Read Angami Naga Kediko Kerieu 17 Bible Online

Kediko Kerieu 17 - Angami Naga bible

Kediko Kerieu 17

¹Sitse Tishbimia Gilid nu kelhou Elija-e sie Ahab ki, “Jihova Israel Kepenuopfü rheiketuo mhiei, ae puo mhodzünu thaya, a pushü kemosie teicie huo thezei rei krülie lho, morei tei rei rülie lhote” ishü.

²Sitse Jihova die puo ki vor di sie,

³“Hanunu tuoshülie, sidi niathutsa votalie, sidi Jordan mhodzünu, Kerith rücüu khie ki n thuo n kevie se bataliecie.

⁴Noe rücü dzüu krielietuo; siro ae shüzhako bu sünunu n vachülieketuo die khashüte ho” sita.

⁵Süla puoe vo di Jihova diekhakeshü mhie chülie kekreilamonyü puoe tuo vo di Kerith Rücüu khieki bata, süue Jordan niathutsa zhü.

⁶Mu shüzhakoe khise niekhrüda mu themuo se puo ki vorya, siro thevatie niekhrüda mu themuo se vorya; mu puoe rücü dzüu krielielieya.

⁷Situo di zha huo sie, rücü dzüu sota, kekreilamonyü kijüu gei tei rüshü moketa la.

⁸Sitse Jihova die puo ki vor di sie,

⁹“Sielie, sidi Zarefath nu votaliecie, süusü Sidon kitsa ba, sidi sünu lhou batalie. Harie, ae sünu samimiapfü puo bu n thekelietuoü diekhashüwate” sita.

¹⁰Süla puo, sielie di Zarefath nu vota. Mu puoe nadiu kharu ki vorlie tse, harie, thenu samipfü puo süki sei pa kengutuo; sitse puoe süpfü kie di sie, “Dzü huoyo lipfhü nunu se vor a tsü di a bu krielie” sishü.

¹¹Puoe vo di süu se vortuoü zhü tse, puoe süpfü kie di sie, “N dzie nunu niekhrüda huoyo se vor a tsü thie” sishü.

¹²Sitse süpfüe sie, “Jihova n Kepenuopfü rheiketuo mhiei, a niekhrüda riepie ba molie, derei merha nu thu huoyo ba mu lepou nu tier huoyo ba; mu tsie, ae sei huoyo kenguliezhie, sidi a kinu vo süu se a la mu a nuo la keselie di süu cülie tatse siatatieyalie” silie.

¹³Sitse Elija sie puo ki, “Michie hiecie, volie di no kepu tuoi chüliecie, derei a la niekhrüda puo rieshülie periecie, sidi süu se vor a tsücie, süsie nu n la mu n nuo la rieliecie.”

¹⁴Kekreilamonyü Jihova Israel Kepenuopfü hakemhie puya, “Merhau nu mha methuotalie lho, morei lepou nu tier jütalie lho, Jihova kijüu gei tei perüshü kemochie,” sita.

¹⁵Sitse puoe vo di Elija kepu kemhiei chülie mu hapfü mu puo mu hapfü kinuko teisozha kekra mhacü ükrie balie.

¹⁶Siro merha nu mha jüta mo, morei lepou nu tier ba mota mo, Jihova die, puoe Elija geinu pukeshü tuoi di chülie.

¹⁷Situo di mha hako sie, ki niepupfü nuou, mhachülieta, tsiu puoe mhachü se tacü, puo gei keha ba mota.

¹⁸Sitse hapfüe sie Elija ki, “He-i no Kepenuopfü themiau, no kiüdi a ngumvüya ga? No a bu a kephouma, rükra lalietuoü tsiu a nuo dukhriwatuoü di a ki vor me?” sita.

¹⁹Sitse puoe sie süpfü ki, “N nuo pie a tsüshücie” sita. Sidi puoe süpfü merü geinu puo nuou pielie, sidi puo toupie puo kebachü nu khota, sidi puo khapie puo zhü gei pie zhülie.

²⁰Sidi puoe Jihova ki cha di sie, “He-i Jihova a Kepenuopfü, no mha kesuo pie thenusamipfü a bu puo ze kebapfü gei vor di puo nuou dukhriwatieya me?” sishü.

²¹Sidi puoe puo thuo pechie tsu va se unuoyo gei shüshü, sidi Jihova ki shiekhoui di sie, “He-i Jihova a Kepenuopfü, nuo hayo kerheiro bu la puo gei vorlieyi” si.

²²Sitse Jihovae Elija pfhe rünyülie, sidi unuoyo ruopfüu la puo gei vorlieta, sidi puoe rhei sierlie.

²³Sitse Elija-e unuoyo toupielie, di kibouu nunu se ker kinu shülie, sidi puo khapie puo zuo tsü di sie, “Harie, n nuoyo rheiliete ho” si.

²⁴Sitse thenupfüe sie Elija ki, “Mha hagei nu noe Kepenuopfü themia puo zo ükecü a siliete, mu Jihova die n tie nu ketho zo” sita.