, sidi puoe Sidonmia Etbal nuopfü Jezebel lielie, sidi vo Baal liechü, di puo rüsuota.

³²Puoe Samaria nunu Baal ki chükelie nunu Baal la ruosuoba puo chülie.

³³Ahab-e Ashera puo chülie, sidi Ahab-e puo Israelmia kediko mhodzüketuoko pete kirei Jihova Israel Kepenuopfü nou chükemeyie kuokecü chü.

³⁴Puo tei ki Bethel-u Hiel-e Jeriko rüna chülie, puoe puo nuo nuorieu Abiram puo pekawaketuo le mo zo di bodepie zhüwa, sidi Jihovae Nun nuou Joshua geinu pukeshü khekisü chü puo nuo nhicutho-u Segub bu kata zorei kharuko chülie.